PAMOILIANAN 22

1Lepa sausaunangan kaku malaika bagat oinan purimanuaiat simagirau kele kristal, muguruk sibebela ka uddenan purimataat Taikamanua samba ka uddenan Togat Biribiri. 2Ka talagat enungan kota samba ka rua ngasilat bebet oinan ai loina purimanuaiat sipububua pulu rua ngaminca, senen laggo sangaminca ipubua; samba buluknia tupakei masialeake tai bangsa. 3Taan anai sedda pateleiat. Uddenan Taikamanua samba uddenan Togat Biribiri-ngan le mukukuddu ka bagania, samba sapaguguletnia masipanindogi nia; 4itcorangan matania samba oninia tusurat ka bukkura. 5Taan anai soibo sedda, samba taan besiakenen ka sita torot alito samba torot sulu, aipoi Tuhan Taikamanuangan le masitotoroiji sia, samba purimatarangan teret buruburu. 6Lepa kuanangan ka mataku malaika, "Katoneman samba sibulatnia le tiboiet nene, samba Tuhan Taikamanua sipasikakau Ketsatnia ka tai nabi, masikoiniake malaikania, masipatoila ka sapaguguletnia aponia babara bulat simaruei." 7"Bulatnia maruei le kuoi. Mauktuk sia sipasirereddet tiboiet pamoilianan ka buko nene!" 8Aku Yohannes te sipasiaarep samba sipasiitco sangamberinia nene. Kele akuitco samba akuarep nia, purappokungan ka matat malaika sipasitotoilaake sangamberinia ka mataku, masipanindogi nia. 9Tapoi kuanangan ka mataku, "Ba paninindogi aku! Pagugulet le aku kele ekeu samba sasarainam tai nabi samba sangamberi sipasirereddet sangamberi tiboiet ka bagat buko nene. Taikamanua le panindogi!" 10Lepa kuanangan ka mataku, "Ba totoggaiji tiboiet pamoilianan ka buko nene, aipoi amalegerengan teterenia. 11Sigalai sikatai, eddangannia iriuriuake mugalai sikatai; sigalai simalolit, eddangannia iriuriuake ipalolit tubunia; sigalai simaroipo, eddangannia iriuriuake mugalai puroipoat; samba sipunenan, eddangannia iriuriuake ipuneni tubunia." 12"Bulatnia maruei le kuoi, samba kuambit upa kaunenku ka senen sirimanua siripot sigalainia. 13Aku te Alfa samba Omega, Sipuboboiki samba Sikateitei, Panandaat samba Kalepakat." 14Mauktuk te sia sipasibubui leppeira, bailiu bara ka sia gege masibakkati loina purimanuaiat, samba tuguru ka kota masienungi matatbaliunia. 15Tapoi sajojo geti, sipukekerei, sipaeelet, sipamamatei, sipanindogi buluat, samba sioba samba sigalaiake pabokoat, ka ulau kota le kudduatda. 16"Aku, Yesus amasikoiniake malaikaku masimunengake sangamberinia nene ka kam ka paamian. Aku te ungat samba punuteteu David, panyanyat simancep simakirisau." 17Kuanangan Ketsat samba sinanalep talimouakenen, "Konan!" Samba kasei sipasiaarep kau leu ikua, "Konan!" Samba kasei simaoggou, kau ioi; samba kasei sioba nia, kau iala oinan purimanuaiat sitaisasakiet! 18Aku Yohannes, masimunengake nia ka senen sipasiaarep tiboiet pamoilianan ka buko nene, "Kasei masituppaiake apa pa ka tiboiet nene, tuppaiakenangan ka tubunia Taikamanua paoreat sitususurat ka bagat buko nene. 19Samba kasei masibeleki apa pa tiboiet ka bagat buko pamoilianan nene, iaala leu Taikamanua ka tubunia rubeiatnia ka loina purimanuaiat samba kota sipunenan, sitususurat ka bagat buko nene." 20Nia sipasimumunengake sangamberinia nene masikua, "Oo, maruei le kuoi!" Amen, konanan Tuhan Yesus! 21Kiliu bagat Tuhan Yesus masipaalei kam sangamberimui! Amen.

will be added

X\