TITUS 3

1Parepdep sia bule rapusum ka sapamarenta samba ka sibara gege mareddet samba matarek masigalaiake sene ngamata galajet simaeru. 2Bui masiasa sabagei, bui pajoggolo, tapoi mueru baga le samba muleppe baga ka sangamberi sirimanua. 3Aipoi sita leu siburu sitaiagai paatuat le, sitaimareddet, simapepepe, bailiu pagugulet ka sene ngamata pubotbonan samba siobat tubu, murimanua ka bagat pukataikat samba sisit baga, kasitsitnakenen, palaga baga pasasamba. 4Tapoi kele aimatoila anggai bagat Taikamanua, Sipaarau sita, samba nuntut bagania ka sirimanua, 5arauakenangan sita, ta kalulut galajet simaroipo sigalaiakenenta, tapoi kalulut katet bagania le ka pasiraukat pasitutut mata sibau samba ka pasibaugat Ketsat Sipunenan, 6siuruakenennia taimagulai ka sita kalulut Yesus Kristus Sipaarau sita, 7bule sita pinaroipot kiliu bagania, bailiu sipasiikep purimanuaiat sitaitatata, siripot pukakaronanta. 8Karonan te tiboiet nene samba kuoba bule nuronake nia, bule sia simatonem baga ka Taikamanua rapasikeli masigalaiake galajet simaeru. Ia te simaeru samba sibailiu uktuk ka sirimanua. 9Tapoi ka pagalaiat paukelat tiboiet si ta galai samba paninikat, pajoggolat samba pagolukat pagalaiat Surukat, areuake tubum. Aipoi sangamberinia nenda siboboi le ta anai kauta nia. 10Sirimanua sibaraake pasaraat, lepa nupanganturu nia sangaminca ele rua ngaminca, katsiliake nia. 11Anuagaian poi sirimanua kele nenda bulat amapepengan samba jonia masiukum tubunia. 12Ke akukoiniakean si Artemas samba si Tikhikus raoi kekeu, olaake nuoi nuailiake aku ka Nikopolis; aipoi akupaatungan mukuddu sedda ka tetere simaleppet. 13Pasikeli nuromake si Zenas guru Surukat, samba si Apollos ka bagat puenungananda, bui bara simagulai ka sia. 14Samba sia saaleita leu kau ragelai mugalai galajet simaeru, ibara pakeiet ka besiakenen, bui si ta bua rapurimanua. 15Sangamberi saalei sipaalei aku se masisegeake salam kekeu. Segeake salamku ka sia simanuntu baga ka sita ka bagat tonem baga. Kiliu bagat Taikamanua masipaalei kam sangamberimui!

will be added

X\