MATEUS 8

1Kele aitugorosot Yesus barania ka leleu, tutrangan nia sirimanua simigi. 2Ia geti oi sara simabogbong murappo ka matania kuanangan, "Noba bai nia Tuan, ta isosoppi nualeake aku." 3Totoiakenangan kabeinia Yesus irape nia kuanangan, "Kuoba, kauan numale!" Malenangan leu et bogbongnia. 4Kuanangan ka matania Yesus, "Pagaba, bui nupoiliat nia ka kasei pa; kenan le nupaitco tubum kai imam, lepa buluakenungan buluakenen sitoneakenen Mose, katuaggaiat ka sia." 5Kele aituguru Yesus ka Kapernaum, oi kapiten tentera manindou ka matania, kuanangan, 6"Tuan, paguguletku ai nia memerep ka lalep lulut sakitnia, makope besinia." 7Kuanangan ka matania Yesus, "Ai leu kuoi kualeake nia." 8Aleginangan nia kapiten tentera, "Ta mateu aku Tuan, nutuguru ka lalepku; kua le sangakuanan, ta isosoppi imale paguguletku. 9Aipoi sirimanua paneineiet le aku, kaku leu ai tentera paneineietku. Ke kukua ka sara, 'Kenan!' einangan leu et; samba ka sabagei, 'Konan!' oinangan leu et; ka paguguletku, 'Galai nene!' galainangan leu et nia." 10Kisei le ka bagania Yesus aiarep tiboiet nene. Kuanangan ka matada sipasitutut nia, "Beri ka tai Israel ta akusese kopet tonem baga kele nene. 11Kukua nia ka matamui: Maigi te siooi sibara ka kabelaiat sulu samba ka kabelekat sulu mukom ka Purimataat Sorga sambada si Abraham, si Isak samba si Yakob. 12Tatogat purimataat geti turiribbaiake le ka simagepgep ka bebe; sedda te rapusosou samba iputatangat sotda." 13Lepa kuanangan Yesus ka matat kapiten tentera, "Katoilingan, babarangan kekeu siripot tonem bagam." Ka jam nenda leu et ale paguguletnia. 14Kele aituguru Yesus ka lalep Petrus, itconangan aimemerep talikut Petrus sinanalep lulut roketnia. 15Rapenangan kabeinia Yesus, tata roketnia. Tusurunangan masipuuku Yesus. 16Kasoibokat, taroakerangan ka matat Yesus maigi pinasaileu sanitu; usiakenangan leu sanitu ka geget tiboietnia, samba ialeake sangamberi simabesi. 17Aibara nene, bule ipuaili tiboiet sinegeakenen nabi Yesaya sipasikukua, "Nia le amasibairat oringenta samba masiorik besita." 18Kele aiitco Yesus sirimanua simigi sigoilik nia, kuanangan raputalipo ka sila. 19Lepa oi sara siagaisurat kuanangan ka matania, "Kutut ekeu Guru, kaipa kaipa nuei!" 20Kuanangan ka matania Yesus, "Lamusek ai ugunia, uma ai rumunnia, Togatsirimanua geti ta anai katubujungan utenia." 21Ai leu sara ka talagat sipasiuluinia masikua ka matania, "Tuhan, obaake boiki kuei masirateiake ukkuiku." 22Kuana le ka matania Yesus, "Tutnan aku, eddania simamatei masirateiake simamateira." 23Lepa janang Yesus ka abak, sipasiuluinia leu masitut nia. 24Tulut akenangan rusa simapiret ka koat, pat sebuinangan abakda onu; Yesus geti ai le nia memerep. 25Ia geti geugeurangan nia sipasiuluinia kuarangan, "Tuhan, romake, mamatei sita!" 26Kuanangan ka matada, "Angoi, maloloto kodda kam, kam simagulai tonem baga?" Suru nia, asenangan rusa samba koat malebaknangan, nem lepa. 27Tenan le kisei ka bagada sirimanua, kuarangan, "Apa le pa sirimanua nene, rusa samba koatnan le kodda irereddet ngangania!" 28Kele aisege Yesus ka sila ka laggaira tai Gadara, oi rua pinasaileu sanitu sibara ka ratei masipaseseake nia. Bulat kalotoakenen le sia, pat beri sara simaeme tusabau ka enungan nenda. 29Itcora le Yesus, pugereirangan masikua, "Apa nuaala se Togat Taikamanua? Masipaore kai enan ta iaaili teterenia?" 30Ka reunan goiso ai sangamungkuat sakkoilo, aimasigagaba kan. 31Sanitu nenda masitiddou ka Yesus kuarangan, "Nuusiake geti kai, ka bagat sakkoilo nenda le kau kai." 32"Kenanan kam!" ngangan Yesus. Belarangan leu et, ei sia ka sakkoilo. Sangamberinia sakkoilo nenda barania ka tikkara teipu bujuu ka koat, loulou. 33Tui sia sipasijajago sakkoilo, ei sia ka laggai; nunuakerangan sangamberi sibabara, samba leu pagalaiat pinasaileu sanitu. 34Belarangan sangalaggaiat masitagetnake Yesus. Kele araitco nia, tiddourangan ikaddiuake laggaira.

will be added

X\