MATEUS 26

1Kele ailepa aitiboake sangamberi tiboiet nene Yesus, kuanangan ka matada sipasiuluinia, 2"Anuagaian tebai kam, ai le rua ngagogoi iaili Punen Paska. Ka teteret nenda segeakerangan Togatsirimanua itusiliktengaake!" 3Lepa parururangan tai imam sabeu samba tai bajara tai Yahudi ka uman imam sabeu Kayafas, 4masipatiboji kipa ragagalai ioi ralaba Yesus ramateiake nia. 5Tapoi pele nganganda, "Bui ka matat punen, babara pulamagat sirimanua simigi." 6Ka teteret ai Yesus ka Betania ka lalep Simon simabogbong, 7oi sara sinanalep siambit sangabulibuli tula simasingin simakeppu saki. Uruakenangan nia ka utet Yesus ai nia mukokom. 8Kele araitco nia sipasiului, mangoingoinangan bagada kuarangan, "Tupasisibbu kodda nene? 9Ke tusakiake makeppu sakinia, bulagatnia tukau ka simageba." 10Iagai le poi Yesus pinaatuda kuanangan ka matada, "Nugegejaake kodda kam bagat sinanalep nene? Simaeru le poi aigalai ka tubuku. 11Ai le turerere kababarat simageba ka talagamui, aku geti ta mariuriu ka bebemui. 12Aipoi uuruakena tula nene ka tubuku, ia te masitarekngake katurateiatku. 13Kukua nia ka matamui: Kaipa kaipa le tupaarep Katuareman Simaeru nene ka sangalio polak, sigalai sinanalep nene leu tununuake, masirepdep nia." 14Lepa ei sara ka sipulurua sipasiului sipuoni si Yudas Iskariot ka tai imam sabeu 15kuanangan, "Apa nuaake kam kaku, ke kusegeake Yesus ka kam?" Adderangan telu pulu perak kaurangan nia ka tubunia. 16Ka teteret nenda gabanangan tetere sipasesese isegeake Yesus. 17Ka gogoi siboiki pukoman Roti Sitasioman, oi sipasiului ka matat Yesus kuarangan, "Kaipa siobanu kupatarek kai kekeu pukoman Paska?" 18Kuanangan Yesus, "Kenan kam ka kota kai anu, kua kam ka matania, 'Aikua si Guru, malegerengan tetereku, ka lalepnu te kupupapaska kai sipasiuluiku.' " 19Galairangan leu sipasiului kele sitoneakenen Yesus ka matada, tarekngakerangan komen Paska. 20Kele aimasoibo, puuddetnangan Yesus mukom sambada sipasiuluinia sipulurua. 21Ai sia mukokom panibonangan Yesus, "Kukua nia ka matamui: Ka talagamui ai sara sipasisesegeake aku." 22Mareureunangan bagada simakope sipasiului; taddaakerangan senenda masikua ka matat Yesus, "Taleu aku, Tuhan?" 23Aleginangan nia Yesus, "Sikere kai masisuusuuake roti ka mangko, ia te sipasisesegeake aku. 24Togatsirimanua geti kirenangan mamatei nia kele sitususurat pagalaiat tubunia. Tapoi paan te ka sirimanua nenda sipasisesegeake Togatsirimanua. Maeru pei le ka sirimanua nenda ta mututu matania." 25Kuanangan si Yudas sipasisesegeake nia, "Taleu aku, Guru?" Kuanangan ka matania Yesus, "Anukuangan tubum." 26Ai sia mukokom, alanangan roti Yesus kuanangan sura, paabbonangan nia, kaunangan nia ka sipasiuluinia kuanangan, "Ala kam, kom kam tubuku te nene." 27Lepa alanangan pulokat kuanangan sura, kaunangan nia ka sipasiuluinia kuanangan, "Lo kam sangamberimui ka pulokat nene. 28Logauku te nene, pakerekat baga sibau, sipiliakenen lulut simigi pasiappet jo. 29Kukua nia ka matamui: Barania kineneiget taan kulolo minca anggur nene; ka purimataat Ukkuikungan le geti kulolo nia sambata anggur sibau." 30Lepa arauraiake urai pasiumun, bela sia raei ka leleu Tula. 31Ia geti kuanangan ka matat sipasiuluinia Yesus, "Sangamberimui te mabebele baga ka tubuku soibo nene; atusuratnan poi, 'Kubobobo te sipasijajago, pusabunangan mungkuat biribiri.' 32Atusurungan geti aku, puboikikungan ka kam ka Galilea." 33Aleginangan nia si Petrus, kuanangan ka matat Yesus, "Kenanen bai sangamberida mabele baga ka tubum aku geti ta mabebele bagaku." 34Kuanangan ka matania Yesus, "Kukua nia ka matam: Soibo nene, tapei mutotokki gougou anupakelengan aku telu ngaminca." 35Kuanangan si Petrus, "Kenanen bai sambata matei, ta kupakekele ekeu." Sangamberida sipasiului kisedda leu arakua. 36Lepa ei Yesus sambada sipasiuluinia ka sara mone sipuoni Getsemane. Kuanangan ka matada sipasiuluinia, "Kuddungan kam se, mei aku sedda manindou." 37Ambitnangan si Petrus samba sirua togat Sebedeus aleinia. Reureu imareureu bagania, pugeretnangan tubunia. 38Lepa kuanangan ka matada, "Makope reureu bagaku, mamateian le; sean te kam tapumata sambata." 39Ei nia goiso ka mata, purapponangan manindou kuanangan, "Ukkui, ke momoi bai, sabauake le pulokat pangoringan nene ka tubuku, tapoi bui ka teu bagaku, ka teu bagam le." 40Soksoknangan minca ka sipasiuluinia ailinangan sia ai sia memerep. Kuanangan kai Petrus, "Kipa, ta momoi nuomake kam mumata sambata beri sangajam? 