MATEUS 20

1"Purimataat Sorga makere le ka sara tuan sieei mamancep pei le masigaba upaiet sipugagalai ka monen anggurnia. 2Kele aipakere bagada sangagogoi sangaropia upada, koiniakenangan sia mugalai ka monen anggurnia. 3Ka bobo siba simancep bela nia itconangan sabagei sipuririo si ta galai ka pasakiat. 4Kuanangan ka matada, 'Kam leu et, kenan kam mugalai ka monen anggurku, ai leu kuake upamui siripokatnia.' 5Eirangan leu et. Bobo pulu rua tugge samba bobo telu kasoibokat bela nia minca, kisedda leu et aigalai. 6Kele aibela ka legeret bobo lima, sesenangan sabagei sipuririo si ta galai kuanangan ka matada, 'Sarat puririoan le koi kam sangagogoian si ta galai?' 7Kuarangan ka matania, 'Ta anai siupaji kai.' Kuanangan ka matada, 'Oto kam leu et, kenan kam mugalai ka monen anggurku.' 8Kasoibokat, kuanangan si tuan sibakkat monen anggur ka mandurnia, 'Sogai sia sipugagalai, kaunungan upada, barania ka siooi sikateitei aili ka siooi siboiki.' 9Kele araoi sipugagalai ka bobo lima silorangan pasasangaropia sia. 10Lepa oi sipugagalai barania simancep, ka bagadangan le maiigi rasisilo. Oto pasasangaropia leu et arasilo. 11Kele arasilo nia, pungungukirangan si tuan. 12Kuarangan, 'Sia siooi sikateitei sangajam le ujunia arapugalai, tapoi anupakereake le sia ka kai simamomomo tubu samba siorik rakat sulu sangagogoi!' 13Kuanangan si tuan ka matat sara sipugagalai, 'Ale suruak, ta kupajojo ekeu; ta apakerean bagata pasasangaropia sangagogoi? 14Alaan upam, tui ekeu. Teu bagaku le ke kukau ka sikateitei nene kele igit siakeku kekeu. 15Ta pa momoi kugalai siobaku ka bakkatku? Ele maoro matam kalulut anggaiku?' 16Kisedda te sikateitei ibabailiu sipuboboiki samba sipuboboiki ibabailiu sikateitei." 17Kei manatara Yesus ka Yerusalem, sogainangan sipasiuluinia sipulurua sarada, kuanangan ka matada ka enungan, 18"Aian tebai sita mananatara ka Yerusalem, seddangan te itusesegeake Togatsirimanua ka tai imam sabeu samba siagaisurat raukum nia ukuman matei. 19Samba rasegeake nia ka sipuarat sabulungan bule rapaloloi, rabobo samba rasiliktengaake nia. Tapoi ka gogoi sikatelunia suru nia minca." 20Lepa oi inanda tatogat Sebedeus sambada tatogania murappo ka matat Yesus masisegeake tiddogetda. 21Kuanangan ka matania Yesus, "Aponia kiddietnu?" Aleginangan nia, "Bule nukua, ruada togaku nene muuddet sara kai kattoetnu sara kai katsiunu ka purimataatnu." 22Kuanangan ka matada Yesus, "Ta nuagai kam tiddogetmui. Momoi pa nulo kam ka pulokat pangoringan loketku?" Kuarangan ka matania, "Momoi." 23Kuanangan Yesus, "Nulolo tedda kam ka pulokat pangoringan loketku. Tapoi muuddet kai kattoet samba kai katsiuku, ta aku tuteteu. Aipoi sipuuddet sedda sarat sia pinatarek Ukkuiku le." 24Kele araarep nia sipasiului sipulu, mangoingoinangan bagada ka sirua sipusasaraina. 25Sogainangan sia Yesus kuanangan ka matada, "Nuagai kam, saute ka polak masipaneinei bangsada le sia, samba sia siabeu, mugege le ka tubuda. 26Ka kam geti bui kisedda. Ke ai ka talagamui sioba mubeunan kau le ibailiu nia sipuuku kam. 27Samba ke ai ka talagamui sioba muute, kau le ibailiu nia paguguletmui. 28Keleu Togatsirimanua ta mubeunan aioi, tapoi mupagugulet le samba masikau engania panebui simigi." 29Kele aibela Yesus sambada sipasiuluinia ka Yeriko, tutrangan nia sirimanua simigi. 30Ai rua simapeset sipukukuddu ka bebet enungan. Kele araarep katusasabau Yesus pugereirangan, "Tuhan, Togat David, kau imakate bagam ka kai!" 31Aserangan sia sirimanua simigi rapumengmeng. Tapoi memei le makokope rapugerei, "Tuhan, Togat David, kau imakate bagam ka kai!" 32Ia geti tokko Yesus, sogainangan sia kuanangan, "Aponia noba kam kugalai ka tubumui?" 33Kuarangan ka matania, "Bule itubuka matamai Tuhan!" 34Makatenangan bagat Yesus ka tubuda, rapenangan matada, maitconangan leu matada. Lepa tutrangan nia.

will be added

X\