PAMOILIANAN 2

1"Suratnake ka malaikat paamian ka Epesus: Nene le aikua sipasiuukka sipitu panyanyat ka kabeinia sikattoet samba sipueenung ka talagat sipitu pualitoat mas. 2Kuagai sangamberi galajetnu samba saggot tubum samba om bagam. Kuagai taipususumnu ka sirimanua sikatai, tapoi anusibongan sia sikua tubuna apostel, tapoi ta apostel, againungan tebai sipatataju le sia. 3Maom le bagam samba masiorik ekeu kalulut oningku; samba ta anupuletsei saggo. 4Tapoi kenanen kisedda ai taioobaket bagaku kekeu, ia te kakaddiuakenu nuntut bagam siboiki. 5Oto repdep kipa kerunia kabebelenu. Bauake paatuatnu samba galaiake minca sigalaiakenennu siboiki. Ke ta, oikungan leu kekeu, buraukungan pualitoatnu ka kudduatnia, ke ta nubauake paatuatnu. 6Tapoi ai leu simaeru kekeu, ia te malaga bagam ka sigalaiakenenda sipasitutut si Nikolaus, lagakiet bagaku leu. 7Kasei sibara talinga, kau iarepi sikuat Ketsat ka matada sapaamian! Ka simamanang, kukakau ikom buat loina purimanuaiat sikuddu ka Paradaisot Taikamanua." 8"Samba ka malaikat paamian ka Smirna suratnake: Nene le aikua Sipuboboiki samba Sikateitei, simamatei samba sipuririmanua minca: 9Kuagai gejat bagam samba pugebakatnu -- siripokatnia makayo le ekeu -- samba paloloiatda sioniake tubuna Yahudi, tapoi ta Yahudi; paamian Sanitu le sia. 10Ba kakalotoake gejat baga siooi geti ka tubum. Ibubulukngake te piga pa ka talagamui Sanitu ka bagat penjara bule isibo kam, magejanangan bagamui pulu ngagogoi burunia. Kau numatopit teret matei ai leu kuake kekeu kirit purimanuaiat. 11Kasei sibara talinga, kau iarepi sikuat Ketsat ka matada sapaamian! Simamanang, taan ioorik apa pa ka kamateiat sikaruania." 12"Samba ka malaikat paamian ka Pergamus suratnake: Nene le aikua sipasiuukka palittei simalauru: 13Kuagai kaipa nukukuddu, ia te ka kudduat purimataat Sanitu; samba maron nuukkaake oningku, samba ta nupakele tonem bagam ka tubuku, beringan ka teteret Antipas, sipasimumuneng aku simatopit simateiakenenda ka matamui, ka pukudduanan Sanitu. 14Tapoi ai goiso sitaipasesese ka bagaku galai tubum: ai ka talagamui situtnake nganturat Bileam, sigelaiake si Balak masipepeake tai Israel, bule rakom sibuluakenen ka buluat samba masigalaiake puumunan. 15Kisedda leu et ai ka talagamui siukkaake nganturatda situtnake si Nikolaus. 16Oto bauake paatuatnu! Ke ta, oikungan leu kekeu simaola masisaggangi sia pasamba palittei ka ngungungku nene. 17Kasei sibara talinga, kau iarepi sikuat Ketsat ka matada sapaamian! Ka simamanang kukakau ka sia manna silipputnakenen; samba kupangunguruatnake ka tubunia bukku simabulau, ka bukku nenda tusurat oni sibau, sitaiaagaietda kasei pa, sarat sisilo nia le iagai nia." 18"Samba ka malaikat paamian ka Tiatira suratnake: Nene le aikua Togat Taikamanua sipumamata kele juluu api, samba rerenia kele tembaga simasorobek: 19Kuagai sangamberi galajetnu samba nuntut bagam samba tonem bagam samba pasikelatnu samba om bagam. Kuagai sigalainu sikateitei saliu pei le sigalainu siboiki. 20Tapoi ai sitaipasesese ka bagaku galai tubum kalulut nuobaake sinanalep si Isebel, sipunabi tubuna, masigelaiake samba masipepeake sapaguguletku muumun samba mukom sibuluakenen ka buluat. 21Akukauan oggak ka sia ibauake paatuatnia, tapoi ta ioba masibauake paatuatnia ka puumunannia. 22Kuriribbaiakean le te nia ka pereman pubesikat, samba sia aleinia paelet kuribbaiake sia ka pugejaat baga sabeu, ke ta rabauake paatuatda ka galai tubut sinanalep nenda. 23Samba sipasitututnia kumateiake, bule raagai nia sangamberi paamian, aku le siagai masisinogi atei samba paatuat sirimanua; samba kusiliake ka kam siripot sigalaimui senemui. 24Tapoi ka kam sabagei ka Tiatira, sitaitutnake nganturat nenda samba sitaigelai kuanenda pagalaiat Setan, kukua ka kam: Ta kuaake apa pa bairanen bagei ka kam. 25Tapoi apa sibabara ka kam, ukkaake kam simaron teret oi aku. 26Ka sia simamanang samba sigalaiake galajetku teret kalepakatnia, kukakau ka sia gege masipaneinei sipuarat sabulungan; 27samba iparentaake sia sibara tutura laba; gatcaakenangan sia kele pario polak -- kele gege siniloku sibara ka Ukkuiku -- 28samba kukakau ka sia panyanyat simancep. 29Kasei sibara talinga, kau iarepi sikuat Ketsat ka matada sapaamian!"

will be added

X\