ROMA 6

1Oto apangan le kuanenta? Mujongan le tagagalai bule iurau kiliu baga? 2Ta kisedda! Sita simamatei ka jo, muririmanua pei le pa sita ka bagania? 3Ele ta pa nuagai kam, sangamberi siturarau ka bagat Kristus Yesus, ka bagat kamateiatnia le ataturau? 4Oto aturateiakean sita pasamba nia ka pasiraukat ka bagat kamateiat, bule kele katususurut Kristus ka simamatei kalulut pulatsanan Ukkui, kisedda leu te tapurimanua ka bagat puririmanua sibau. 5Aipoi ke aibailiuan sita sara ka bagat pukerekat kamateiatnia, bailiu leu et sita sara ka bagat katusuruatnia. 6Taagai poi pusirimanuatta siburu atusiliktengaakean pasamba Kristus, bule imalose tubuta simajo, buian tapupaguguletnake minca tubuta ka jo. 7Aipoi sia simamatei, abelangan sia ka geget jo. 8Oto ke amateian sita pasamba Kristus, matonem bagata, muririmanua leu sita pasamba nia. 9Taagai poi, Kristus lepa aitusuru ka simamatei, taan amatei nia minca; taan aipaneinei nia kamateiat. 10Kamateiatnia poi ia te matei masibairat jo, sangaminca le teret buruburu; samba puririmanuania ia te murimanua ka Taikamanua. 11Kise te ka kam nuaddeake kam tubumui amateian kam ka jo, tapoi murimanua kam ka Taikamanua ka bagat Kristus Yesus. 12Oto buian nuobaake kam tubumui simamateiet nene ipaneinei nia jo masireddet pubotbonannia. 13Samba buian nusegeake kam laddou tubumui ka jo, ibailiu nia pamatei pukataikat, ka Taikamanua le segeake kam tubumui simamatei siburu, kineneiget amurimanuangan. Samba segeake kam laddou tubumui ka Taikamanua, ibailiu nia pamatei puroipoat. 14Taan poi ipaneneinei kam jo, aipoi taan anai kam ka kupkumen Surukat, aian le kam ka kupkumen kiliu bagat Taikamanua. 15Oto kipangan le? Mujongan le tagagalai kalulut taan anai sita ka kupkumen Surukat, tapoi ka kupkumen kiliu bagangan le? Ta kisedda! 16Ta nuagai kam, ka tubut kasei nusegeake kam tubumui ibailiu pagugulet masireddet nia, aibailiuan kam paguguletnia reddenenmui, ele ka jo sikau kam ka pulangokat, ele ka purereddet sikau kam ka puroipoat. 17Tapoi sura le ka Taikamanua! Siburu pagugulet jo tedda kam, tapoi kineneiget anureddetnan kam nganturat sinegeakenen ka kam sibara ka sangalio paatuatmui. 18Atubelaakean kam ka jo, aibailiuan kam pagugulet puroipoat. 19Ka pasikat pupagugulenan le kutiboi nene ka kam kalulut magulai pei le tubumui. Kele sesegeakemui laddou tubumui bailiu pagugulet pulolinan samba pukataikat sikau kam mukatai, kau kisedda leu kineneiget nusegeake kam laddou tubumui bailiu pagugulet puroipoat sikau kam bailiu sipunenan. 20Aipoi ka teteret pagugulet jo pei le kam, abelangan kam ka puroipoat. 21Buat apa anusilo kam sedda? Sangamberinia nene sikau kam maila kineneiget, aipoi kalepakat sangamberinia nene ia te kamateiat. 22Tapoi kineneiget, kele aitubelaake kam ka jo, samba aibailiu kam pagugulet Taikamanua, bara buamui sikau kam bailiu sipunenan samba kalepakatnia ia te purimanuaiat sitaitatata. 23Aipoi upat jo ia te kamateiat, panguruat Taikamanua geti ia te purimanuaiat sitaitatata ka bagat Kristus Yesus, Tuhanta.

will be added

X\