ROMA 5

1Oto atuparoipongan poi sita ka enungan tonem baga, apaabanan sita ka Taikamanua kalulut Tuhanta, Yesus Kristus. 2Kalulut tonem bagata ka Yesus leu momoian tananam kiliu bagat Taikamanua; ka bagat kiliu baga nene te tapurimanua kineneiget. Oto maangka bagata ka bagat pukakaronan masisilo pulatsanan Taikamanua. 3Tapoi ta sarat nenda, ka bagat gejat baga leu maangka bagata, taagai poi gejat baga nene ibaraake om baga, 4samba om baga ibaraake soppi samba soppi ibaraake pukakaronan. 5Samba pukakaronan ta ipabubuji baga, aipoi nuntut bagat Taikamanua atuurungan ka paatuatta kalulut Ketsat Sipunenan sipanguruatnakenen ka sita. 6Aipoi ka teteret ai sita mulululuk, sedda te aimatei Kristus punu tubuta sijo ka tetere siteuakenen Taikamanua. 7Beringan punu tubut sirimanua simaroipo, ta malabbei ramatei sirimanua; tapoi punu tubut sirimanua simatopit ai leu simaeme matei. 8Tapoi Taikamanua aipatoilaan nuntut bagania ka sita, aipoi ka teteret ai pei le sita mujojo, amateian Kristus punu tubuta. 9Sara pei kineneiget atuparoipongan sita kalulut logaunia, bulatnia maarauan sita ka golut Taikamanua. 10Aipoi ke ka teteret saggak pei le sita apaabanan sita ka Taikamanua kalulut kamateiat Togania, sara pei kineneiget sita siabanakenennia, bulat iaarauake kalulut purimanuaiat Kristus. 11Ta sarat nenda. Sara pei tapuangka baga ka Taikamanua kalulut Yesus Kristus, Tuhanta, kalulut nia le poi atasilo kam paabanan. 12Kele kipa aituguru jo ka polak nene kalulut sara sirimanua samba kamateiat kalulut jo, kisedda te aipuaili kamateiat ka sangamberi sirimanua, sangamberidangan poi amasigalaiake jo. 13Aipoi enan tapei anai Surukat, aian jo ka polak. Tapoi ta tuaddeake jo ke ta anai Surukat. 14Kenanen kisedda amurimatangan kamateiat barania ka teteret Adam aili ka teteret Mose samba leu ka sia sitaigalaiake jo simakere kele sigalaiakenen Adam. Adam ia te tularat tubut siooi geti. 15Tapoi kiliu bagat Taikamanua ta makere ka pasisasabau Adam. Aipoi ke kalulut pasisasabau sara sirimanua, bailiu sangamberi sirimanua matei, sara pei beunannia kiliu bagat Taikamanua samba panguruatnia, siuruakenennia ka sangamberi sirimanua kalulut sara sirimanua, ia te Yesus Kristus. 16Samba panguruat ta leu makere nia ka jot sara sirimanua. Aipoi pasiukuman ka sara pasisasabau ia te ukum pulangokat, tapoi panguruat kiliu baga ka igit pasisasabau ia te sikau ka katuroipoat. 17Ke kalulut jot sara sirimanua, puritmatanangan kamateiat kalulut sara sirimanua, sara pei ramaroipo sia sipasisilo kiliu baga sitaimagulai samba panguruat puroipoat bulat muririmanua samba muririmata sia kalulut sara sirimanua, ia te Yesus Kristus. 18Oto kele kalulut sara pasisasabau, sangamberi sirimanua iorak ukuman, kisedda leu te kalulut sara galajet puroipoat sangamberi sirimanua masisilo puroipoat rapurimanua. 19Kele leu kalulut taimareddet sara sirimanua sangamberi sirimanua bailiu sijo, kisedda leu et kalulut reddet sara sirimanua, sangamberi bailiu simaroipo. 20Tuppai minca guru Surukat, bule memei iurau igit pasisasabau; tapoi kaipa iurau jo, memei mabura leu et kiliu baga, 21bule kele ipurimata jo ka bagat kamateiat, kisedda leu ipurimata kiliu baga kalulut puroipoat sieei ka purimanuaiat sitaitatata, kalulut Yesus Kristus, Tuhanta.

will be added

X\