MATEUS 28

1Kappulu gogoi Sabbat, ka patokat gogoi siboiki menggui nenda, ei si Maria Magdalena samba si Maria sara masibalou ratei. 2Sinulut bara ngeungeu polak sabeu, atugorosotnan poi sara malaikat Tuhan barania ka sorga, guilunangan bukku matatbaliu ratei, tukku nia ka uddutnia. 3Kean le bila matania, leppeinia mabulau ke kapu. 4Lotora ka tubunia sipasijajago pugeretnangan tubuda, kean le simamatei sia. 5Kuanangan malaika ka matada tainanalep, "Ba maloloto kam! Kuagai ainugagaba kam Yesus siniliktengaakenen. 6Taan anai nia sene, atusurungan nia kele sikuania. Konan nuitco kam kudduat katugalangannia. 7Olaake kam mei ka sipasiuluinia nusegeake kam katususurunia ka simamatei. Nia le muboboiki ka kam ka Galilea; sedda geti itcomuian nia. Repdep kam, akukuangan te ka matamui." 8Ia geti olaakerangan mutuitui ka ratei ka loto pagalu angkat baga sabeu, apabalau le sia rasegeake nia ka sipasiului Yesus. 9Tulut paseseakenangan sia Yesus kuanangan, "Salam ka kam." Rengei sia lakkaiakerangan rerenia, purapporangan ka matania. 10Lepa kuanangan ka matada Yesus, "Ba maloloto kam, kenan le kam nusegeake kam nia ka sasarainangku raei ka Galilea; sedda geti itcorangan aku." 11Ai sia memei tainanalep, ei leu et piga pa tai tentera sipasijajago ratei ka kota masisegeake ka tai imam sabeu sangamberi sibabara. 12Parururangan tai imam sabeu sambada tai bajara tai Yahudi. Ka keret bagada kaurangan bulagat simigi ka tai tentera, 13kuarangan, "Kua le kam: Ai kai memerep sinoibo, oi sipasiuluinia masitakkou nia. 14Ke iarep geti si gubernur, ai leu kupusumi kai nia, bui imageja bagamui." 15Silorangan bulagat tai tentera galairangan leu kele singanturuakenen ka matada. Mararatnangan tiboiet nene ka tai Yahudi teret kineneiget. 16Oto sia sipasiului sipulusara ei sia ka Galilea, ka leleu kele sikuat Yesus ka matada. 17Kele araitco Yesus purapporangan ka matania, tapoi ai sabagei simakarat baga. 18Ia geti rengei Yesus kuanangan ka matada, "Atuakean kaku sangamberi gege ka sorga samba ka polak. 19Oto kenan kam ka sangamberi bangsa nubailiuake kam sia sipasiului aku. Rau kam sia ka onin Ukkui, Toga samba Ketsat Sipunenan. 20Pangantoman kam sia masireddet sangamberi sitoneakenenku ka matamui. Repdep kam, ai le kupaalei kam senen gogoi teret kalepakat polak."

will be added

X\