41Pumata kam, samba manindou, bui nubele kam ka pasisiboat. Maadja le poi ka sia ketsat, akkula geti masaggo." 42Lepa ei nia minca sikaruania manindou kuanangan, "Ukkui, ta geti momoi isabau aku pulokat pangoringan nene buita kulo le, teu bagam le." 43Ia geti oi nia minca ailinangan sia ai sia memerep kopet laulaura. 44Kaddiuakenangan sia minca iei manindou sikatelunia, kele sikuania leu et aikua. 45Lepa oi nia ka sipasiuluinia kuanangan ka matada, "Ai pei le kam memerep samba muari? Aiailingan te jamnia itusegeake Togatsirimanua ka kabeira sijo. 46Suru kam, sita kam. Amalegerengan nia sipasisesegeake aku." 47Ai pei le maninibo Yesus, oi aioi si Yudas sara ka sipulurua sambada sirimanua simigi sibara lanjau samba bobobo, siguguluakenenda tai imam sabeu samba tai bajara tai Yahudi. 48Sipasisesegeake nia aikauan patuaggaiat kise aikua, "Kasei geti kusigguk, ia te nulalaba kam." 49Einangan leu et si Yudas ka tubut Yesus, kuanangan, "Salam Guru," sigguknangan nia. 50Kuanangan Yesus, "Ale suruak, apa nuaala se?" Oi sia sirimanua simigi labarangan Yesus. 51Tapoi sara ka talagat sipasiului sipaaleiake Yesus, oppatnangan lanjaunia, teteakenangan nia ka pagugulet imam sabeu, seppirinangan talingania. 52Lepa kuanangan ka matania Yesus, "Sakbukngake minca lanjaunu; aipoi kasei sioppat lanjau, ka lanjau leu te imamatei. 53Ka bagam pa ta momoi kutiddou ka Ukkuiku ikoiniake kaku kineneiget pulu rua legion legei malaika? 54Kisedda bai, kipangan le ipuaili siniboi Surat Sipunenan sipasikukua buita ipuaili nene?" 55Lepa kuanangan Yesus ka matada sirimanua simigi, "Sipananae pa aku ka bagamui nuooi kam sibara lanjau samba bobobo masilaba aku? Senen gogoian le aku ka Uman Taikamanua mungantoman, ta anulaba kam aku. 56Tapoi aibara sangamberinia nene bule ipuaili sinuratnakenenda tai nabi." Lepa tui ratuitui sangamberi sipasiului kaddiuakerangan Yesus. 57Laba aralaba Yesus, taroakerangan nia ka matat Kayafas imam sabeu. Sedda amaruruan siagaisurat samba tai bajara tai Yahudi. 58Tapoi ai leu itutut nia si Petrus simareunan teret ka gerat lalep imam sabeu. Guru nia, kuddu nia sambada sipasijajago Uman Taikamanua masiitcoake kipa kalepakatnia. 59Ia geti gabarangan pasimunengan boko tai imam sabeu sambada sarapat sabeu, bule ioi ramateiake Yesus, 60tapoi ta arasese, kenanen maigi sia sipasimuneng boko. Kalepakatnangan le oi sia rua, 61kuarangan, "Aikua sinene, 'Momoi kuragatnake Uman Taikamanua samba kurioake nia minca ka bagat telu ngagogoi.' " 62Ia geti rio imam sabeu kuanangan ka matat Yesus, "Ta nuaalegi beri sara nganganda ranganduake ekeu?" 63Tenan le meng Yesus. Kuanangan minca imam sabeu ka matania, "Ka onin Taikamanua sipuririmanua kutiddou kineneiget ka bagat suppa: kua le kamatamai, ele Kristus ekeu, Togat Taikamanua ele taa?" 64Kuanangan Yesus, "Anukuangan. Tapoi kukua nia ka matamui, barania kise itcomuian Togatsirimanua muuddet isit kai kattoet Sipulugege moi ka tanairusa ka manua." 65Ia geti biritnakenangan leppeinia imam sabeu kuanangan, "Aipaloloian Taikamanua. Apanantangan le sipasimumuneng? Itco pei, anuarepman kam paloloiatnia. 66Kipa paatuatmui?" Alegirangan nia, "Mateuan tumateiake nia." 67Lepa lujirangan matat Yesus, bukurangan nia, sabagei masilippat nia. 68Samba rakua, "Poiliat pei ka kai Kristus, kasei sibobo ekeu?" 69Si Petrus geti ai nia mukukuddu ka gerat. Ia geti oi sara pagugulet sinanalep itagetnake nia kuanangan, "Ekeu leu et alei Yesus tai Galilea." 70Tapoi aipakele le si Petrus ka matada sangamberida kuanangan, "Ta kuagai sikuam." 71Ai nia memei ka matatbaliu gerat, itconangan nia minca pagugulet bagei, kuanangan ka matada sikuddu sedda, "Sinene leu et alei Yesus tai Natsaret." 72Paolenangan minca si Petrus masipakele, pusuppanangan, "Ta kuagai sirimanua nenda." 73Ta amauju, oi sia sipuririo sedda kuarangan kai Petrus, "Bulatnia ekeu leu et sara ka talagada, makoinong ka paninibom." 74Ia geti taddaakenangan masitelei tubunia samba musuppa, "Ta kuagai sirimanua nenda." Putokkinangan leu gougou. 75Repdepnangan si Petrus sikuat Yesus ka matania, "Tapei mutotokki gougou anupakelengan aku telu ngaminca." Belanangan leu ka gerat si Petrus, pusounangan simakope.

will be added

X\