ROMA 12

1Oto kutiddou ka kam sasaraina ka nuntut bagat Taikamanua, bule nubuluake kam tubumui kele buluakenen sipuririmanua, sipunenan samba obaket Taikamanua. Nenda te pususurumui sipulelek. 2Bui numakere kam ka taikapolak nene, tapoi kau isili galai tubumui kalulut katubabau paraboatmui, bule ioi nupabaggei kam kipa obaket Taikamanua: apa simaeru, simateu ka Taikamanua samba simasun eru. 3Siripot kiliu bagat Taikamanua siniloku, kukua ka senemui: Bui makope nubuakngake kam tubumui saliu ka siripokatnia. ka epet paatuat le paatu kam tubumui; senemui masipaatu siripot beunan tonem baga, sipanguruatnakenen Taikamanua ka kam. 4Aipoi kele ka tubuta maigi laddou, tapoi ta makere galajetda senen laddou tubu. 5Kisedda leu te sita, kenanen maigi sita, sara tubu le ka bagat Kristus; sita senenta geti laddou le sita pasasambata. 6Kisedda te tabakkati kam panguruat sitaimakere siripot anggai bagat Taikamanua sipanguruatnakenennia ka sita: Ke panguruat mungantoman bai, kau itugalaiake siripot tonem baga. 7Ke panguruat mupasikelat, kau tapasikeli nia; ke panguruat masigelaiake, kau tapasigelaiake; 8ke panguruat masipanganturu bai, kau tapasinganturu. Kasei siparubei apa pa, kau le igalaiake nia ka linat paatuat; kasei sipasiuuteake, kau le igalaiake nia ka ngamang; kasei sipakoinong anggai, kau le igalaiake nia ka angkat baga. 9Bui patajuat punununtut baga! Kasitsitnake le kam sikatai, puottot kam ka simaeru. 10Kau nupanuntu kam baga pasasambamui samba paruei kam masikau paroroiat. 11Bui ipagulai ngamangmui, kau ipujuluu ketsatmui samba puuku kam si Tuhan. 12Pugora kam baga ka pukakaronan, muom baga ka bagat pugejaat baga, kau mariuriu paninindoumui. 13Rom kam masikau simagulai ka sia sipunenan samba besiake kam masirauma. 14Sukatnake kam sia sikukuru kam, sukatnake kam, ba patetelei kam sia. 15Puangka kam baga pasamba sipuaangka baga, pusou kam pasamba sipusosou. 16Kau sikere paatuat kam pasasambamui; ba bebesiake kam buak, pakereake le kam tubumui ka simaepe. Ba addeake kam tubumui simaagai. 17Ba sisiliake kam sikatai silit sikatai; simaeru le galaiake kam ka sangamberi sirimanua. 18Ke momoi, teret siooi, paaban kam ka sangamberi sirimanua. 19Sasaraina kilibet baga, bui tubumui masilumun, tapoi kau le kam oggak ka golut Taikamanua, atusuratnakean poi ka Surat Sipunenan, "Aku le sibakkat pasilumunan, aku le masilulumunake," ngangan Tuhan. 20Tapoi ke malaje saggaknu, kau kannia, ke maoggou nia, kau lonia. Ke kisedda nugalai, anukauan nia maila. 21Bui ikalaake kam sikatai, kalaake le kam sikatai ka pasigagalaiakemui simaeru.

will be added

X\