ROMA 8

1Kineneiget taan ioorak sia ukum sikuddu ka bagat Kristus Yesus. 2Ketsat sipasiaake purimanuaiat poi ka bagat Kristus Yesus amasiujaake sita ka ukum jo samba kamateiat. 3Apa poi sitaioi igalaiake Surukat kalulut gulaita sirimanua, aikoiniakean Togania Taikamanua ka bagat akkula simakere ka sirimanua sijo, samba kalulut jo, aiorakngakean ukuman ka jo ka bagat akkula, 4bule ipuaili puroipoat kiddiet Surukat ka tubuta, sita sipuririmanua taan siripot akkula, tapoi siripot Ketsatnan le. 5Aipoi sia sipuririmanua siripot akkula, masipaatu siripot akkula; sia sipuririmanua siripot Ketsat, masipaatu siripot Ketsat. 6Pupaatuanan akkula poi kamateiat le, tapoi pupaatuanan Ketsat ia te purimanuaiat samba aban. 7Oto pupaatuanan akkula, ia te pasaggangan ka Taikamanua, aipoi ta mususum nia ka Surukat Taikamanua; ta poi momoi igalaiake nia. 8Sia sipuririmanua siripot akkula, ta iooba sia Taikamanua. 9Tapoi kam geti ta sipuririmanua ka bagat akkula, tapoi ka bagat Ketsat le, ke bulatnia bai mukkuddu Ketsat Taikamanua ka bagamui. Tapoi kasei si ta anai Ketsat Kristus, ta bakkat Kristus nia. 10Tapoi ke ai Kristus ka bagamui, mamatei tedda kam kalulut jo, ketsat geti muririmanua le kalulut puroipoat. 11Ke mukuddu Ketsat Taikamanua sipasisusuruake Yesus ka simamatei ka bagamui, oto nia sipasisusuruake Kristus ka simamatei masisuruake leu tubumui simamateiet kalulut Ketsatnia sikuddu ka bagamui. 12Oto sasaraina, sipuutakngan le sita, tapoi ta ka akkula, bule tapurimanua siripot akkula. 13Aipoi ke siripot akkula nupurimanua kam, mamatei le kam; tapoi ke siripot Ketsat, mateiakemuian sigalai tubumui, purimanuamuian. 14Sangamberi sirimanua pinalulut Ketsat Taikamanua, sia te tatogat Taikamanua. 15Aipoi ta Ketsat pupagugulenan sikau kam minca muloto anusilo kam, Ketsat sikau kam ibailiu tatogat Taikamanua le. Ka bagat Ketsat nenda tapusoga: "Abba, Ukkuiku!" 16Ketsat nene te pasamba ketsatta masimunengake, tatogat Taikamnua le sita. 17Samba ke toga sita, sipasiikep leu sita, tibonannia: sipasiikep palelengan Taikamanua, tasilo nia pasamba Kristus, aipoi ke samba tapasiorik kam Kristus, tulalatsatnake leu sita pasamba nia. 18Siripot pinaatuku, pangoringan ka tetere kineneiget, ta isisiripoki tupakereake nia ka pulatsanan patoilaket ka sita geti. 19Bulat amarrepdepman poi bagada sangamberi sibaraakenen masingena katutoilakatda tatogat Taikamanua. 20Aipoi sangamberi sibaraakenen amusupman ka kaaanau, ta ka teunia, ka teu Taikamnua sipasisusupmake le, 21Tapoi ka bagat pukakaronan, aipoi sibaraakenen tuujaake leu ka paoreat pulangokat, tuguru ka puujaat pulatsanan tatogat Taikamanua. 22Taagai poi, aili teret kineneiget sangamberi sibaraakenen kere muhoihoi samba kere masiorik besit pususule. 23Ta sarat sia, sita leu sipasisilo bua pusisikebbukat sibara ka Ketsat, muhoihoi leu sita ka paatuatta ka bagat pangenaatta ibailiu sita toga, ia te pasiarau tubuta. 24Kalulut pukakaronan le atasilo puaragat. Tapoi pukakaronan siitco, taan pukakaronan; aipoi ke atuitcoan apananta pei le takakaroni nia? 25Tapoi ke takaroni kam sitaiiitcoketta, ngenaaketangan nia ka om baga. 26Kisedda leu Ketsat masirom sita ka bagat gulai tubuta. Aipoi ta taagai kipa siripokatnia manindou; tapoi Ketsat le maninindou punu tubuta ka Taikamanua ka bagat puhohoihoi sitaioi tutiboake. 27Samba Taikamanua siagai masiitco paatuat sirimanua, iagai pinaatut Ketsat, aipoi siripot siobat Taikamanua le itiddouake sirimanua sipunenan. 28Kineneiget taagai kam, ai le mugagalai Taikamanua ka bagat sangamberinia masibaraake katuerukat ka sia sipununtuki nia baga, ia te sia sinogai teu bagat Taikamanua. 29Aipoi sia sipilit Taikamanua ka panandaatnia, sia leu aiteuake ka panandaatnia ibailiu sia makere ka tularat Togania, bule Togania nenda bailiu sikebbukat ka sasarainania simigi. 30Samba sia siteuakenennia panandaatnia, sia leu te sogaietnia. Samba sia sinogainia, sia leu te paroipoetnia. Samba sia siparoiponia, sia leu te latsatnakenennia. 31Oto kipangan le takukua ka pagalaiat sangamberinia nene? Ke Taikamanua masipaalei sita, kaseian le sisaggangi sita? 32Nia sitaikiliu Togania, tapoi aibuluake le nia punu tubuta sangamberita, malangan pa ta ipanguruatnake sangamberinia bagei leu ka sita? 33Kasei te masipangangandu sipilit taikamanua? Taikamanua le poi sisineseatnake sia. 34Kasei te masioorakngake ukum? Kristus Yesus le, simamatei, sitususuru pei bagei, sipukukuddu kai kattoet Taikamanua, sipasititiddouake sita leu. 35Kasei te masipasasaraake sita ka nuntut bagat Kristus? Paoreat ele gejat baga ele pangukurat, ele pulajeat ele pugebakat, ele kalotoakenen, ele lanjau? 36Kele sitususurat: "Kalulut ekeu ramateiake kai sanganantat gogoi; kean le biribiri jajaket le raaddeake kai." 37Tapoi ka bagat sangamberinia nene mamanang le sita simakope kalulut nia sipununtuki sita baga. 38Amatoneman poi bagaku, kamateiat ele purimanuaiat, malaika ele sibara gege, sibabara kineneiget ele sibabara geti, ele apa pa simagege, 39sikuddu ka pata ele taikabaga, ele apa pa bagei, ta momoi ipasaraake sita ka nuntut bagat Taikamanua ka bagat Kristus Yesus Tuhanta.

will be added

X\