MATEUS 15

1Lepa oi piga pa tai Parise samba siagaisurat sibara ka Yerusalem ka matat Yesus masikua, 2"Angoi rapasabau aratda taikebbukatta sipasiuluinu? Taipasibubui kabei poi sia rapukom." 3Aleginangan nia Yesus, "Angoi nupasabau kam ka kam Surukat Taikamanua kalulut aratmui? 4Aikua poi Taikamanua, 'Suru ukkuinu samba inam,' samba 'Sipateleiji ukkui ele inania, buita tumateiake nia.' 5Tapoi kam masikua: Kasei sikua ka ukkui ele ka inania, 'Kei akenenku kekeu te nene, tapoi akukauan nia buluakenen ka Taikamanua,' 6taan leu isusuru ukkui ele inania. Oto anuputataan kam tiboiet Taikamanua kalulut aratmui. 7Kam sipatataju! Aisesengan tebai sinibalaakenen Yesaya pagalaiat kam, 8'Ka ngungunda le raumun aku bangsa nene, paatuatda geti areu kaku. 9Siboboi le rapaninindogi aku, surukat sirimanua le poi ranganganturuake.' " 10Ia geti sogainangan sirimanua simigi Yesus kuanangan ka matada, "Arep kam, lelekngake kam! 11Ta sitububuluk ka ngungu ilololitnake sirimanua, sibebela ka nganga le, ia te ilololitnake sirimanua." 12Lepa oi sipasiuluinia masikua ka matania, "Nuagai leu pubebelet bagada tai Parise kalulut tiboietnu?" 13Aleginangan nia Yesus, "Senen siureman taiuremen Ukkuiku ka sorga, tububurau le. 14Ba puuku kam sia. Paneinei sipeset le sia, masipalulu simapeset; oto ke sipeset ipalulu simapeset, bebele sia ruada ka guluggu." 15Kuanangan si Petrus, "Kolouake ka kai pasikat nene." 16Aleginangan nia Yesus, "Kam leu tapei makolou ka bagamui? 17Ta nuagai kam, sangamberi sitububuluk ka ngungu, ei le ka balugu, lepa bela minca? 18Tapoi sibebela ka nganga, sibara ka paatuat te, nenda le ilololitnake sirimanua. 19Ka paatuat le poi ibabara paatuat sikatai, pamamatei, paeelet, puuumun, pananangkou, paboboko samba asa. 20Nene te silolitnake sirimanua. Mukom taipasibubui kabei geti ta ilololitnake sirimanua." 21Lepa tui Yesus sedda ei nia ka laggaira tai Tirus samba Sidon. 22Ia geti oi sara sinanalep tai Kanaan sibara ka laggai nenda masiailiake Yesus pusoganangan, "Tuhan Togat David, kau imanuntu bagam kaku! Togaku siokko aipasasaileu nia sanitu, besi lepa tubunia." 23Tapoi beri alegina nia Yesus. Lepa oi sipasiuluinia masitiddou ka matania, "Kauan bai ituitui, sarat pugegereian le nia ka teiteita." 24Alegina le nia Yesus, "Sarat ka biribiri simalilimai ka uman Israel le aitukoiniake aku." 25Tapoi oi nia sinanalep purapponangan ka matat Yesus kuanangan, "Romake aku Tuhan." 26Aleginangan nia Yesus, "Ta pasese tuala katda tatoga ituribbaiake ka jojo." 27Kuanangan sinanalep, "Aisesengan tedda Tuhan, tapoi ai leu ikokom jojo porat kan sibebele ka tei mejat tuannia." 28Lepa kuanangan Yesus ialegi nia, "Ina, bulat abeu tonem bagam, babarangan kekeu siripot kiddietnu." Ka jam nenda leu et ale togania. 29Tuitui aituitui Yesus sedda, riringinangan bebet koat Galilea tatara ka leleu pukuddunangan sedda. 30Oirangan leu sirimanua simigi masitaroake ka matania simasakit, simajegeu, simapeset, taiagai manibo samba pabageibagei, galakngakerangan sia ka bebet reret Yesus, aleakenangan sia. 31Kisei le ka bagada sirimanua simigi masiitco rapanibo taiagai manibo, ramale simajegeu, rapuenung simasakit, ramaitco mata simapeset; umunakerangan leu Taikamanuan Israel. 32Lepa sogainangan sipasiuluinia Yesus kuanangan, "Amanuntungan bagaku ka sirimanua simigi nene, telu ngagogoian poi araomake mukuddu se ka tubuku, taan anai katda. Ta koba ratuitui taipukokom, mamatei sia laje ka enungan." 33Kuarangan ka matania sipasiuluinia, "Kaipa taaala kan ka simatangeu se masiektekngake igida kele nene?" 34Kuanangan ka matada Yesus, "Ai piga roti ka kam?" Alegirangan, "Ai pitu samba piga pa iba sigoiso." 35Kuanangan Yesus ka sirimanua simigi rapuuddet ka polak. 36Alanangan roti sipitu samba iba, kuanangan sura ka Taikamanua, paabbonangan nia kaunangan nia ka sipasiuluinia, sipasiului masiparubei ka sirimanua simigi. 37Pukomrangan leu sangamberida ektek. Lepa ruruakerangan legeira, sun pitu ngagaraga. 38Igida sipukokom ai epat ribu taimanteu, ta atuadde tainanalep samba tatoga. 39Lepa aratuitui sirimanua simigi, janang Yesus ka abak iei ka Magadan.

will be added

X\