1 Ka teteret nenda maarepnangan katuareman Yesus kai Herodes rimata ka Galilea. 2 Kuanangan ka matada sapaguguletnia, "Si Yohannes Sipasirarau te nene, atusurungan nia ka simamatei, ia te imakekerek." 3 Aiguguluakean poi si Herodes ralaba, rakabe samba rapenjaraake si Yohannes lulut si Herodias kalaleman Pilipus sarainania. 4 Aikua poi ka matania si Yohannes, "Ta pasese nuala si Herodias!" 5 Kei imamateiakean le nia, lotona le ka sirimanua simigi, arapunabingan poi si Yohannes. 6 Tapoi ka pasirepdeman pututukat matat Herodes, puturunangan togat Herodias siokko ka talagada. Bulat ioba bagania si Herodes, 7 pat pusuppanangan masikau ka tubunia apa le itiddou. 8 Ainganturungan poi nia inania kuanangan siokko, "Ake kaku sene ka bagat mangko utet Yohannes Sipasirarau." 9 Mareureunangan bagania rimata; tapoi kalulut suppania, araarepman pei bagei tairauma, kuanangan rakau sinindounia. 10 Koiniakenangan rasaggiri lolokkat Yohannes ka penjara, 11 ambitrangan utenia ka bagat mangko kaurangan nia ka siokko, kaunangan nia ka sia ka inania. 12 Lepa oi sipasiului Yohannes Sipasirarau, alarangan tubunia rateiakerangan nia. Lepa ei sia masisegeake ka matat Yesus. 13 Kele aiarep nia Yesus putuituinangan sedda muabak mei ka simatangeu sarania. Areprangan nia sirimanua simigi, tutrangan nia musila barada ka laggaira. 14 Kele aitusakai itconangan sirimanua simigi, makatenangan bagania ka tubuda, aleakenangan simabesi ka talagada. 15 Kasoibokatnia, oi sipasiuluinia masikua ka matania, "Simatangeu le kudduat nene, amasoiboan bagei, kuangan le ka sirimanua simigi raei masisaki katda ka laggai." 16 Kuanangan ka matada Yesus, "Taan leu memei sia, kam le ikakau katda." 17 Kuarangan sipasiuluinia, "Ta iaaili, lima le roti samba rua iba." 18 Kuanangan Yesus, "Ake kam sene." 19 Lepa kuanangan ka sirimanua simigi rapuuddet ka turuturu. Alanangan roti silima samba iba sirua Yesus, teilanangan manua kuanangan sura ka Taikamanua, paabbonangan nia, kaunangan nia ka sipasiuluinia, sipasiului masiparubei ka sirimanua simigi. 20 Pukomrangan leu sangamberida ektek. Lepa ruruakerangan legeira, sun pulu rua ngagaraga. 21 Igida sipukokom ai pa lima ribu taimanteu tapei tuadde tainanalep samba tatoga. 22 Lepa nenda kuanangan Yesus ka sipasiuluinia ratujanang ka abak rapuboiki mutalipo ka sila, pangenan rapusabu sirimanua simigi. 23 Kele arapusabu sirimanua simigi tatara nia ka leleu sarania manindou. Seddangan leu et nia sotsoibo sarania. 24 Abak geti areuan nia ka kapi, aian ipateteipu nia onu, sasaket le poi rusa. 25 Ia geti ka patokat, oi Yesus itagetnake sia muenung ka uddut koat. 26 Kele araitco nia sipasiuluinia ipuenung ka uddut koat, tugegerangan kuarangan, "Kodda sanitu!" Pugereirangan lotora. 27 Tapoi maruei le aiteka sia Yesus kuanangan, "Ta leu! Aku le, ba maloloto kam!" 28 Kuanangan si Petrus, "Tuhan, ekeu bai nia, kua kuoi kaku muenung ka uddut koat kuailiake ekeu." 29 "Konanan," ngangan Yesus. Gorosot si Petrus ka uddut koat puenungnangan itagetnake Yesus. 30 Kele aiitco iake rusa, malotonangan, ai le goiso imalelelep, pugereinangan, "Tuhan, romake aku!" 31 Totoiakenangan kabeinia Yesus iala nia, kuanangan ka matania, "Apate gulai tonem bagam; apa te nukakalotoake." 32 Lepa janang sia ka abak, puarinangan rusa. 33 Sipasiului sikuddu ka abak, oi sia murappo ka matat Yesus kuarangan, "Bulatnia Togat Taikamanua le ekeu." 34 Ia geti putaliporangan sege sia ka laggai Genesaret. 35 Kele araagai nia sirimanua sikuddu sedda, paareprangan nia ka sangalio riringan nenda. Ia geti taroakerangan ka matania sangamberi simabesi. 36 Tiddourangan bule iobaake rarape jaijait leppeinia. Sangamberida sipasirarape ale.
