PAMOILIANAN 18

1Pasat nenda itcokungan sara malaika bagei tugorosot barania ka sorga, sibara gege sabeu; bailiu matoro polak kalulut pulatsanannia. 2Ia geti pugereinangan sabeu nganga, kuanangan, "Amabukkatnan, amabukkatnan Babel, kota sabeu, aibailiuan nia kudduatda ketsat sikatai samba kudduat pulippunanda ketsat simalolit samba pulippunan paumauma simalolit samba kasitsitnakenen. 3Aipoi sangamberi bangsa araloan anggur pubotbonan paelenannia samba tai rimata ka polak aratutnakean nia paelet, samba siputotoko ka polak nene amakayongan sia kalulut burania pubotbonannia." 4Lepa arepkungan nganga bagei sibara ka sorga sipasikukua, "Katuitui kam bangsaku, katuitui kam sedda, bui isappo kam jonia, samba bui iorak kam paoreat kaunen ka tubunia. 5Aipoi jonia apareddenan aili ka manua, samba airepdepman Taikamanua sangamberi katainia. 6Galaiake kam ka tubunia kele sigalaiakenennia ka kam, samba kau kam ka tubunia rua ngaoleat siripot sigalainia; pagalu kam ka sia rua ngaoleat ka bagat pulokat pasigalukatnia ka kam. 7Kau kam ka tubunia paoreat samba reureu baga kele igit pulatsanan samba pusanangan tubu sinanamnia. Aikua poi ka paatuatnia, 'Mukuddu aku murimata, ta silumang aku, samba taan kuoorik reureu baga.' 8Kalulut nene ka bagat sangagogoi le oi ka tubunia paoreat, ia te kamateiat, reureu baga samba pulajeat; samba tulabo nia ka api, aipoi maron le Tuhan Taikamanua sipasiuukum nia." 9Tai rimata ka polak situtnake nia paelet samba pusanangan tubu, masisoibi samba masigeri nia, raitco kujuk api sipasilalabo nia. 10Ka sareunan le rapuririo lotora iorak sia paoreat ka tubunia, kuarangan, "Paan kekeu, paan kekeu, kota sabeu, Babel, kota simaron, aipoi ka bagat sangajam le amoian ukumannu!" 11Siputotoko ka polak leu musou samba mureureu baga kalulut nia, kalulut taan anai sipananaki bibiletda, 12ia te mas samba perak, intan samba mutiara, juto simaalit baga samba simabonan, sutera samba laka, sene ngamata bibilet loina simasingin, sene ngamata bibilet sibara ka sikkala, sene ngamata bibilet sibara ka loina simakeppu saki, sibara ka tembaga, laba samba marmar, 13kulit manis, samba singinan iba, pasinginsingin, mur, kumanyang, anggur, tula, tapung simaailit, gandum, jaui samba biribiri, kuro samba kureta, sapagugulet samba engan sirimanua. 14Kuarangan siputotoko ka matat sinanalep, "Sangamberi buatkaju siobat bagam taan anai, samba sangamberi pusanangan samba simalainge amusabungan ka tubum, taan tusesese minca." 15Sangamberi sipasisasakiake bibilet nenda, simakakayo kalulut nia, murio ka sareunan lotora iorak sia paoreat ka tubunia, musou le sia samba mureureu baga, 16kuarangan, "Paan kekeu, paan kekeu, kota sabeu, sipuleleppei juto simaalit baga, samba komang simabonan samba laka, samba sipalainge tubuna mas, intan samba mutiara, 17aipoi ka bagat sangajam le pukayoat simigi nenda tangeu." Samba sangamberi jurumurit kapal, sipanonompang, tatogat kapal samba sangamberi sigaba purimanuaiatnia ka koat, murio ka sareunan, 18samba mugerei, raitco kujuk api sipasilalabo kota, kuarangan, "Kota apa simakere ka kota sabeu nene?" 19Kaurangan abu ka utera, pugereirangan pagalu musou samba mugeri, kuarangan, "Paan kekeu, paan kekeu, kota sabeu, kalulut nia sangamberi sirimanua sipukakapal ka koat amakayongan, kalulut pukayoatnia, aipoi ka bagat sangajam le tangeu. 20Puangka kam baga, kam sorga, samba kam sipunenan, tai apostel samba tai nabi, kalulut aiukuman nia Taikamanua silit sigalainia ka tubumui." 21Ia geti akkatnakenangan sara malaika simaron, sara bukku, beu bukku panundukat bera, lepa ribbaiakenangan nia ka koat, kuanangan, "Kise te ronnia turibbaiake Babel, kota sabeu, bailiu taan tusesese minca. 22Nganganda sipugigitar, sipuurai, sipususuling samba sipupipiau, taan tuaarep ka tubum; samba beringan sara siagai kesenian taan tusesese ka tubum; samba ngangan panundukat bera taan tuaarep minca ka tubum. 23Samba torot alito taan mutotoro ka tubum; samba ngangan talimouakenen simanteu samba sinanalep taan tuaarep minca ka tubum; aipoi sangamberi siputotokom siabeu tiboi tubu ka polak le, kalulut kereinu nupepeake sangamberi bangsa." 24Samba ka bagania tusese logaura tai nabi samba sipunenan samba logaura sangamberi simateiakenen ka polak nene.

will be added

X\