PAMOILIANAN 5

1Ia geti itcokungan ka kabei sikattoet sikuddu ka uddenan purimataat nenda, sara buko sibara surat ka baga samba ka uddutnia samba sitoggaiji pitu toggaiat. 2Lepa itcokungan sara malaika simagege sipusosoga sabeu nganga masikua, "Kasei simateu masibuka buko nene samba masigolok toggaiatnia?" 3Tapoi ta anai beri sara ka sorga ele ka polak ele ka tei polak, siooi masibuka buko nenda ele siooi masiitco ka bagania. 4Pusoukungan leu et simakope kalulut ta anai beri sara simateu masibuka buko nenda ele masiitco ka bagania. 5Lepa kuanangan ka mataku sara ka talagada tai baja, "Ba pusosou! Itco, singa ka muntogat Yuda, ia te punuteteu David, amamanangan nia, nia te momoi masibuka buko nenda samba sipitu toggaiatnia." 6Lepa itcokungan ka talagat uddenan purimataat samba siepat sipuririmanua samba ka talagada tai baja, murio sara Togat Biribiri kele silepa jaja; ai pitu bannia, pitu matania: ia te sipitu Ketsat Taikamanua sikoiniakenen ka sangalio polak. 7Oi nia, alanangan nenda buko ka kabei sipukukuddu ka uddenan purimataat. 8Kele aiala buko nenda purapporangan siepat sipuririmanua samba sirua pulu epat tai baja ka matat Togat Biribiri. Senenda tai baja, ai ka kabeira kecapi samba pulokat mas, sibara kumanyang ka bagania: ia te panindogatda sirimanua sipunenan. 9Uraiakerangan urai sibau: "Mateuan ekeu masisilo buko nenda samba masigolok toggaiatnia; atujajaan poi ekeu, samba anukauan logaunu masitebui sia sibara ka senen muntogat samba nganga samba uma samba bangsa bailiu bakkat Taikamanua. 10Samba anubailiuakean sia sara purimataat imam masipuuku Taikamanuanta, samba bailiu sia masipaneinei polak nene." 11Lepa itcokungan samba arepkungan nganganda samalaika simigi sigoilik uddenan purimataat, sipuririmanua samba tai baja; sipuriribu samba sipujujuta igida, 12kuarangan sabeu nganga, "Mateuan Togat Biribiri simateiakenen masisilo gege, kayo, agai, ron, beunan, latsat samba katuumun!" 13Lepa arepkungan sangamberi sipuririmanua ka sorga, ka polak, ka tei polak, ka koat samba sangamberi sibabara ka bagania masikua, "Ka tubut sikuddu ka uddenan purimataat samba ka Togat Biribiri le katuumun, beunan, latsat samba gege teret buruburu!" 14Kuarangan siepat sipuririmanua, "Amen!" Samba sia tai baja rappo rapanindou.

will be added

X\