MATEUS 4

1Lepa ambitnangan Yesus Ketsat ka simatangeu bule isibo nia Sanitu. 2Kele aipupuaso epat pulu ngatago epat pulu ngasoibo malajenangan. 3Ia geti oi aioi sipasisibo kuanangan ka matania, "Ke Togat Taikamanua ekeu, kua le ibailiu roti pabukkubukku nene." 4Aleginangan nia Yesus, "Atusuratnakean: Ta sarat kan iririmanuaake sirimanua, senen tiboiet sibebela ka ngungun Taikamanua le." 5Lepa ambitnangan nia Sanitu ka Laggai Sipunenan, rioakenangan nia ka teitei Uman Taikamanua. 6Kuanangan ka matania Sanitu, "Ke Togat Taikamanua ekeu, ribbaiake tubum ka polak, atusuratnakean poi, 'Ikokoiniake te malaikania Taikamanua kalulut ekeu, ratoddai ekeu ka kabeira, bui itusoksok rerem ka bukku.' " 7Kuanangan ka matania Yesus, "Atusuratnakean leu, 'Bui nusibo Tuhan, Taikamanuam.' " 8Lepa ambitnangan nia minca Sanitu ka leleu simakope buak. Sausaunangan ka matania sangamberi purimataat polak samba pulatsanannia. 9Kuanangan ka matania, "Sangamberinia nene kuaake kekeu, ke murappo ekeu nupanindogi aku." 10Kuanangan ka matania Yesus, "Kenan katuitui Sanitu! Atusuratnakean poi: Tuhan Taikamanuam le panindogietnu, sarania le reddenennu!" 11Lepa kaddiuakenangan nia Sanitu, oirangan leu samalaika masipuuku nia. 12Kele aiarep Yesus atupenjaraakean si Yohannes, ei nia ka Galilea. 13Kaddiuakenangan Natsaret ei nia mukuddu ka Kapernaum ka bebet koat ka polakda tai Sebulon samba Naptali, 14bule ipuaili tiboiet siniboi nabi Yesaya sipasikukua, 15"Polak Sebulon samba Naptali, enungan sieei ka koat, ka silat Yordan, Galileat sipuarat sabulungan! 16Bangsa sipukukuddu ka gepgep araitcoan pato simatoro! Ka sia sipukukuddu ka laggai iggobiet kamateiat amutorongan pato!" 17Barania ka teteret nenda taddaakenangan Yesus mungantoman kuanangan, "Bauake kam paatuatmui amalegerengan poi Purimataat Sorga!" 18Aimugegejek Yesus ka bebet koat Galilea, itconangan rua sipusasaraina, ia te si Simon sipuoni leu si Petrus samba baginia si Andreas, ai sia mujajarik ka koat, sipasiiba poi sia. 19Kuanangan ka matada Yesus, "Konan kam tut kam aku, kubailiuake kam sipasijajalo sirimanua." 20Kaddiuakerangan leu jarikda, tutrangan Yesus. 21Tui nia barania sedda, itconangan minca rua sipusasaraina si Yakobus samba si Yohannes tatogat Sebedeus, ai sia ka abak samba ukkuira si Sebedeus airasusubbai jarikda. Sogainangan sia Yesus. 22Kaddiuakerangan abak samba ukkuira, tutrangan Yesus. 23Ia geti gejenginangan sangalio Galilea Yesus, gelaiakenangan sia ka uma parurukatda, paarepnangan Katuareman Simaeru pagalaiat Purimataat Taikamanua samba ialeake sene ngamata besi samba malara. 24Maarepnangan katuaremannia ka sangalio Siria; taroakerangan leu ka matania sangamberi sirimanua simaluluk, sipasioorik sene ngamata besi samba gejat baga: pinasaileu sanitu, siroro samba simasakit; aleakenangan sia sangamberida. 25Tutrangan nia sirimanua simigi sibara ka Galilea, ka Dekapolis, ka Yerusalem, ka Yudea samba ka silat Yordan.

will be added

X\