1 Lepa itcokungan katuaggaiat bagei ka manua, abeu samba kiseiet: Ai pitu malaika sipasiuukka pitu paoreat sikateitei, ka bagat nene poi itukappuluake golut Taikamanua. 2 Lepa itcokungan ai sara kele koat kaca pagalu api; ka bebet koat kaca nenda murio sia sikalaake tarimeu nenda samba tularatnia samba angka addeat oninia; ai ka kabeira gitar Taikamanua. 3 Samba rauraiake urai Mose, pagugulet Taikamanua, samba urai Togat Biribiri, kise ngangania: "Abeu samba kiseiet le galajetnu, ale Tuhan, Taikamanua, Sipulugege! Maroipo samba sibulatnia le sangamberi enungannu, ale Rimatada tai bangsa! 4 Kasei te ta masikakalotoake ekeu, Tuhan, samba sitailatsatnake onim? Sarat ekeu le poi sipunenan; sangamberi bangsa le momoi samba murappo ka matam, amatoilaan poi roiponia pasiuukumnu!" 5 Pasat nene itcokungan tubuka Uman Taikamanua, ia te sapou pasimunengan ka sorga. 6 Lepa bela ka Uman Taikamanua pitu malaika sibaraake pitu paoreat, sipuleleppei juto simalina simakirisau samba ka rurukatda ai nengnengan mas. 7 Ia geti sara ka talagat siepat sipuririmanua masikau ka sipitu malaika pitu pulokat mas sisusun ka bagania golut Taikamanua, Taikamanua sipuririmanua teret buruburu. 8 Sun le Uman Taikamanua kujuk sibara ka pulatsanan samba geget Taikamanua. Beri sara sirimanua siooi masiguruki Uman Taikamanua, teret ilepa sipitu paoreat sibara ka sipitu malaika.
