ROMA 15

1Sita simaron tonem baga, kau tabairat kam pugulaiatda simagulai tonem baga, bui sarat tubuta tapasikeli. 2Senenta kau tapasanang kam saaleita katuerukatda masikau imaron tonem bagada. 3Beri Kristus leu ta aigaba pusanangan tubunia, tapoi kele sitususurat, "Paloloiatda, siloloiakenenda ka tubum, aisappoan aku." 4Aipoi sangamberi sitususurat siburu, sibailiu nganturat ka sita le aitusurat, bule kalulut om baga samba pusuibiat sibara ka Surat Sipunenan bara ka sita pukakaronan. 5Bule Taikamanua bakkat puoman baga samba pusubiat, masipanguruatnake ka kam pusaraat paatuat pasasambamui, siripot obaket Kristus Yesus, 6bule ka pusaraat paatuat samba sara nganga kam masilatsanake Taikamnua, Ukkui Tuhanta Yesus Kristus. 7Oto paletsai kam pasasambamui, kele Kristus leu aisiloan sita, katulatsanan Taikamnua. 8Nene le kukua ka matamui, kalulut pubulanan Taikamanua, Kristus aibailiuan sipuku sipususunat masiriuriuake palelengan ka taikebbukatta, 9samba ioi ka sabangsa bagei ralatsatnake Taikamanua kalulut katet bagania kele sitususurat ka Surat Sipunenan, "Ia te lulunia kuumunake ekeu ka talagada bangsa bagei, samba kuuraiake urai pasiumun masiumun onim." 10Samba ikua minca, "Pugora kam baga kam tai bangsa, sambamui bangsat Taikamanua." 11Samba minca, "Umun kam si Tuhan, kam sangamberi bangsa, samba sangamberi muntogat bangsa masiumun nia." 12Samba ikua minca si Yesaya, "Bebela te geti ungat Isai, tususuru nia masipaneinei tai bangsa, samba ka tubunangan le rapukakaronan tai bangsa." 13Bule Taikamanua bakkat pukakaronan, masisutnake ka paatuatmui angkat baga samba aban ka bagat tonem bagamui, bule kalulut ron Ketsat Sipunenan memei iuurau pukakaronanmui. 14Kam sasarainangku, maro bagaku asutnan simaeru ka kam, asutnan puaagaimui, samba momoian nupanganturu kam pasasambamui. 15Kenanen kisedda, kalulut kiliu baga sipanguruatnakenen Taikamanua kaku, maeme pei le aku masisuratnake goiso ka kam, kele masiparepdep kam, 16ia te babailiuna aku pagugulet Kristus Yesus ka sabangsa bagei, masipasikeli Katuareman Simaeru sibara ka Taikamanua, bule sia sabangsa bagei bailiu buluakenen siloket Taikamanua, silinaakenen Ketsat Sipunenan. 17Oto ka bagat Kristus Yesus momoian kuumunake tubuku ka pagalaiat sigalaiku ka Taikamanua. 18Aipoi ta maeme aku masitiboi apa pa bagei, sarat sigalai Kristus ka tubuku le, ia te papakeina aku masinana sabangsa bagei ka purereddet, ka tiboiet samba ka galajet, 19sironakenen kerek samba kiseiet samba geget Ketsat Sipunenan. Kisedda te barania ka Yerusalem samba sangariringannia pat aili ka Ilirikum akupaarepman sangamuinenia Katuareman Simaeru pagalaiat Kristus. 20Ka bagat masipaarep Katuareman Simaeru akubesiakean masisegeake nia ka kudduat sitapei atupaarep onin Kristus, bui kurioake apa apa ka bongen sigalakngakenenda sabagei, 21tapoi siripot sitususurat ka Surat Sipunenan le, "Sia, sitaipasisisilo pei le katuareman pagalaiat nia, raiitco nia; samba sia, sitaipasiaarep, raagai geti." 22Ia te lulunia isasaila aku moi masibalou kam. 23Tapoi kineneiget taan poi anai kudduat pugalajatku ka tobbou nene, samba piga ngarurangan pa akubesiake masibalou kam, 24kukaroni ka puenungananku mei ka Spanyol, momoi kutusappai paaili ka kam, samba kam le masitaroake aku sedda, lepa kusegeake bagaku goiso masiitco kam. 25Kineneiget, ai le aku memei ka Yerusalem masitaroake panguruat ka sia sipunenan. 26Arateuakean poi paamian ka Makedonia samba Akhaya masikau paroman ka sia simageba ka talagada sipunenan ka Yerusalem. 27Sibara ka paatuatda le arateuake nia, tapoi utakda leu. Aipoi ke amueneuan sia sabangsa bagei ka bibilet puketsananda tai yahudi, mateu leu sia sabangsa bagei masirom tai Yahudi ka bibilet putubuatda. 28Alepaan geti kupasikeli nene, samba akusegeakean ka sia buat panguruatda sabangsa bagei, ei aku ka Spanyol baraku ka kam. 29Samba kuagai, ke moi aku masibalou kam, sun panukanan Kristus le ooiku. 30Tapoi kutiddou ka kam sasaraina, kalulut Tuhanta Yesus Kristus samba kalulut nuntut bagat Ketsat, nuromake kam aku ka bagat pasaggangan ka bagat masitiddouake aku ka Taikamanua, 31bule kubela ka kabeira sitaimatonem baga ka Yudea, samba pasikelatku ka Yerusalem rasilo sipulelelek sia sipunenan sedda, 32bule ka angkat baga kuoi ka kam ka teu bagat Taikamanua, mugora baga sambata. 33Bule Taikamanua bakkat paabanan masipaalei kam sangamberimui! Amen.

will be added

X\