PAMOILIANAN 11

1Pasat nenda akerangan ka tubuku sara manggea, kele tutura kirekat, samba rakua, "Suruake ekeu kireki Uman Taikamanua samba meja pasibuluat samba adde sia sipaninindou ka bagania. 2Gerat geti ka ulau Uman Taikamanua, eddangan ikuddu, ba kikireki, aipoi atukauan ka sipuarat sabulungan, samba kota sipunenan rapapeperaki epat pulu rua ngalaggo ujunia. 3Lepa koiniakekungan rua sipasimumunengku, sipuleleppei goni bule rasegeake Katuareman Taikamanua 1260 ngagogoi ujunia." 4Sia nene ia te sirua loinat zaitun samba sirua pualitoat sipuririo ka matat Tuhanda taikapolak. 5Samba ke ai kasei pa sioba masigalai sikatai ka tubuda, bela ibela api ka ngungunda masikom saggakda; ke kise te ramatei, ke ai kasei pa sioba masibesiki sia. 6Ai ka sia gege masikuksik manua bui ibele urat ujut rapaarep Katuareman Taikamanua; samba ai ka sia gege masibailiuake oinan bailiu logau, samba masiorakngake ka polak sene ngamata paoreat, teret siobat bagada. 7Kele aralepaake pasimunenganda, tusakainangan tarimeu ka guluggu kamateiat masisaggangi sia, kalaakenangan sia samba imateiake sia. 8Tubuda simamatei tagguilu ka enungan kota sabeu, oniakenen ka puketsanan Sodom samba Misir, sedda leu poi tusiliktengaake Tuhanda. 9Sangamberi bangsa samba muntogat samba nganga samba uma, masiitco tubuda simamatei telu sitenga gogoi ujunia samba ta raobaake iturateiake sia. 10Samba sia sikuddu ka polak mugora samba muangka baga kalulut kamamateira samba pakau sia panguruat ka pasasambada, kalulut tai nabi sirua nene masipaoreji sikuddu ka polak. 11Pasat telu sitenga gogoi oi ketsat purimanuaiat sibara ka Taikamanua tuguru ka tubuda, tusururangan; tenan loto lepa sia sipasiitco. 12Lepa areprangan nganga sabeu sibara ka sorga masikua ka matada, "Sakaiake kam sene!" Tusakairangan ka sorga ka bagat tanairusa, airaiitco sia saggakra. 13Ka jam nenda bara ibara ngeungeu polak, mabukkatnangan saparpulu kota, samba matei pitu ribu sirimanua ka ngeungeu polak. Malotorangan sia sipulelegei, umunakerangan Taikamanua sikuddu ka sorga. 14Apasatnan paoreat sikarua; paoreat sikatelungan le te momoi simaruei. 15Lepa piaunangan pipiaunia malaika sikapitu; maarepnangan nganga sabeu ka sorga masikua, "Purimataat polak nene aian ka kabei Tuhanta samba Rimata Sinulajinia, purimatanangan teret buruburu." 16Ia geti sirua pulu epat tai baja sikuddu ka uddenan purimataat ka matat Taikamanua, rappo sia masipanindogi Taikamanua, 17kuarangan, "Kukua kai sura ka matam Tuhan, Taikamanua, Sipulugege, sipuririmanua kineneiget samba siturerere puririmanua, kalulut anuukkaakean gegem sabeu samba amurimatangan ekeu. 18Samba sangamberi sipuarat sabulungan amugoluan, tapoi amoian golunu samba tetere ituukum simamatei samba masikau upa ka sapaguguletnu, tai nabi samba sirimanua sipunenan samba ka sikalotoake onim, ka sigoiso samba ka sabeu samba masisubuake sia sisubuake polak!" 19Ia geti tubukanangan Uman Sipunenan Taikamanua ka sorga, makoinongnangan peti pakerekat bagania ka bagat Uma Sipunenan; bara ibara bila samba gululuu leleggu samba ngeungeu polak samba urat es simatirit.

will be added

X\