MATEUS 1

1Ia te nene surat paninikat Yesus Kristus, togat David, togat Abraham. 2Togat Abraham si Isak, togat Isak si Yakob, togat Yakob si Yuda samba sasarainania. 3Togat Yuda si Peres samba si Serah ka sinanalepnia kai Tamar. Togat Peres si Hesron, togat Hesron si Ram, 4togat Ram si Aminadab, togat Aminadab si Nahason, togat Nahason si Salmon, 5togat Salmon si Boas ka sinanalepnia kai Rahab, togat Boas si Obed ka sinanalepnia kai Rut, togat Obed si Isai, 6togat Isai ia te rimata David. Togat David si Salomo sibara ka sinanalep Uria, 7togat Salomo si Rehabeam, togat Rehabeam si Abia, togat Abia si Asa, 8togat Asa si Yosapat, togat Yosapat si Yoram, togat Yoram si Usia, 9togat Usia si Yotam, togat Yotam si Ahas, togat Ahas si Hiskia, 10togat Hiskia si Manasse, togat Manasse si Amon, togat Amon si Yosia, 11togat Yosia si Yekonia samba sasarainania ka teteret katuribbaiat ka Babel. 12Pasat katuribbaiat ka Babel bara togat Yekonia si Sealtiel, togat Sealtiel si Serubabel, 13togat Serubabel si Abihud, togat Abihud si Eliakim, togat Eliakim si Asor, 14togat Asor si Sadok, togat Sadok si Akim, togat Akim si Eliud, 15togat Eliud si Eleasar, togat Eleasar si Mattan, togat Mattan si Yakob, 16togat Yakob si Yosep simanteu Maria situtuake matat Yesus sipuoni Kristus. 17Oto sangamberi reddenan barania kai Abraham teret kai David, pulu epat ngareddenan, barania kai David teret katuribbaiat ka Babel pulu epat ngareddenan samba barania katuribbaiat ka Babel teret Kristus pulu epat ngareddenan. 18Pututukat matat Yesus Kristus geti kise le: Ai pei le munonounoget si Maria inania kai Yosep, enan tapei patatadde sia, amusuruketnan nia sibara ka Ketsat Sipunenan. 19Si Yosep geti simanteunia, maroipo poi paatuatnia samba ta ioba ipakaila si Maria, isiakenangan isaraake nia pinakele. 20Tapoi ai pei le ipaatu, oi malaikat Tuhan ka pangamutetnia sipasikukua, "Yosep, togat David, ba masesedde masiala si Maria kalalemannu, aipoi suruketnia sibara ka Ketsat Sipunenan le. 21Toga simanteu te tutuakenennia, kaunennu oninia Yesus, nia poi masiaarauake bangsania ka joda." 22Aibara sangamberinia nene, bule ipuaili siniboi Tuhan sinegeakenen nabinia sipasikukua, 23"Mususuruket te sara siokko, tutuakenangan toga simanteu, kaunangan oninia Immanuel," tibonannia, "Ipaalei sita Taikamanua." 24Kele aitusuru si Yosep, galainangan siripot sikuat malaikat Tuhan ka matania; alanangan si Maria sinanalepnia. 25Tapoi tapei apaagai sia teret itutuake si Maria matat togania simanteu; ia geti kaunangan oninia Yesus.

will be added

X\