1 Lepa itcokungan sara malaika tugorosot barania ka sorga, aiuukkaake panguksik guluggut kamateiat samba rantai sabeu ka kabeinia. 2 Labanangan naga, si ulou siburu nenda, ia te Sanitu ele Setan. Kabenangan nia saribu ngarura burunia. 3 Lepa ribbaiakenangan nia ka guluggut kamateiat, kuksiknangan nia samba itoggaiji ka uddutnia, buian ipepeake minca tai bangsa, teret itukappulu tetere saribu ngarura. Pasat nenda buita tubelaake nia ka bagat tetere goiso. 4 Lepa itcokungan maigi uddenan purimataat samba sia sikudduji nia; ka tubuda sikudduji uddenan purimataat tukau gege masiukum. Kuitco leu ketsatda simateiakenen kalulut pasimunengan pagalaiat Yesus samba kalulut tiboiet Taikamanua, samba sitaipanindogi tarimeu samba tularatnia samba sitaisilo toggaiat ka bukku samba ka kabeira; purimanuarangan minca samba murimata pasamba Kristus saribu ngarura. 5 Simamatei sabagei geti ta muririmanua sia minca teret itukappulu tetere saribu ngarura. Nene te katusuruat siboiki. 6 Mauktuk samba sipunenan le sia sipueeneu ka katusuruat siboiki. Kamateiat sikarua taan ioorak sia, tapoi bailiu le sia imam Taikamanua samba imam Kristus, samba murimata pasamba Kristus, saribu ngarura burunia. 7 Kele aitukappulu tetere saribu ngarura, tubelaake minca Sanitu ka penjarania, 8 einangan leu masipepeake tai bangsa sikuddu ka epat taiming polak nene, ia te Gog samba Magog; ruruakenangan sia pasaggak, igida kele ngai ka bebet koat. 9 Tusakairangan leu ka sangalio polak, goilikrangan kudduatda tentera sipunenan samba kota kilibet baga. Ia geti bele ibele api sibara ka manua masisubuake sia; 10 samba Sanitu sipepeake sia turibbaiake ka koat api pagalu belerang, ka kudduat tarimeu samba nabi sipatataju; samba tupaorei sia sinago sinoibo teret buruburu. 11 Lepa itcokungan sara uddenan purimataat sabeu simabulau samba nia sikuddu ka uddutnia. Oto polak samba manua apuru ka matania, taan atusese kudduatnia. 12 Ia geti itcokungan simamatei, sabeu samba sigoiso, murio ka matat uddenan purimataat nenda. Samba sangamberi buko tubuka. Lepa tubuka leu buko bagei, ia te buko purimanuaiat. Oto sia simamatei tuukumake siripot sigalaira sitususurat ka bagat buko. 13 Belaakenangan koat simamatei ka bagania. Kamateiat samba taikabaga leu masibelaake simamatei sikuddu ka bagania. Sangamberida tuukumake siripot sigalaira senenda. 14 Lepa kamateiat samba taikabaga ribbai turibbaiake ka koat api. Koat api nene, ia te kamateiat sikarua. 15 Kasei sitaitususurat oni ka bagat buko purimanuaiat, turibbaiake le nia ka koat api.
