PAMOILIANAN 16

1Lepa arepkungan nganga sabeu sibara ka Uman Taikamanua masikua ka sipitu malaika, "Kenan kam, piliake kam pulokat golut Taikamanua ka polak!" 2Einangan leu et malaika siboiki, piliakenangan pulokatnia ka polak; bara ibara appu sikatai samba simalaplap ka sangamberi sirimanua sibara toggaiat tarimeu samba sipurarappo ka tularatnia. 3Lepa piliakenangan pulokatnia malaika sikarua ka koat; bailiunangan logau koat, kele logau simamatei, mateinangan leu sangamberi sipuririmanua ka bagat koat. 4Lepa piliakenangan pulokatnia malaika sikatelu ka sangamberi bagat oinan samba matat bubuakat, bailiu logau sangamberinia. 5Lepa arepkungan ipanibo malaika sikupkup oinan, "Maroipo le ekeu, Taikamanua sipuririmanua samba siturerere puririmanua, sipunenan le ekeu, kalulut kise pasiuukumnu. 6Kalulut pipiliakera logau sirimanua sipunenan samba tai nabi, anukauan leu sia mulo logau; mateuan kele nene ka sia!" 7Lepa arepkungan nganga sibara ka meja pasibuluat masikua, "Oo Tuhan, Taikamanua Sipulugege, sibulatnia samba maroipo pasiuukumnu." 8Lepa piliakenangan pulokatnia malaika sikaepat ka sulu, samba tukau gege ka sulu ipalaboki sirimanua api. 9Malaborangan sirimanua kalulut kopet oloi api, bailiu raasa onin Taikamanua simagege masibaraake paoreat nenda samba ta rababauake paatuatda masilatsatnake onin Taikamanua. 10Lepa piliakenangan pulokatnia malaika sikalima ka uddut uddenan purimataat tarimeu, magepgepnangan purimataatnia, sotrangan leu lilada, kalulut besira, 11samba raasa Taikamanua ka sorga kalulut besira samba kalulut appuda; tapoi ta rababauake paatuatda ka sigalaira. 12Lepa piliakenangan pulokatnia malaika sikaenem ka oinan sabeu, oinan Efrat, magaraknangan oinan, bule imatarek enunganda tai rimata siooi sibara ka kabelaiat sulu. 13Lepa itcokungan telu ketsat sikatai kele kuret bela ka ngungun naga, samba ka ngungun tarimeu samba ka ngungun nabi sipatataju. 14Ia te saketsat sanitu sibaraake kiseiet, sieei masitagetnake tai rimata ka sangalio polak, masiruruake sia pasaggak ka gogoi sabeu, ia te gogoi Taikamanua Sipulugege. 15"Arep! Momoian le te aku kele sipananangkou. Mauktuk te sia sipumamata samba sipasikeli leppeinia, bui ipuenung simabulutut samba bui raitco sirimanua kailaakenennia." 16Lepa ruruakerangan tai rimata saketsat sikatai ka kudduat kuanenda ka ngangan Ibrani Harmagedon. 17Lepa piliakenangan pulokatnia malaika sikapitu ka rusa. Maarepnangan nganga sabeu sibara ka Uman Taikamanua masikua, "Alepaan." 18Pukirisaunangan leu bila samba pugululuunangan leleggu, bara ibara ngeungeu polak sabeu; burut aibara sirimanua ka polak, tapei abara ngeungeu polak sabeu kele nene. 19Maragatnangan leu kota sabeu bailiu telu ngarubeiat; mabukkatnangan sangamberi kotara sipuarat sabulungan. Repdepnangan leu Babel sabeu Taikamanua masikau ka tubunia pulokat sisusun anggur golut bagania. 20Samba sangamberi nusa tata, samba sangamberi leleu taan tusese. 21Bele ibele urat es sabeu sibara ka manua, lima pulu kilogram sanenia isaksak sirimanua; asarangan Taikamanua sirimanua kalulut paoreat urat es nenda, bulat abeu poi paoreat nenda.

will be added

X\