PAMOILIANAN 19

1Pasat nenda arepkungan nganga sabeu kele nganganda sirimanua simigi ka sorga, sipasikukua, "Haleluya! Ka Taikamanuanta le puaragat samba pulatsanan samba gege, 2sineseat samba maroipo poi pasiuukumnia; aipoi aiukuman sipaeelet sabeu, sipakatai polak nene kalulut paelenannia; samba ailumunakean logaura sapaguguletnia ka tubut sipaeelet nenda." 3Kuarangan minca sikaruania, "Haleluya! Samba kujuknia mangarai teret buruburu." 4Purapporangan sirua pulu epat tai baja samba siepat sipuririmanua masipanindogi Taikamanua sikuddu ka uddenan purimataat, kuarangan, "Amen! Haleluya!" 5Ia geti maarepnangan nganga sibara ka uddenan purimataat masikua, "Umun kam Taikamanuanta, kam sapaguguletnia, kam sikalotoake nia, sigoiso samba sabeu!" 6Lepa arepkungan kele ngangan sirimanua simakope igi, kele jaat eba samba kele gululuu leleggu sabeu sipasikukua, "Haleluya! Aipoi amurimatangan Tuhan, Taikamanuanta, Sipulugege. 7Kau imaangka samba imagora bagata, samba talatsatnake kam nia, aiailingan poi teterenia putalimogat Togat Biribiri, samba sinanalepnia amatarekngan. 8Samba atukauan ka tubunia juto simaalit baga simakirisau samba simabulau simalina pakeietnia!" [Juto simaalit baga ia te puroipoat sigalaira sia sipunenan]. 9Lepa kuanangan malaika ka mataku, "Suratnake: Mauktuk te sia sinogai ka punen putalimogat Togat Biribiri." Kuanangan minca ka mataku, "Sibulatnia te tiboiet nene sibara ka Taikamanua." 10Purappokungan ka matat malaika masipanindogi nia; tapoi kuanangan ka mataku, "Ba gagalai kise! Aku leu pagugulet le kele ekeu samba sasarainam, sipasisisilo pasimunengan Yesus. Taikamanua le panindogi! Aipoi pasimunengan Yesus ia te ketsat pamoiliananda tai nabi." 11Lepa itcokungan tubuka sorga, makoinongnangan sara kuro simabulau; samba sikuddu ka uddutnia muoni: "Simatopit samba Sineseat", samba maroipo ipasiukum samba ipasaggak. 12Matania kele juluu api samba ka utenia ai maigi kirit purimataat samba ka tubunia ai tusurat sara oni taiaagaietda kasei pa, sarat nia le siagai nia. 13Leppeinia sinosoki logau, oninia ia te: "Tiboiet Taikamanua". 14Sangamberi mungkuat tentera ka sorga masitut nia mukuro simabulau, samba muleppei juto simabulau simalina. 15Samba ka ngungunia bela sara lanjau simalauru, pakeietnia masitete tai bangsa. Paneineinangan sia mututura laba; samba ipetsut anggur ka bagat pasipetsunan anggur golut Taikamanua, Sipulugege. 16Ka leppei samba ka bakkapatnia ai tusurat oni: "Rimatada tai rimata samba Tuanda tai tuan." 17Lepa itcokungan sara malaika sipuririo ka sulu. Pugereinangan sabeu nganga masikua ka sangamberi uma sitububurut ka manua, "Konan kam se paruru ka punen sabeu Taikamanua, 18bule nukom kam akkulara tai rimata, akkulara tai panglima, akkulara simagege, akkulat kuro samba akkulara sangamberi sikudduji kuro samba akkulara sangamberi sirimanua, sipuuja ele sapagugulet, sigoiso ele sabeu." 19Lepa itcokungan tarimeu samba tai rimata ka polak sambada tai tenterada, aparuruan sia raei masisaggangi nenda Sikudduji kuro samba tenterania. 20Ia geti labarangan tarimeu samba nabi sipatataju, sibaraake kiseiet ka matat tarimeu, samba kiseiet nenda ikau masipepeake sirimanua sisilo toggaiat tarimeu samba sipanindogi tularatnia. Ribbaiakerangan sia ruada aimuririmanua ka koat api sipujujuluu pagalu belerang. 21Sabagei geti matei sia ka lanjau sibebela ka ngungun Sikudduji kuro; ektek le sangamberi uma masikom akkulara.

will be added

X\