PAMOILIANAN 17

1Lepa oi sara malaika sibara ka sipitu sipasiuukka sipitu pulokat masikua ka mataku, "Konan, kupatoila ka matam ukuman kaunen ka tubut sipaeelet sabeu, sikuddu ka kudduat simaigi oinan. 2Tai rimata ka polak aratutnakean nia paelet, samba taikapolak aipuinengan sia kalulut anggur paelenannia." 3Ia geti sopsopnangan aku Ketsat, ambitnangan aku malaika ka simatangeu. Itcokungan sedda sara sinanalep mukuddu ka teitei tarimeu simabonan tubu. Tarimeu nenda sun tusurat oni paasakat. Tarimeu nenda pitu utenia, pulu bannia. 4Sinanalep nenda muleppei simabonan samba laka sibara mas, intan samba mutiara. Ka kabeinia ai sara pulokat mas, ka bagania sun sangamberi kasitsitnakenen samba simalolit sibara ka paelenannia. 5Ka bukkunia tusurat oni pakeleat: "Babel Sabeu, inanda sipaeelet samba galajet kasitsitnakenen ka polak." 6Lepa itcokungan aipupuineng nia sinanalep nenda kalulut logaura sipunenan samba logaura sipasimumuneng Yesus. Kele akuitco nia, kisei le ka bagaku. 7Kuanangan ka mataku malaika, "Makisei kodda ka bagam? Kukua nia ka matam keleat sinanalep nenda samba keleat tarimeu uddenietnia, sipitu ute samba sipulu ban. 8Tarimeu siitconu nenda, siburu ai, kineneiget taan, muoottou minca ka guluggu kamateiat samba iaailiake kalangokatnia. Bailiu makisei bagada sikuddu ka polak, sia sitaitususurat oni ka buko purimanuaiat barania ka panandaat polak, raitco tarimeu nenda, ai, lepa taan, samba muoottou minca. 9Ka bagat nene buita ai agai sialei sikut paatuat. Sipitu ute, ia te pitu leleu, leleu kudduat sinanalep, samba leu pitu rimata: 10lima sia abelean, sara ai pei le, sara geti bagei tapei amoi; ke moi nia geti, ta matotom ipurimata. 11Pagalaiat tarimeu geti siburu ai, kineneiget taan, ia te rimata sikabalu; tapoi sara ka talagat sipitu leu, samba aiaailiake kalangokatnia. 12Samba sipulu ban siitconu, ia te pulu rimata, sitaitaddaake pei le murimata; tapoi rasisiloan le gege murimata ka bagat sangajam, pasamba tarimeu nenda. 13Tai rimata nene sisara paatuat le sia, samba ronda samba gegeda rakau ka tarimeu nenda. 14Sangamberida masisaggangi Togat Biribiri. Tapoi ikalaake le sia Togat Biribiri, pasamba sia sinogainia, sipilinia samba simatonem baga, aipoi Tuanda tai tuan le nia samba Rimatada tai rimata." 15Lepa kuanangan ka mataku malaika, "Sangamberi oinan siitconu, ka kudduat sinanalep sipaeelet nenda, ia te bangsa, sirimanua simigi, muntogat samba nganga. 16Sipulu ban siitconu nenda samba tarimeu, rapulalagaki baga te sinanalep sipaeelet; kaurangan nia mutangeu samba mubulutut, komrangan akkulania samba ralaboake nia ka api. 17Aipoi aisuruakean paatuatda Taikamanua masigalaiake siteuakenennia, samba masikau sia musara paatuat masikau purimataatda ka tubut tarimeu, teret ipuaili sangamberi siniboi Taikamanua. 18Samba sinanalep siitconu nenda, ia te kota sabeu, sipaneinei tai rimata ka polak."

will be added

X\