ROMA 16

1Kusegeake ka kam maniuta si Febe, sipasirorom ka paamian Kengkrea, 2bule nusilo kam nia ka bagat Tuhan, kipa simateu ka sia sipunenan, samba romake kam nia ke itiddou apa pa paromanmui. Aipoi nia ka sia maigingan sirimanua airomake samba aku leu. 3Segeake kam salamku kai Priska samba Akwila, alei pagalaiakenenku ka bagat Kristus Yesus. 4Arabuluakean poi enganda punu tubuku. Ta sarat aku musura baga ka tubuda, tapoi samba sapaamian sibara ka bangsa bagei. 5Salam leu ka paamian sikuddu ka lalepda. Salam kai Epenetus, saraina kilibet bagaku, bua siboiki ka Kristus ka Asia. 6Salam kai Maria sipusasaggo tubu kalulut kam. 7Salam kai Andronikus samba Yunias, saaleiku sangamuntogat, samba aleiku tupenjaraake, simaeru katuareman le sia ka talagada tai apostel, samba sia le boiki amukristen kaku. 8Salam kai Ampliatus kilibet bagaku ka bagat Tuhan. 9Salam kai Urbanus, alei pagalaiakenenmai ka bagat Kristus, samba salam kai Stakhis, kilibet bagaku. 10Salam kai Apeles, siomake pasisiboat ka bagat Kristus. Salam ka sia sikuddu ka lalep Aristobulus. 11Salam kai Herodian, aleiku sangamuntogat. Salam ka sia sangamberi sikuddu ka lalep Narkisus, ka bagat Tuhan. 12Salam kai Trifena samba Trifosa, simomoake tubu mugalai kai Tuhan. Salam kai Persis, kilibet bagaku, simomoake tubunia mugalai kai Tuhan. 13Salam kai Rufus, sipili ka bagat Tuhan, samba salam ka inania samba inangku leu kaku. 14Salam kai Asinkritus, Flegon, Hermes, Patrobas, Hermes samba sangamberi sasaraina sipaalei sia. 15Salam kai Filologus samba Yulia, Nereus samba maniunia, samba Olimpas, samba leu ka sangamberi sipunenan sipaalei sia. 16Pasalam kam pasasambamui ka bagat pasiggungan sipunenan. Salam ka kam sibara ka sangamberi paamian Kristus. 17Tapoi kutiddou simakope ka kam sasaraina, bule nupasikeli kam tubumui ka tubuda sibaraake pasaraat samba kabelekat baga sipasasaggak ka nganturat sigelaimui. Kau nuareuake kam tubumui ka tubuda! 18Aipoi sirimanua kele nene ta Kristus Tuhanta rapuuku, balugura le. Samba kalulut tiboietda simananam samba paalakat baga rapataju sirimanua simalina paatuat. 19Aipoi amaarepman reddetmui ka sangamberi sirimanua. Ia te imaangka bagaku pagalaiat kam. Kubesiake le numasiku kam paatuat ka simaeru, tapoi malina ka sikatai. 20Bule Taikamanua bakkat paabanan maruei ikau si Setan nupaperaki kam nia. Kiliu bagat Tuhanta Yesus masipaalei kam. 21Salam ka kam sibara kai Timoteus, alei pagalaiakenenku, samba sibara kai Lukius, Yason samba Sosipater, saaleiku sangamuntogat. 22Salam ka bagat Tuhanta ka kam sibara kaku Tertius, sipasisusuratnake surat nene. 23Salam ka kam sibara kai Gayus, sipasirarauma aku samba sapaamian ka lalepnia. Salam ka kam sibara kai Erastus, bendahara kota, samba sibara kai Kwartus, sarainanta. [ 24Kiliu bagat Tuhanta Yesus Kristus, masipaalei kam sangamberimui! Amen.] 25Pulatsanan le ka Taikamanua, simagege masironake kam siripot Katuareman Simaeru singantomanakenenku samba katuareman pagalaiat Yesus Kristus, siripot pasitoilakat pakeleat simeng-mengakenen piga ngotu ngarura pa ujunia; 26tapoi kineneiget atupatoilaan samba siripot parentat Taikamanua sitaitatata, aisegeakean bukoda tai nabi ka sangamberi bangsa, masipalulu sia rareddet mutonem baga. 27Sarat ka tubunia le Taikamanua simasun sikut paatuat, kalulut Yesus Kristus; pulatsanan teret buruburu! Amen.

will be added

X\