ROMA 11

1Oto kunounou: Airibbaiakean pa bangasania Taikamanua? Ta kisedda! Aipoi aku leu tai Israel, punuteteu Abraham, ka muntogat Benyamin. 2Ta airibbaiake Taikamanua bangsania sipilinia. Ele ta nuagai kam sikuat Surat Sipunenan pagalaiat si Elia ka teteret ainganduake tai Israel ka Taikamanua: 3"Tuhan, sangamberi nabim aramateiakean, pasibuluatnu araragatnakean; sarakungan le amulegei samba ai leu rabebesiake ramateiake aku." 4Tapoi kipa aikua Taikamanua ka tubunia? "Akukeleiakean kaku pitu ribu sirimanua sitaipurerekkuk ka sabulungan Baal." 5Kisedda leu kineneiget ai pei le sipulelegei, siripot pamiliat kiliu bagat Taikamanua. 6Tapoi ke sibara ka kiliu baga, oto taan sibara ka galajet, aipoi ke ta kisedda, kiliu baga nene taan kiliu baga. 7Oto kipangan le? Tai Israel ta arasese gabaietda, tapoi sia sipili le amasisese. Sabagei geti amakela le paatuatda, 8kele sitususurat, "Aikauan Taikamanua ka sia ketsat mulaulau, mata sitaipasiitco samba talinga sitaipasiaarep, teret gogoi kineneiget." 9Samba si David masikua, "Kau ibailiu punenda bailiu sesere samba papakpak, kabelekat samba pasilumunan ka sia. 10Samba kau imagepgep matada, buian imaitco, samba teiteira nukau sarat mukoukou." 11Oto kunounou: Katusosoksokda tai Yahudi nene bule rabele pa? Ta kisedda! Tapoi kalulut pasisasabaura, bailiu puaragat ka bangsa bagei, sikau sia mututu baga. 12Aipoi ke kalulut pasisasabaura bailiu puuktungan ka taikapolak, samba kagulaiatda bailiu puuktungan ka bangsa bagei, sara pei beunan puuktungan ke ta anai simagulai ka tubuda. 13Ka kam leu sibara ka bangsa bagei kukua ka matamui, kalulut apostel ka bangsa bagei poi aku, bulat kuaddeake le pulatsanan gaalajetku, 14ia te kepei moi kukau ramatutu baga sabangsaku siripot pusirimanuaat samba momoi kuarauake piga pa ka talagada. 15Aipoi ke kalulut katuribbaiatda bailiu paerukat ka taikapolak, sara pei katusilokatda, taan pa ibabailiu ke katusuruat ka simamatei? 16Ke roti siboiki aibailiuan sipunenan, sangatatappania leu bailiu sipunenan; samba ke ungat aibailiuan sipunenan, rannia leu bailiu sipunenan. 17Ke atugetaian piga pa ran ka loinat zaitun -- ia te tai Yahudi samba kam sibara ka bangsa bagei kele sinula ka loina bagei tutappoloake ka sigetaiat samba masipuuktungi sibara ka ungat loinat zaitun simaigi ekket, 18bui nuumunake kam tubumui nupabele kam ran nenda! Ke nuumunake kam tubumui, repdep kam, ta kam masibabairat ungat nenda, ungat le sibairat kam. 19Ele nukua pa kam: ai ran situgegetai, bule tutappoloake aku ke sigetaiat. 20Aisesengan! Aitugetai tedda sia kalulut taimatonem bagada, samba kam tuottot kalulut tonem baga. Bui nubuakngake kam paatuatmui, kau le numaloto kam! 21Aipoi ke ran bulat ran ta iinou Taikamanua, kam leu, ta leu et iinou. 22Oto repdep kam erut bagat Taikamanua samba leu golunia, ia te golunia ka tubuda sibebele, tapoi ka kam geti erut bagania, ke bai mariuriu kam ka erut bagania. Ke ta, kam leu igegetai leu et. 23Tapoi sia leu, ke araariakean mutaimatonem baga, tutatappoloake leu sia minca, magege le poi Taikamanua masitappoloake sia minca. 24Aipoi beringan kam ran singgiri ka loina bagei samba ta makere pagalaiat tubumui atutappoloakean ka loinat zaitun sipulelek, sara pei sia nene, kirenangan poi sedda kabaraiatda tutappoloake sia ka loinat zaitun, loina kabaraiatda. 25Aipoi sasaraina, bule ta nuaddeake kam tubumui simaagai, koba le bule nuagai kam pakeleat nene: Sangarubeiat ka tai ISrael amakelaan paatuatda teret sun igida bangsa bagei tuguru. 26Kisedda te enungannia ituarauake sangalio Israel, kele sitususurat ka Surat Sipunenan: "Momoi le Sipanebui sibara ka Sion, areuakenangan leu sangamberi pukakatai kai Yakob. 27Samba nene le pakerekat bagaku ka sia, ka teteret kuposa joda." 28Siripot Katuareman Simaeru saggak Taikamanua le sia kalulut kam, tapoi siripot pamiliat, kilibet bagat Taikamanua le sia kalulut taikebbukatda. 29Aipoi ta ioolei bagania Taikamanua ka panguruatnia samba pasogaiatnia. 30Kele kam siburu taimareddet le kam ka Taikamanua, tapoi kineneiget aipukatekingan kam baga kalulut taimareddetda. 31Kisedda leu sia, kineneiget ta mareddet, bule kalulut katet baga sinilomui, sia leu ipukateki baga Taikamanua. 32Ailuplupmakean poi sia Taikamanua sangamberida ka bagat taimareddetda bule ipatoila katet bagania ka tubuda sangamberida. 33Apate kerunia pukayoat, sikut paatuat samba puaagai Taikamanua! Bulat ta momoi tukerui ukumannia samba bulat ta momoi tusinogi enungannia! 34"Kasei poi siagai paatuat Tuhan? Ele kasei amasipanganturu nia? 35Ele kasei amasikau apa pa ka tubunia, bule ikau silinia?" 36Aipoi sangamberinia sibara ka sia le, samba kalulut nia, samba sege ka tubunia. Ka tubunia le pluatsanan teret buruburu!

will be added

X\