ROMA 2

1Kalulut nene taan momoi nubela, ale sirimanua sipasiuukum sabagei, kenanen kasei pa ekeu. Aipoi ka pasiuukumnu sabagei, tubum le anuukumake, kalulut ekeu sipasiuukum sabagei, masigagalaiake leu kele sigalaira. 2Tapoi taagai kam, ukuman Taikamanua ka tubuda sipasigagalaiake kele nene, maroipo le. 3Oto ekeu, ale sirimanua, sipasiuukum sabagei sigalaiake kele nene, tapoi beri ekeu leu masigagalaiake, ka bagam pa bebela ekeu ka ukuman Taikamanua? 4Ele nupuaarak le pa beunan anggai bagania, erut bagania samba om bagania? Ta nuagai, anggai bagat Taikamanua nene ia te masipalulu ekeu ka katubaugat paatuat? 5Tapoi kalulut kelat paatuatnu samba taiobanu masibau paatuat, anururuakean te ka tubum golu, ka gogoi pasitoilakat golu samba ukuman Taikamanua simaroipo. 6Aipoi isisiliake le Taikamanua ka senen sirimanua siripot sigalaira; 7ia te purimanuaiat sitaitatata ka sia simaom baga masigalai simaeru, masigaba pulatsanan, pubeunanan samba sitaimasusuet. 8Tapoi ka sia sigaba puuktungan tubu, sitaireddet pubulanan, tapoi situtnake sikatai, golu samba ukuman Taikamanua le rasisilo. 9Paoreat samba gejat baga le oringenda senen sirimanua sigalai sikatai, boiki tai Yahudi, samba leu bangsa bagei. 10Tapoi pulatsanan, pubeunanan samba aban le siloketda sangamberi sirimanua sigalai simaeru, boiki tai Yahudi, samba leu bangsa bagei. 11Aipoi ta irarasei sirimanua Taikamanua. 12Sia sigalai jo taipususurukat, malimai le sia ka taipususurukat; samba sia sigalai jo ka kupkumen Surukat, iukum sia Surukat. 13Aipoi ta sipasiaarep Surukat simaroipo ka matat Taikamanua, sipasigagalaiake Surukat le iparoroipo. 14Ke bangsa bagei sitaipususurukat masigalaiake ka teu bagada siniboi Surukat, kenanen ta anai ka sia Surukat, tubudangan te aibailiu Surukat ka sia. 15Ka bagat nene poi rapakoinong katususuratnia bagat Surukat ka paatuatda, samba bagai bagada leu masimunengake, samba paatuatda kau masinganduake, kau masisakkeri. 16Sangamberinia nene matotoila geti ka gogoi sialu, ka teteret iukumake Taikamanua simalipput ka paatuat sirimanua kalulut Yesus Kristus, siripot Katuareman Simaeru sinegeakenenku. 17Nuoniake tubum Yahudi samba mukaronan ka Surukat, samba masiatsiake Taikamanua; 18samba nuagai siobania, samba kalulut pasigegelai ka bagat Surukat nuagai kipa bulat simaeru; 19samba amaroan bagam sipalulu simapeset ekeu samba panoroi ka sikuddu ka gepgep, 20sipanganturu simagulai paatuat, sipasigegelaiake sibau tubu. Aipoi ka bagat Surukat amaroan bagam ibara kekeu sene ngamata puaagai samba pubulanan. 21Oto ekeu sipanganturu sabagei, ta koi nupanganganturu tubum? Ekeu sipasingangantomanake, "Bui nupanangkou," tapoi manangkou le ekeu kekeu? 22Ekeu sipasikukua, "Bui nupaelet," paeelet koi ekeu? Masitsit ekeu ka buluat, nuraraurau kodda lalep pasibuluat? 23Nuatsiake Surukat, lepa nupaloloi koi Taikamanua ka pasisasabau Surukat? 24Kele sitususurat ka Surat Sipunenan, "Kalulut kam, tupaloloi onin Taikamanua ka talagat bangsa bagei." 25Sunat ai leu uktuknia ke nutut Surukat. Tapoi ke nupasabau geti Surukat, bailiu kele taipususunatnan le ekeu. 26Oto ke sia bangsa bagei sitaipususunat masireddet ngangan Surukat, ta pa atuaddekean makere kele sipususunat? 27Ke kise bai nia, sia sitaipususunat, tapoi ragalaiake siripot Surukat, siangan le masiuukum kam, kam sibara ukum sitususurat samba sipususunat, tapoi nupasabau kam Surukat. 28Aipoi oniakenen bulat Yahudi, ta Yahudi ka oni, samba oniakenen bulat sunat, ta sunat simatotoila ka akkula. 29Tapoi Yahudi sipulelelek ia te sipupaatuat Yahudi samba sunat sipulelelek ia te sunat paatuat sibaraakenen Ketsat Taikamanua, ta sibara ka aturan sinurat. Katuumunnia sibara ka Taikamanua le, ta sibara ka sirimanua.

will be added

X\