PAMOILIANAN 4

1Lepa nenda, itcokungan sara matatbaliu sitububuka ka sorga, samba nganga siarepku siburu manibo ka mataku kele ngangan pipiau, kuanangan, "Sakaiake ekeu sene, kupakoinong kekeu apa sibabara geti pasat nene." 2Sopsopnangan leu aku Ketsat. Lepa itcokungan sara uddenan purimataat ka sorga, samba ka uddenan nenda muuddet sara sirimanua. 3Nia sipuuddet nenda tuitco nia kele permata baiduri pandan samba permata delima; samba ai sara linu masibokko uddenan purimataat kele zamrud tuitco nia. 4Samba sibokko uddenan purimataat nenda ai rua pulu epat uddenan, ka uddenan nenda muuddet rua pulu epat tai baja sipuleleppei simabulau samba kirit mas ka utera. 5Samba ka uddenan purimataat nenda bela bila samba nganga sipugugururuu samba leleggu, samba pitu oong sipujujuluu ka matat uddenan purimataat nenda; ia te sipitu Ketsat Taikamanua. 6Ka matat uddenan purimataat ai koat kaca, kele kristal. Ka talagat uddenan purimataat samba sibokkonia ai epat sipuririmanua sibara mata simigi ka mata samba ka teitei. 7Sipuririmanua siboiki makere kele singa; sipuririmanua sikarua makere kele jaui; sipuririmanua sikatelu pumataatnia kele matat sirimanua; samba sipuririmanua sikaepat makere kele manyang sitububurut. 8Epatnia sipuririmanua nenda senenda ai enem kappora, bokko tubuda samba ka isit ka baga sun mata; samba taipuaari le sia sinago samba sinoibo masikua: "Sipunenan, sipunenan, sipunenan le si Tuhan Taikamanua, Sipulugege, siturerere puririmanua, sipuririmanua samba siooi geti." 9Ka teteret siepat sipuririmanua masiumun, masiabeuake samba masisuraki nia, sikuddu ka uddenan purimataat samba sipuririmanua teret buruburu, 10purapporangan sirua pulu epat tai baja ka matat sikuddu ka uddenan purimataat nenda, masipanindogi nia, sipuririmanua teret buruburu. Lepa galakngakerangan kiritda ka matat uddenan purimataat, kuarangan, 11"Tuhan Taikamanuamai, mateuan ekeu masisilo pulatsanan samba pubeunanan samba gege; kalulut anubaraake sangamberinia; samba kalulut teu bagam le aipuriuriu samba aibara sangamberinia."

will be added

X\