TITUS 1

1Sibara kai Paulus, pagugulet Taikamanua samba apostel Yesus Kristus masipasikeli tonem bagada sirimanua sipilit Taikamanua samba puaagai pubulanan siripot aratta, 2samba mubongen ka pukakaronan purimanuaiat sitaitatata, sinibalaakenen Taikamanua si ta boko, enan tapei abara tetere, 3samba ka tetere siteuakenennia aipatoilaan tiboietnia ka bagat pasipaareman Katuareman Simaeru sinegeakenen kaku siripot patonekat Taikamanua, Sipaarau sita. 4Masiailiake si Titus, togaku sipulelelek siripot keret tonem bagata: Kiliu baga samba aban sibara ka Taikamanua Ukkui samba Kristus Yesus, Sipaarau sita masipaalei ekeu. 5Lulunia akugalak ekeu ka Kreta, ia te bule nupagaba pagabaet pei le samba nurioake tai baja gareja ka senen laggai, kele sitonekenenku ka matam, 6ia te sia si ta kuat tubu, buita sara le sinanalepnia; tatogania tai Kristen simatopit samba ta anai katuareman pagalaiat pubotbonan tubu samba kelat paatuat. 7Aipoi sipaneinei paamian, kele sipasikeli lalep Taikamanua, buita si ta kuat tubu, bui simabuak paatuat, bui simagolu, bui simalo simapuinengen, bui simagege, bui simaalau baga, 8simaletsei tairauma le, simaoba ka simaeru, simasiku paatuat, simaroipo, simasuru, siagai masipasikeli tubu, 9samba siometnake tiboiet simaeru siripot sigelaiakenen, bule ioi leu ipanganturu sirimanua mubongen ka nganturat simaeru samba masiase sipasilalawan. 10Aipoi amaigingan sia simakela paatuat, sitiboi tiboiet si ta galai samba sipatataju, sara pei sia sibara ka arat Yahudi. 11Sia nene buita tupetpetnake ngungunda, kalulut arapakataian lalep sirimanua gegelaiakera sitaipasese, masigaba uktuk simalolit. 12Sara ka talagada, ia te nabida masikua, "Sarat paboko le tai Kreta, tarimeu simasakbak, simereu kokom sitaimamala." 13Pasimunengan nene sibulatnia. Kalulut nene susui matada, ba pagugulai, bule ramaron mutonem baga, 14samba buian rapuletsei pumumuanda tai Yahudi samba patonekat sirimanua sikaddiuake pubulanan. 15Ka sirimanua simalina sangamberinia le malina; ka sirimanua simalolit geti samba sitaimatonem baga beri sara simalina, aipoi paatuatda samba bagai bagada malolit le. 16Rakua raagai Taikamanua, tapoi ka galai tubuda ai le raputatata nia. Kasitsitnakenen le sia samba sitaimareddet samba sitaioi masigalai apa pa galajet simaeru.

will be added

X\