MATEUS 27

1Kele aimapato, purapatrangan tai imam sabeu samba tai bajara tai Yahudi, teuakerangan masimateiake Yesus. 2Ia geti kaberangan nia, ambitrangan nia rasegeake nia kai gubernur Pilatus. 3Kele aiitco nia si Yudas sipajo Yesus, ramamateiake le nia, oleinangan bagania, toiliakenangan bulagat sitelupulu perak ka tai imam sabeu samba tai bajara tai Yahudi. 4Kuanangan, "Amajongan aku akusegeake sirimanua si ta jo." Alegida le nia, "Apananmai te nenda, ekeuan le ipagaba nia!" 5Gikgikngakenangan leu bulagat perak ka bagat Uman Taikamanua tui nia, ei nia masitiggot lolokkatnia. 6Ia geti alarangan bulagat tai imam sabeu kuarangan, "Takeikei takau nia bulagat Uman Taikamanua, bulagat logau le poi." 7Kele aipakere bagada kaurangan nia masisaki Polak Tukang Pario kaunenda rateira taitoi. 8Ia te lulunia aituoniake polak nenda "Polak Logau" teret kise. 9Kisedda te ipuaili tiboiet sikuat nabi Yeremia, "Alarangan leu telupulu bulagat perak, ia te sakit sara sirimanua siripot siteuakenen ka tai Israel, 10kaurangan nia sakit polak tukang pario, kele sitoneakenen Tuhan ka mataku." 11Ia geti rio Yesus ka matat gubernur Pilatus, nounounangan nia si gubernur, "Ele, rimatada tai Yahudi leu ekeu?" Aleginangan nia Yesus, "Anukuangan." 12Panganduatda tai imam sabeu samba tai bajara tai Yahudi geti, beri sara aialegi. 13Ia geti kuanangan ka matania si Pilatus, "Ta nuaarep kopet iginia rajoake ekeu?" 14Tapoi ta aialegi Yesus beri sangakuanan, pat kisei bagat gubernur. 15Amatukelengan kai gubernur senen Punen Paska ibelaake sara sipenjaraakenen siripot siobat bagada simigi. 16Ka teteret nenda ai ka penjara sara simaarep katai sipuoni si Barabbas. 17Kele aramaruru sirimanua simigi kuanangan ka matada si Pilatus, "Kasei siobamui kubelaake ka kam, si Barabbas ele Yesus kuanenda Kristus?" 18Aiagaian poi lagat bagada le arasegeake Yesus ka tubunia. 19Ka teteret aimuuddet si Pilatus ka uddenan pasiukuman oi tone sibara ka sinanalepnia masikua, "Bui nugalai apa pa ka tubut sirimanua simaroipo nene, maigi poi akuorik ka pangamutet soibo nene kalulut nia." 20Tai imam sabeu samba tai bajara tai Yahudi geti ratubbui simigi bule si Barabbas ratiddou tubelaake, Yesus geti tumateiake le. 21Kuanangan ka matada si gubernur, "Kasei ka sirua nene nuoba kam kubelaake ka kam?" Kuarangan, "Si Barabbas." 22Kuanangan ka matada si Pilatus, "Oto kipangan le kugagalai ka Yesus kuanenda Kristus?" Kuarangan sangamberida, "Siliktengaake le nia." 23Kuanangan si Pilatus, "Aponia poi jo aigalai?" Pugereirangan simakope, "Siliktengaake le nia!" 24Kele aiitco si Pilatus siboboi le tiboietnia, memei le makokope pulalamaura, alanangan oinan buinangan kabeinia ka matada simigi kuanangan, "Ta iaaili aku jo ka logau sirimanua nene; kam le iaaili!" 25Alegirangan nia sangamberida, "Kaian le masioorik logaunia samba tatogamai!" 26Lepa belaakenangan si Barabbas ikau nia ka sia; Yesus geti ikau rabobo, lepa segeakenangan nia rasiliktengaake nia. 27Ia geti ambitrangan Yesus tai tenterat gubernur ka kantor gubernur, ruruakerangan leu saaleira ragoilik Yesus. 28Golokrangan leppeinia, leppeiakerangan leppei simabonan ka tubunia. 29Tikairangan rui kiritnia kaurangan nia ka utenia, kaurangan tutura ka kabeinia sikattoet, purekkukrangan ka matania masipaloloi nia kuarangan, "Salam, Rimatada tai Yahudi!" 30Lujirangan nia, alarangan tutura ka kabeinia boboakerangan nia ka utenia. 31Lepa arapaloloi nia, golokrangan leppei simabonan, kaurangan minca leppeinia ka tubunia, ia geti ambitrangan nia itusiliktengaake. 32Kele arabela ailirangan sara tai Kirene sipuoni si Simon. Kaurangan nia ibairat siliktengan Yesus. 