PILIPPI 2

1Oto kalulut ka bagat Kristus ai nganturat, ai pusuibiat nuntut baga, ai pasambaat Ketsat, ai nuntut baga samba katet baga; 2kalulut nene sutnake kam angkat bagaku ka bagat nene: bule sisara paatuat kam, sara nuntut baga, sikere baga, sara ailiakenen. 3Bui tugalai masigaba uktuk tubu ele katuumunan siboboi. Tapoi bule ka epet paatuat senemui masiaddeake sabagei pei le abeu bele pei tubumui. 4Samba senemui bui sarat uktuk tubunia ipasikeli, tupaatu leu sabagei. 5Kau nupupaatuat kam kele pupaatuanan Kristus: 6Kenanen makere nia ka Taikamanua, ta aiaddeake pukekerenia ka Taikamanua kele uktuk keraet, 7tapoi aiputata le tubunia, putubuat pagugulet le aiala bailiu makere ka sirimanua. 8Samba ka bagat pusisirimanuania, aipaepean tubunia samba masireddet pat matei, bulatnia teret matei ka loina siliktenga. 9Ia te lulunia aibuakngake nia simakope Taikamanua samba aipanguruatnake ka tubunia oni sisaliu sangamberi oni, 10bule ka onin Yesus murekkuk sangamberi bokkoloda sikuddu ka sorga, ka polak samba taikabaga, 11samba sangamberi lila masibulatnake: Yesus Kristus ia te Tuhan, katulatsanan Taikamanua Ukkui. 12Ale sasaraina kilibet bagaku, kele kipa reddetmui sanganantania, riuriuake kam nupasikeli kam puaragatmui ka bagat loto samba geret tubu, ta sarat ka teteret ai aku ka talagamui, tapoi sara pei kineneiget ka teteret areu aku; 13Taikamanua le poi sibaraake ka bagamui puooba samba ioi nugalai kam siripot teu bagania. 14Sangamberinia galai kam si ta ngungu samba paukelat, 15bule si ta kuat tubu kam samba si ta lolit, tatogat Taikamanua si ta loloiet ka talagat reddenan sikatai paatuat samba simapepepe nene, bule nuputoro kam ka talagada kele panyanyat ka polak nene, 16pagalu ainuukkaake kam tiboiet purimanuaiat, katuumunanku ka gogoi Kristus, bule ta masibbu pababalauku samba ta siboboi pusaggoatku. 17Tapoi kenanen tupiliake logauku bailiu buluakenen samba panguruat tonem bagamui, maangka le bagaku samba muangka baga pasamba kam sangamberimui. 18Kam leu buita muangka baga, muangka baga pasamba aku. 19Tapoi kukaroni ka bagat Tuhan Yesus maruei le kukoiniake si Timoteus ka kam, bule imasanang paatuatku kuarep sibabara pagalaiat kam. 20Aipoi ta anai sabagei aleiku sikere paatuat kele nia, simauku baga masipasikeli kam. 21Aipoi sangamberida sarat uktuk tubuda le ragagaba, ta ka Kristus Yesus. 22Anuagaian kam topitnia, bulat kele toga ka ukkui le iromake aku ka bagat masipasikeli Katuareman Simaeru. 23Nia te kukaroni koiniakenenku simaruei, akuagaian bai kipa pagalaiat pakaroku, 24tapoi ka bagat Tuhan matonem bagaku, aku leu momoi aku simaruei. 25Tapoi kupaatu maeru le kukoiniake si Epaproditus ka kam, ia te sarainangku samba aleiku mugalai samba aleiku pasaggak sikoiniakenenmui masiromake aku ka galajetku. 26Aipoi bulat airepdepman kam sangamberimui samba mareureu bagania, kalulut aarepmui pubebesinia. 27Bulatnia, amabesi nia malegere matei; tapoi makate le bagat Taikamanua ka tubunia, samba ta sarat nia, aku leu, bui ituppai minca reureu bagaku. 28Ia te imaoola bagaku kukoiniake nia, bule imaangka bagamui nuitco kam nia samba imakula kaku reureu bagaku. 29Oto silo kam nia ka bagat Tuhan ka angkat baga, samba suru kam sirimanua kele nia nene. 30Kalulut galajet Kristus ai le goiso imatei samba ibuluake engania masisutnake simagulai pei le pasikelatmui ka tubuku.

will be added

X\