PAMOILIANAN 21

1Lepa itcokungan manua sibau samba polak sibau, aipoi manua siboiki samba polak siboiki atataan, samba koat leu taan anai. 2Samba kuitco kota sipunenan, Yerusalem sibau, tugorosot sibara ka sorga sibara ka Taikamanua, alepaan tarek kele siokko talimouakenen silepa palainge masiailiake simanteunia. 3Lepa arepkungan nganga sabeu sibara ka uddenan purimataat sipasikukua, "Itco, sapou Taikamanua aian ka talagat sirimanua; sambarangan le sirimanua mukukuddu, bailiunangan sia bangsania, samba nia bailiu Taikamanuanda. 4Posanangan sangamberi elu ka matada, samba kamateiat taan anai, ele reureu baga, ele geri, ele gejat baga taan anai, aipoi sangamberi siboiki atusabauan." 5Ia geti kuanangan sikuddu ka uddenan purimataat, "Itco pei, sangamberinia le kubauake!" Samba ikua, "Suratnake, aipoi katoneman samba sibulatnia le tiboiet nene." 6Kuanangan minca ka mataku, "Amuailingan. Aku te Alfa samba Omega, Sipuboboiki samba Sikateitei. Ka simaoggou kukakau lonia oinan taisasakiet sibara ka bubuakat sipuririmanua. 7Simamanang, nia te masiikep sangamberinia nene, bailiu aku Taikamanuania samba nia bailiu togaku. 8Ka sia simaloto geti, sitaimatonem baga, simalolit, sipamamatei, sipaeelet, sipukekerei, sipanindogi buluat, samba sangamberi sipaboboko, rubeiatda ia te ka koat api samba belerang sipujujuluu; nene te kamateiat sikarua." 9Lepa oi sara ka sipitu malaika siukkaake sipitu pulokat, sisun sipitu paoreat sikateitei manibo ka mataku, kuanangan, "Konan kupatoila ka matam sinanalep talimouakenen kalaleman Togat Biribiri." 10Lepa sopsopnangan aku Ketsat, ambitnangan aku malaika ka sara leleu sabeu simabuak, sausaunangan ka mataku Yerusalem, kota sipunenan situgogorosot sibara ka sorga, sibara ka Taikamanua. 11Kota nenda sun pulatsanan Taikamanua ka tubunia. Toronia kele torot permata simakeppu saki, kele permata baiduri pandan, kirisau kele kristal. 12Tembok gelinia abeu samba mabuak, samba ai pulu rua matatbaliunia; ka matatbaliu ai pulu rua malaika samba ka uddut matatbaliu tusurat onin sipulu rua muntogat Israel. 13Ka isit kabelaiat sulu telu matatbaliu, ka isit bare telu matatbaliu, ka isit kaiaman telu matatbaliu samba ka isit kabelekat sulu telu matatbaliu. 14Gelit kota ai pulu rua bongennia, samba ka uddutnia tutaka oninda sipulu rua apostel Togat Biribiri. 15Malaika sipaninibo ka mataku nenda, aiuukkaake tutura kirekat mas pasikireki kota, matatbaliunia samba gelinia. 16Tubut kota nenda siepat taiming, nantania makere ka lionia. Kirekinangan nia tutura kirekat ai: 2400 kilometer; nantania samba lionia samba buaknia makere. 17Lepa kirekinangan gelinia ai: sangotu epat pulu epat ngaeto siripot kirekat sirimanua, kirekat malaika leu et. 18Gelit kota nenda bukku baiduri pandan le; tubut kota geti mas simalina, kele kaca simagirau. 19Sangamberi bongen gelit kota tukau sene ngamata permata pulaingeatnia. Bongen siboiki baiduri pandan, bongen sikarua bukku nilam, bongen sikatelu bukku yakut, bongen sikaepat bukku zamrud, 20bongen sikalima bukku baiduri sepah, bongen sikaenem bukku delima, bongen sikapitu bukku ratna cempaka, bongen sikabalu bukku pirus, sikasiba bukku topas, sikapulu bukku krisopras, sikapulu sara bukku lazuardi, sikapulu rua bukku kecubung. 21Pulu ruania matatbaliu ia te pulu rua mutiara; senen matatbaliu sara mutiara. Enungan kota geti mas simalina, kele kaca simagirau. 22Uman Taikamanua geti ta anai akuitco ka bagania; aipoi Uman Taikamanua, ia te tubut Tuhan Taikamanua Sipulugege le, samba Togat Biribiri. 23Kota nenda ta leu ibebesiake sulu samba laggo masitoroiji nia; aipoi pulatsanan Taikamanua le masitotoroiji nia samba Togat Biribiri ia te alitonia. 24Sangamberi bangsa muenung ka toronia samba tai rimata ka polak masiambit pulatsananda ka bagania. 25Matatbaliunia ta tupapatpatnake sanganantat gogoi, aipoi soibo taan babara sedda; 26samba pukayoat samba pubeunananda tai bangsa raambit ka kota nenda. 27Tapoi apa pa simalolit, ele sirimanua sigalaiake kasitsitnakenen ele boko, taan tuguguru ka bagania, sarat sia le sitususurat oni ka bagat buko purimanuaiat Togat Biribiri.

will be added

X\