PAMOILIANAN 6

1Ia geti itcokungan ibuka Togat Biribiri sara ka sipitu toggaiat nenda, samba kuarep sara ka talagat siepat sipuririmanua kele ngangan leleggu masikua, "Konan!" 2Lelek akulelekngake nia, itcokungan sara kuro simabulau, samba sikuddu ka uddutnia ai rourou ka kabeinia samba rakau ka tubunia kirit purimataat. Lepa tui nia ka bagat kamanangan, bule imamanang. 3Kele aibuka Togat Biribiri toggaiat sikarua, arepkungan sipuririmanua sikarua masikua, "Konan!" 4Lepa bela kuro bagei simabonan, samba sikuddu ka uddutnia atukauan gege masiala aban ka polak, rapamatei pasasambada, samba rakau ka tubunia lanjau sabeu. 5Kele aibuka Togat Biribiri toggaiat sikatelu, arepkungan sipuririmanua sikatelu masikua, "Konan!" Lelek akulelekngake nia, itcokungan sara kuro simapusu, samba sikuddu ka uddutnia ai ka kabeinia timbangan. 6Arepkungan kele ai nganga sipusosoga ka talagat siepat sipuririmanua masikua, "Sangaliter gandum sangaropia, samba telu liter padi sangaropia. Tapoi tula samba anggur ba pakakatai." 7Kele aibuka Togat Biribiri toggaiat sikaepat, arepkungan ngangan sipuririmanua sikaepat masikua, "Konan!" 8Lelek akulelekngake nia, itcokungan sara kuro simakamung, samba sikuddu ka uddutnia oninia Kamateiat, samba taikabaga masitut nia. Samba atukauan gege ka tubuda masimateiake saparepat polak nene ka lanjau, ka pulajeat, ka oringen samba ka tarimeu simasakbak ka polak. 9Kele aibuka Togat Biribiri toggaiat sikalima, itcokungan ka tei meja pasibuluat ketsatda simateiakenen kalulut tiboiet Taikamanua samba kalulut pasimunenganda. 10Pugereirangan sabeu nganga masikua, "Pigamoian le Tuhan Sipulugege, Sipunenan samba sibulatnia, nuukumake sia sikuddu ka polak nene, nulumunake sia lulut mamateiakera kai?" 11Lepa kaurangan ka senenda leppei simabulau, samba tukua ka matada rapuari goiso teret isun taddera aleira pagugulet samba sasarainanda mateiakenen pei le kele sia. 12Lepa itcokungan, ka teteret aibuka Togat Biribiri toggaiat sikaenem, bara ngeungeu polak sabeu, matat sulu bailiu mapusu kele jalot alai, samba laggo bailiu mabonan kele logau. 13Samba panyanyat ka manua belebele ka polak kele le ibeleake buania simata loinat sileu ka teteret iboroi nia rusa sabeu. 14Manua kurut kele buko situpupurut, tuotcanangan leleu samba nusa ka kudduatnia. 15Samba tai rimata ka polak samba siabeu tiboi tubu samba sautera tai tentera, samba simakayo samba sibara gege, samba sangamberi pagugulet ele sipuuja, sangamberida mulipput ka ngaliu samba lobok bulak ka leleu. 16Kuarangan ka leleu samba ka bulak, "Ibuakean ekeu nusaksak kai, labbu kai, bui iitco kai sikuddu ka uddenan purimataat samba bui iorak kai golut Togat Biribiri. 17Aipoi aiailingan gogoi sabeu pugolukatda, kasei te momoi masiomake nia?"

will be added

X\