PAMOILIANAN 14

1Lepa itcokungan: aimuririo sedda Togat Biribiri ka leleu Sion, samba ai aleinia 144.000 sia, ka bukkura tusurat oninia, samba onin Ukkuinia. 2Lepa arepkungan ka manua kele ipujaa oinan ka puruupugat samba kele gululuu leleggu sabeu. Samba nganga siarepku nenda kele ngangan musikra sipugigitar ranauake gitarda. 3Sia si 144.000 masiuraiake urai sibau ka matat uddenan purimataat samba ka matada siepat sipuririmanua samba tai baja. Ta anai kasei pa siooi masigelai urai nenda, sarat sia le si 144.000 sinebui sibara ka polak. 4Sia te nene sitaipalolit tubuda ka tainanalep; aipoi malina sia kele taiokko. Sipasitutut Togat Biribiri le sia kaipa iei. Sinebui ka talagat sirimanua le sia kele buluakenen siboiki ka Taikamanua samba ka Togat Biribiri. 5Samba ka bagat ngungunda ta anai tusese boko; ta anai loloiet ka tubuda. 6Lepa itcokungan sara malaika bagei tuburut ka talagat manua samba ai ka tubunia Katuareman Simaeru sitaitatata paaremennia ka matada sikuddu ka polak ia te ka senen bangsa samba muntogat samba nganga samba uma, 7kuanangan sabeu nganga, "Kalotoake kam Taikamanua samba latsatnake kam nia, aiailingan poi tetere ipasiukum. Purappo kam ka matania sibaraake manua samba polak samba koat samba sangamberi bubuakat oinan." 8Lepa oi bagei malaika sikarua masitut nia, kuanangan, "Amabukkatnan, amabukkatnan Babel, kota sabeu, sipasipupuinengake sangamberi bangsa anggur pubotbonan puumunannia." 9Lepa oi bagei malaika sikatelu, masitut malaika sirua, kuanangan sabeu nganga, "Kasei sipurarappo ka matat tarimeu ele ka tularatnia, samba masisilo toggaiat ka bukkunia ele ka kabeinia, 10ilolo te geti anggur golut Taikamanua, sinarekngakenen si ta galu ka bagat pulokat golunia; samba tupaorei nia ka api samba belerang ka matada samalaika sipunenan samba ka matat Togat Biribiri. 11Pangarainangan ka pata kujuk api paoreatda teret buruburu, sinago sinoibo ta anai ari tupaorei sia, ia te sia sipurarappo ka matat tarimeu samba tularatnia, samba sisilo toggaiat oninia." 12Ka bagat nene te buita imaom samba imatonem bagada sia sipunenan, sipasirereddet surukat Taikamanua samba simatonem baga ka tubut Yesus. 13Lepa arepkungan nganga sibara ka sorga masikua, "Suratnake: Mauktukngan sia simamatei, matei ka bagat Tuhan teret kise." "Bulatnia," ngangan Ketsat, "rapuaroi ka gejat bagada; aipoi sangamberi sigalaira masitut sia." 14Lepa itcokungan: ai sara tanairusa simabulau. Ka uddut tanairusa nenda ai sara sipukukuddu kele Togat Sirimanua sibara kirit mas ka utenia samba sara sasabi simalauru ka kabeinia. 15Lepa itcokungan malaika bagei ka Uman Taikamanua; pugereinangan sabeu nganga ka sipukukuddu ka tanairusa, "Saiokngakean sasabinu, sabian, aiailingan teteret pasigetaiat; aipoi amaraan getaiet ka polak!" 16Saiokngakenangan sasabinia sikuddu ka tanairusa, nenda ka polak, tusabinangan leu polak. 17Lepa bela minca sara malaika bagei ka Uman Taikamanua ka sorga; ai leu et ka kabeinia sasabi simalauru. 18Pasat nene bela sara malaika bagei ka meja pasibuluat; malaika nene ai gegenia masipaneinei api. Pugereinangan sabeu nganga ka malaika sipasiuukkaake sasabi simalauru, kuanangan, "Saiokngakean sasabim simalauru, nugetai buat anggur ka polak, amaraan poi buania." 19Saiokngakenangan leu sasabinia ka polak, getainangan buat anggur ka polak, lepa ribbaiakenangan nia ka pasipetsunan, ia te golut Taikamanua sabeu. 20Buat anggur nenda tupetsut ka ulau kota, ia geti bela ibela logau ka pasipetsunan, keppunia ai pa rua ngameter samba reunannia telu ngotu kilometer.

will be added

X\