PILEMON 1

1Sibara kai Paulus, siukumakenen kalulut Kristus Yesus samba sibara kai Timoteus sarainanta, masiailiake Pilemon kilibet baga samba aleimai ka galajet 2samba kai Appia maniuta samba kai Arkhipus, aleita ka bagat pasaggangan samba ka sapaamian ka lalepnu: 3Kiliu baga le ka kam samba aban sibara ka Taikamanua, Ukkuita samba sibara kai Tuhan Yesus Kristus masipaalei kam. 4Sarat kusuraki le Taikamanuangku, senen kurepdep ekeu ka panindogatku, 5akuarep poi nuntut bagam ka tubuda sia sipunenan samba tonem bagam kai Tuhan Yesus. 6Panindogatku, bule pasambaatnu ka bagat tonem baga bailiu masibaraake puaagai ka simaeru ka talagata ka bagat Kristus. 7Bulat abeu angkat bagaku samba pusuibiat kalulut nuntut bagam, lulut anukulaake bagada sipunenan, ale saraina. 8Ia te lulunia, kenanen ka bagat Kristus bulat maeme aku masitoneake kekeu simateu galaiakenennu, 9tapoi kalulut nuntut baga, maeru pei le kutiddou nia ka tubum. Aku nene, Paulus, simabaja, ai pei bagei kineneiget tupenjaraake kalulut Kristus Yesus, 10kutiddou kekeu pagalaiat togaku sinutuakenenku ka bagat penjara, ia te si Onesimus. 11Siburu ta anai kaunu nia, kineneiget geti abeu kaunu nia samba kauku nia. 12Kukoiniake nia minca kekeu -- nia, ia te kanuntuat bagaku --. 13Siobaku le bai nia kuddu le nia ka tubuku, bule ipasikeli aku punu tubum burut katupepenjaraku kalulut Katuareman Simaeru, 14tapoi ke ta teu bagam, ta koba kugalai apa pa, bui kele sipaksa le nugalai simaeru, ka teu baga le. 15Baleu ia pa lulunia aitusaraake nia goiso ka tubum, bule nusilo nia teret buruburu, 16taan kele pagugulet, tapoi saliu pei le pagugulet, kele saraina kilibet bagangan le, kaku mauktukngan aku, sara pei kekeu, ka pusirimanuaat samba leu ka bagat Tuhan. 17Oto ke nuaddeake aku aleinu sikere tonem baga, oto silo nia kele aku. 18Samba ke ai apa pa selenia ele utaknia ka tubum, kaku le addeake sangamberinia! 19Aku, Paulus, masibulatnake nia ka surat sinurat kabeiku: Ai leu kubaya nia. (Puutaknu ka tubuku geti, ia te tubum, taan leu kukukua.) 20Ale saraina, eddangan kupuuktungi sibara kekeu ka bagat Tuhan: Kulaake bagaku ka bagat Kristus! 21Tonem bagaku ka reddetnu, ia te akusuratnake surat nene kekeu, kuagai poi saliu pei le sikuaku nene nugagalaiake. 22Ka bagat nene tarekngake pugogoiatku; kukaroni poi kalulut panindogatmui tutotoiliake aku ka kam. 23Sege salam Epapras kekeu, aleiku sangapenjara kalulut Kristus Yesus, 24samba sibara kai Markus, Aristarkhus, Demas, Lukas, aleiku sangagalajet. 25Kiliu bagat Tuhan Yesus Kristus masipaalei ketsatmui!

will be added

X\