ROMA 7

1Ta pa nuagai kam sasaraina (aipoi ka sia siagai surukat le kupaninibo), sarat ka teteret ai pei le muririmanua sirimanua le ikukupkup nia surakat? 2Aipoi sinanalep sipusisimanteu, iappara nia surukat ka simanteunia ujut ai pei le muririmanua simanteunia. Tapoi ke amateian geti simanteunia bela nia ka surukat siappara nia ka simanteunia. 3Oto ke musimanteu nia ka simanteu bagei ai pei le muririmanua simanteunia, sipaeelet le nia tuoniake; tapoi ke amateian geti simanteunia bela nia ka surukat, taan sipaeelet nia, ke mutalimou nia ka simanteu bagei. 4Kisedda leu te kam sasaraina, amateian kam ka Surukat kalulut tubut Kristus, bule ibailiu kam bakkatnia, nia sisuruakenen ka simamatei, bule tapubua ka Taikamanua. 5Ka teteret ai pei le sita muririmanua ka bagat akkula, mugalai le pubotbonan jo ka bagat laddou tubuta sibaraakenen Surukat, sibuaake kamateiat. 6Tapoi kineneiget abelangan sita ka Surukat, aipoi amateian sita ka bagania sikabe sita siburu, ka enungan sibauan le siripot Ketsat tapupagugulet, taan kele siburu masitut siripot takat Surukat. 7Ke kise bai nia, kipangan le takukua? Jo le Surukat? Ta kisedda! Bailoknia, kalulut Surukat le agaitangan jo. Ta kuaagai aponia kiddi baga, ke ta Surukat masikua: "Bui imakiddi bagam!" 8Tapoi ka bagat Surukat, jo masitutuake sene ngamata pubotbonan ka bagat tubuku; aipoi ta bai anai Surukat, matei le jo. 9Siburu taipususurukat akupurimanua. Tapoi kele aioi Surukat, purimanuanangan ka sia jo, 10aku geti matei. Toila aimatoila kaku, nenda Surukat siripokatnia sipasikakau ka purimanuaiat, bailiu sipasikakau ka kamateiatnan le. 11Aipoi ka bagat Surukat, oinangan ipataju aku jo samba kalulut Surukat mateiakenangan aku. 12Oto sipunenan le Surukat, parenta leu sipunenan, maroipo samba maeru. 13Ke kise bai nia, simaeru nene bailiu kamateiat le kaku? Ta kisedda! Tapoi bule imatoila pujojonia, pakeinangan simaeru nene jo masibaraake kamateiat kaku, bule kalulut parentat Taikamanua, memei matotoila galai tubunia bulat jo le nia. 14Ataagaian poi, Surukat puketsanan le; aku sipuaakkula le, atusakiakean ka kupkumen jo. 15Apa poi sigalaiku, ta kuagai. Aipoi ta siobaku nenda akugalai, kasitsitnakenenku le ia te akugalai. 16Ke sitaioobaketku kugalai, kuseseake maeru le Surukat. 17Oto taan aku amasigalaiake, jo sikuddu ka tubuku le amasigalaiake. 18Kuagai poi, ta anai ka tubuku, tibonannia ka bagat pusisirimanuangku, ta anai beri sara simaeru. Puooba ka simaeru geti ai, tapoi masigalaiake ta anai. 19Aipoi ta siobaku, ia te simaeru, kugagalai, sitaioobaketku le, ia te sikatai, kugagalai. 20Oto ke sitaioobaketku le kugalai, taan aku masigagalaiake nia, jo sikuddu ka tubuku le masigagalaiake. 21Oto sesekungan kele sibailiu aturan: Ke kukiddi masigalai simaeru, sarat sikatai le muoottou kaku. 22Ka bagat paatuatku geti kuoba Surukat Taikamanua, 23tapoi ka bagat laddou tubuku kuitco surukat bagei sipasasaggak ka surukat sikuddu ka paatuatku, bailiu aku kabeket surukat jo sikuddu ka bagat laddou tubuku. 24Apangan te aku sirimanua sikatai uktuk! Kaseian le masibebelaake aku ka tubu simamateiet nene? 25Sura le ka Taikamanua kalulut Yesus Kristus Tuhanta! 26Oto ka paatuatku geti kurereddet Surukat Taikamanua, tapoi ka bagat akkulaku geti surukat jo le kurereddet.

will be added

X\