MATEUS 2

1Kele aipututu matat Yesus ka Betlehem ka tobbou Yudea ka teteret rimata Herodes, oi ka Yerusalem tai kerei sibara ka kabelaiat sulu 2kuarangan, "Kaipa nia rimatada tai Yahudi sibau mututu mata? Akuitco poi kai panyanyatnia ka kabelaiat sulu, ia te akuoi kai murappo ka matania." 3Kele aiarep nia rimata Herodes tugegenangan samba sangamberi tai Yerusalem. 4Ruruakenangan leu sangamberi tai imam sabeu samba siagaisurat bangsa Yahudi, isenangan sia kaipa pututukat matat Kristus. 5Kuarangan ka matania, "Ka Betlehem ka tobbou Yudea, kise poi aisuratnake si nabi, 6'Ekeu Betlehem, ka tobbou Yuda, ta te sigoiso ekeu ka talagada tai rimata ka Yuda; kekeu le poi ibabara sara rimata sipaneinei bangsaku Israel.' " 7Lepa sogainangan tai kerei si Herodes pinakele, lelekngakenangan ka sia pigamoi aimatoila panyanyat nenda. 8Koiniakenangan sia ka Betlehem pele ngangania, "Kenan kam lelekngake kam sipulelelek pagalaiat sikolik, anusesengan geti kam nia, segeakemuian nia ka mataku, bule mei aku kaku murappo ka matania." 9Lepana le araarep ngangan rimata tui sia. Panyanyat leu siitcora ka kabelaiat sulu musumbulat ka sia teret ka ipot kudduat sikolik. 10Angka lepa bagada araitco panyanyat nenda. 11Tugururangan ka lalep, itcorangan sikolik samba si Maria inania; purekkukrangan murappo ka matania. Bukarangan salipara, kaurangan panguruatda ka tubunia ia te mas, kumanyang samba mur. 12Aipatonean poi sia Taikamanua ka pangamutet bui rasoksok minca kai Herodes, ka enungan bageian le araenung ratoili ka laggaira. 13Kurukda tai kerei, oi malaikat Tuhan kai Yosep ka bagat pangamutet sipasikukua ka matania, "Suru, ambit sikolik samba inania, katuitui kam mei ka laggai Misir, sedda le nukukuddu kam teret kuaku nia; aibebesiake poi si Herodes masigaba Toga imateiake nia." 14Ia geti suru si Yosep, ambitnangan sikolik samba inania soibo nenda leu et tui sia raei ka Misir. 15Pukuddurangan sedda teret matei si Herodes. Aibara nene, bule ipuaili siniboi Tuhan sinegeakenen nabi sipasikukua, "Ka laggai Misir le akusogai Togaku." 16Kele aiagai nia si Herodes patatajuda nia tai kerei, pugolunangan simakope. Lepa koiniakenangan ramateiake sangamberi tatoga ka laggai Betlehem samba ka sangalionia sirua ngarura beunanda teret ka sigoiso, siripot ujut ailelekngake nia ka tai kerei. 17Kisedda te ipuaili siniboi nabi Yeremia, 18"Amaarepman ka laggai Rama sou samba geri sabeu; aisosoibi poi tatogania si Rahel, ta iagai suibi, atataan poi sia." 19Kele aimatei si Herodes, lotsit malaikat Tuhan kai Yosep ka bagat pangamutet ka Misir 20kuanangan, "Suru, ala sikolik samba inania, nutoili kam ka laggai Israel, amateian poi sia sibesiake masimateiake sikolik." 21Tusurunangan si Yosep, ambitnangan sikolik samba inania ratoili ka laggai Israel. 22Kele aiarep si Yosep, si Arkhelaus le rimata ka Yudea silit ukkuinia si Herodes, malotonangan mei sedda. Aipatonean poi nia Taikamanua ka pangamutet, ka Galileangan le aiei. 23Sege sedda, pukuddunangan ka sara laggai sipuoni Natsaret. Kisedda te ipuaili siniboira tai nabi, ituoniake nia, "Tai Natsaret."

will be added

X\