33Ia geti sege sia ka sara kudduat sipuoni Golgota, tibonannia; Leleu Lakkupat. 34Kaurangan lonia anggur sigalu lappegu. Kele ainanam nia ta ioba ilo nia. 35Lepa arasiliktengaake nia, parubeirangan bibilet tubunia sipauktukngakenen. 36Ia geti kuddu sia sedda rajago nia. 37Ka pata ipot utenia raottotnake surat paluluat aituukum nia, "Nene te Yesus Rimatada tai Yahudi." 38Lepa siliktengaakerangan leu et rua sipasimamatei ka bebet Yesus, sara kai kattoet, sara kai katsiunia. 39Sia situsasabau sedda masipaloloi nia, pagilikrangan utera, 40kuarangan, "Ekeu sioba masiragatnake Uman Taikamanua samba masirioake nia ka bagat telu ngagogoi; belaake tubum, ke Togat Taikamanua bai ekeu, gorosotnake ekeu ka siliktenga!" 41Kisedda leu et tai imam sabeu, siagaisurat samba tai bajara tai Yahudi ragegei Yesus, kuarangan, 42"Sabagei airimanuaake, tubunia geti ta momoi irimanuaake! Rimatada tai Yahudi poi nia, kauan igorosotnake tubunia ka siliktenga, imatonem bagamai ka tubunia. 43Matonem poi bagania ka Taikamanua kau ibelaake nia Taikamanua ke ioba nia Taikamanua. Aikua poi, 'Togat Taikamanua le aku.' " 44Beri sipamamatei alei Yesus tusiliktengaake leu masipaloloi Yesus. 45Ia geti magepgepnangan sangalio polak barania ka bobo pulu rua teret bobo telu. 46Bobo telu kasoibokat pugereinangan Yesus, "Eli, Eli, lama sabakhtani?" tibonannia, "Taikamanuangku, Taikamanuangku, nukakaddiuake kodda aku?" 47Kele araarep nia sipuririo sedda kuarangan, "Aisosogai si Elia." 48Pabalaunangan sara ka talagada masiala romot, somakenangan nia ka anggur simalaga, kokkokngakenangan nia ka labbaet kaunangan ilo nia Yesus. 49Tapoi sabagei masikua, "Bola boiki, taitcoake kam nia, baleu moi si Elia iromake nia." 50Pugereinangan minca sabeu nganga Yesus, sege isegeake engania. 51Ia geti mabiritnangan komang kekere ka Uman Taikamanua barania ka pata aili ka epe bailiu rua. Mangeungeunangan polak, papokpoknangan bulak, 52tubukanangan parateiratei, samba maigi sirimanua sipunenan simamatei atusuru. 53Kaddiuakerangan ratei; ia geti kele aitusuru Yesus, ei sia ka laggai sipunenan masipatoila tubu ka simigi. 54Kele araitco ngeungeu polak samba sangamberi sibabara kapiten tentera samba tenterania sipasijajago Yesus malotorangan simakope kuarangan, "Bulat Togat Taikamanua leu bai sinene." 55Maigi leu sedda tainanalep sipasiitco ka simareunan, sipasitutut Yesus barania ka Galilea masipuuku nia. 56Ka talagada ai si Maria Magdalena, si Maria inan Yakobus samba si Yosep, samba inanda tatogat Sebedeus. 57Kasoibokatnia oi sara simakayo tai Arimatea, sipuoni si Yosep, sipasiului Yesus leu nia. 58Ei nia kai Pilatus masitiddou tubut Yesus. Kuanangan si Pilatus rakau tubut Yesus ka sia. 59Alanangan tubut Yesus si Yosep tabutnangan nia komang juto simalina. 60Galakngakenangan nia ka ratei sibau sikailunia bulak kaunennia rateinia. Lepa guilunangan sara bukku sabeu matatbaliu ratei, tui nia. 61Si Maria Magdalena geti samba si Maria sara ai sia mukukuddu sedda ipot ratei. 62Pato, pasat gogoi panarengan, parururangan tai imam sabeu samba tai Parise ka matat Pilatus 63kuarangan, "Kurerepdep pei le kai tuan, tiboiet sipasipepe ai pei le nia muririmanua, kise aikua, 'Pasat telu ngagogoi suru aku.' 64Oto kua le rajago ratei teret gogoi sikatelunia, babara momoi sipasiuluinia ratakkou nia, lepa kuarangan ka simigi, 'Atusurungan nia ka simamatei.' Bailiu patajuat sikateitei pei le makatai bele pei ka siboiki." 65Kuanangan ka matada si Pilatus, "Koi sipasijajago, kenan jagongan kam teret siagaimui." 66Eirangan leu et raparon ratei, rakau toggaiat ka bukku takket ratei samba ragalak sipasijajago sedda.

will be added

X\