MATEUS 19

1Kele ailepaake Yesus masitiboi sangamberi nene, kaddiuakenangan Galilea ei nia ka laggaira tai Yudea ka silat Yordan. 2Maigi sirimanua situt nia, aleakengan leu sia sedda. 3Ia geti oi tai Parise masisibo nia, kuarangan, "Momoi leu igalak sinanalepnia simanteunia ke ai apa pa paluluatnia?" 4Aleginangan nia Yesus, "Tapei anubasa kam, taddanangan aibaraake sirimanua Taikamanua aibaraakean sia simanteu samba sinanalep? 5Lepa kuanangan, 'Ia te lulunia ikakaddiuake ukkui samba inania simanteu iloplopmake tubunia ka sinanalepnia, bailiunangan sia sangaakkula.' 6Oto taan rua, sangaakkulaan le sia. Siloplopmakenen Taikamanua poi ta momoi ipasaraake nia sirimanua." 7Kuarangan ka matania tai Parise, "Oto aisurukatnake kodda si Mose masikau surat pagalangan, masigalak sinanalep?" 8Kuanangan ka matada Yesus, "Kalulut kelat paatuatmui le aiobaake kam si Mose masigalak sinanalepmui. Tapoi ta kirenangan kisedda. 9Kukua nia ka matamui: Kasei sigalak sinanalepnia ke ta kalulut paelenan, lepa putalimounangan ka sinanalep bagei, sipaeelet le nia." 10Kuarangan sipasiului ka matania, "Ke kisedda bai galainia simanteu ka sinanalep, maeru pei le bui tuputalimou." 11Kuanangan ka matada Yesus, "Ta sangamberi masisisilo tiboiet nene, sarat sia sipanguruanin Taikamanua le. 12Ai sitaioi mutalimou kalulut tutunangan matania kisedda; ai sitaioi mutalimou kalulut sigalai; ai leu sitaiputatalimou teu bagania kalulut masituturi Purimataat Sorga. Kasei siooi masiseseake, kau iseseake nia." 13Ia geti taroakerangan tatoga ka matat Yesus, bule irape samba itiddouake sia. Tapoi aragolu le sia sipasiuluinia. 14Kuanangan ka matada Yesus, "Obaake kam tatoga raoi kaku, ba kekera kam sia; sirimanua kele nene le poi sibakkati Purimataat Sorga." 15Ia geti rapenangan sia Yesus, lepa tui nia sedda. 16Ai sara sirimanua amoi ka matat Yesus masikua, "Guru, aponia galajet simaeru galaiakenenku bule kubakkati purimanuaiat sitaitatata?" 17Kuanangan ka matania Yesus, "Nunonounou kodda aku pagalaiat simaeru? Sarat Sara le simaeru. Ke noba tuguru ka purimanuaiat, reddet le surukat Taikamanua." 18Kuanangan, "Surukat kipa?" Aleginangan nia Yesus, "Bui nupamatei; bui nupaelet; bui nupanangkou; bui numunengake boko; 19suru ukkuinu samba inam; pununtuki baga aleinu sirimanua kele tubum." 20Kuanangan ka matania silainge, "Sangamberinia nene akureddetnan; apangan le simagulai kaku?" 21Kuanangan ka matania Yesus, "Ke noba numasun eru, kenan sakiake sangamberi bibiletnu, kaunungan bulagatnia ka simageba, bara ibara pukayoatnu ka sorga; lepa oi ekeu masitut aku." 22Kele aiarep tiboiet nene silainge, tui nia reureu bagania, simakope kayo le poi nia. 23Kuanangan Yesus ka matada sipasiuluinia, "Kukua nia ka matamui, bulat mabesi ka simakayo tuguru ka Purimataat Sorga. 24Kukua nia minca ka matamui: Onta pei le malabbei tubuluk ka matat susuilak ka simakayo tuguru ka Purimataat Taikamanua." 25Kele araarep nia sipasiului makeppunangan ka bagada kuarangan, "Oto kaseian le masisese puaragat?" 26Kinerenangan sia Yesus kuanangan, "Ka sirimanua bai nia ta momoi, tapoi ka Taikamanua geti sangamberinia le momoi." 27Kuanangan si Petrus, "Akukaddiuakean tebai kai sangamberinia masitut ekeu; oto aponia babara ka kai silinia?" 28Kuanangan ka matada Yesus, "Kukua nia ka matamui: Ka pasibaraat polak sibau, ke muuddet Togatsirimanua ka uddenan pulatsanannia, kam sipasitutut aku muuuddet leu kam ka pulurua uddenan purimataat masiukum sipulurua muntogat Israel. 29Samba senen sikaddiuake lalep ele saraina ele samaniu ele ukkui ele ina ele tatoga ele monenia kalulut oningku, isisilo minca sangotu ngaoleat, samba iikepmake purimanuaiat sitaitatata. 30Tapoi maigi sia sipuboboiki ibabailiu sikateitei samba sikateitei ibabailiu sipuboboiki."

will be added

X\