ROMA 1

1Sibara kai Paulus, pagugulet Yesus Kristus, sinogai bailiu apostel samba sisaraakenen masipaarep Katuareman Simaeru sibara ka Taikamanua. 2Katuareman Simaeru ia te pinalelek Taikamanua siburu pei le ka tai nabinia ka Surat Sipunenan, 3pagalaiat Togania, Tuhanta Yesus Kristus. Siripot pusirimanuaat mututu mata ka muntogat David, 4samba siripot putaikamanuaat sipunenan Togat Taikamanua le nia sipulugege, simakokoinong ka katususurunia ka simamatei. 5Kalulut nia leu akusilo kai kiliu baga samba puaapostel, masipalulu sangamberi bangsa mureddet ka oninia. 6Kam leu ai kam ka bagat addeatda sinogai Yesus Kristus. 7Kukoiniake surat nene ka kam sangamberimui sikuddu ka Roma, kilibet bagat Taikamanua, sinogai bailiu sipunenan: Kiliu baga ka kam samba aban sibara ka Taikamanua Ukkuita samba sibara kai Tuhan Yesus Kristus masipaalei kam. 8Muboiki kukua sura ka Taikamanuangku kalulut Yesus Kristus kalulut kam sangamberimui, aipoi amaarepman ka sangalio polak pagalaiat tonem bagamui. 9Aipoi Taikamanua le, sireddetku ka sangamuinet paatuatku ka bagat masipaarep Katuareman Simaeru pagalaiat Togania, ia te simunengake taipuaarinia kurepdep kam senen panindogatku; 10kutiddou bule ka teu bagat Taikamanua bara kaku oggak ioi kubalou kam. 11Marepdepman bagaku masiitco kam, bule ioi kuake ka kam panguruat puketsanan masironake kam. 12Tibonannia, bule tapasuibi kam pasasambata ka bagat tonem bagata, tonem bagamui samba tonem bagaku. 13Bule nuagai kam nia sasaraina, mareireian akukiddi moi masibalou kam -- tapoi teret kineneiget sarat ai le sailania -- bule kusilo leu bua ka talagamui, keleu ka talagat bangsa bagei. 14Amuutakngan aku ka tai Grika samba ka bangsa bagei; ka simaagai paatuat samba ka sitaimaagai paatuat. 15Ia te kubebesiake masingantomanake Katuareman Simaeru ka kam leu sikuddu ka Roma. 16Bulat tonem le bagaku ka Katuareman Simaeru, nia le poi ron Taikamanua masiarauake senen simatonem baga, boiki tai Yahudi samba bangsa bagei leu. 17Aipoi ka bagat Katuareman Simaeru matoila kipa iparoipo sirimanu Taikamanua, ia te sibara ka tonem baga riuriu mutonem baga, kele sitususurat, "Simaroipo baga muririmanua sia kalulut tonem baga." 18Ipatotoila poi golunia Taikamanua sibara ka sorga ka sangamberi jo samba katai sirimanua, sipetpetnake pubulanan kalulut katai. 19Aipoi apa siooi raagai pagalaiat Taikamanua, matoila le ka sia; Taikamanua poi amasipatoila nia ka sia. 20Barania ka pasibaraat polak, sitaimaiitco ka pagalaiat tubunia, ia te gegenia sitaitatata samba putataikamanuania, momoi tuitco ka paatuat ka sangamberi sibaraakenen. Oto ta momoi rapakele taiagairania. 21Kenanen poi raagai Taikamanua, tapoi ta rasuru nia simateu ka Taikamanua, ele rasuraki nia. Bailoknia le, sarat si ta galai le rapaatu, samba paatuatda sitaiagai apa pa bailiu magepgep. 22Ka bagada simasiku paatuatnan sia, oto si ta anai siagai. 23Pulatsanan Taikamanua sitaitatata, rasili ka tularat simakere ka sirimanua simatataket, ka uma, ka tarimeu siepat rere ele ka leiti sipugugurui. 24Ia te lulunia aisegeake sia Taikamanua ka siobat bagada ka pulolinan, pat palolitrangan tubuda pasasambada. 25Pubulanan Taikamanua rasili ka boko, sibaraakenen le rapanindogi samba rasuru silit Sipasibabara, bulat umunakenen teret buruburu. Amen 26Kalulut nene segeakenangan sia Taikamanua ka pubotbonan kailaakenen. Aipoi tainanalepda rasili le patabbarat tubu sipasesese ka sitaipasesese. 27Kisedda leu taimanteu, taan ka tainanalepda ratabbaraake tubuda siripot sipasesese, ka pasasambada taimanteuan le ipujujuluu pubotbonanda, bailiu galairangan pakailaat pasasambada taimanteu. Kalulut nene silorangan ukuman ka tubuda siripot joda. 28Kalulut ta rabesiake masiagai Taikamanua, segeakenangan sia Taikamanua ka pupaatuanan sikatai, bailiu ragalaiake sitaimateu tugalaiake. 29Sun le ka paatuatda sangamberi pukoilunan, pukakatai, alau baga samba katai baga; sun sisit baga, pamamatei, pajoggolat, patajuat, lagat baga. Raoba masitiboi 30samba masipaloloi sabagei, sipulagaki baga Taikamanua, taiagai arat, simabuak paatuat, simaoddoi, maagai ka sikatai, sipuarak eppu; 31si ta paatuat, sipuarak palelengan, sitaiagai nuntut samba katet baga. 32Kenanen raagai ukum Taikamanua, ia te senen sigalaiake sangamberi nene, mateu le tuukum matei, tapoi ia leu et ragalaiake, samba ioba leu et bagada ragalaiake nia sabagei.

will be added

X\