TITUS 2

1Tapoi ekeu geti, siripot ka nganturat simaeru le gelaiake: 2Taimanteu simabaja kau rapurimanua sipasesese, masuru, masiku paatuat, maron ka bagat tonem baga, ka bagat nuntut baga samba ka bagat om baga. 3Kisedda leu et tainanalep simabaja, kau rapurimanua simasuru ka Taikamanua, bui masipakatai sabagei, bui simalo simapuinengen, tapoi siagai masinganturuake simaeru le, 4bule rapanganturu tainanalep sibau tubu masipununtuki baga taimanteura samba tatogada, 5murimanua masiku paatuat samba malina, mangamang masipagaba lalepnia, maeru paatuat, mareddet ka simanteunia, bui ituasa tiboiet Taikamanua. 6Kisedda leu et tailainge, panganturu sia bule raagai masipaneinei tubuda ka bagat sangamberinia 7samba ekeu, kau ibailiu ekeu uluiet ka galajet simaeru. Ka bagat nganturat patoila linat paatuat samba sipulelelek. 8Pakei tiboiet simaroipo, bui bara loloiet, bule ramaila sipasilalawan, kalulut ta anai apa pa sikatai kuanenda pagalaiat sita. 9Sapagugulet kau ramareddet ka tai tuanda ka bagat sangamberinia samba raangkaake bagada, bui rasiddot sia, 10bui manangkou, tapoi kau le rapatoila sangamberi eru samba topit, bule kalulut kisedda ralatsatnake nganturat Taikamanua Sipaarau sita, ka bagat sangamberinia. 11Aipoi kiliu bagat Taikamanua siarauake sangamberi sirimanua amatoilaan. 12Igelai sita bule tagalakngake pukakatai samba pubotbonan polak samba bule tapurimanua simasoppit, simaroipo samba muarat ka polak nene 13ka tetere kineneiget ka bagat ai sita masingengena karonietta simasun puuktungan samba katutoilakat pulatsanan Taikamanua Sipulubeunan samba Sipaarau sita Yesus Kristus, 14sibuluake tubunia punu tubuta bule ibelaake sita ka sangamberi pukataikat samba ilinaake sita bailiu bangsania simangamang masigalai simaeru. 15Sangamberinia nene gelaiake, panganturu samba ase sirimanua sibara ka sangamberi ronnu. Bui rapaguileake ekeu kasei pa.

will be added

X\