MARKUS 7

1Sangaminca amoi tai Parise samba piga pa siagaisurat sibara ka Yerusalem paruru ka matat Yesus. 2Itcorangan piga pa sipasiului Yesus tenan sia mukom simalolit kabei, tibonannia taipasibubui kabei boiki. 3Ka tai Parise poi, kisedda leu et sangamberi tai Yahudi ta mukokom sia ke ta rabui boiki kabeira sipulelelek, ratut siripot nganturatda taikebbukat. 4Samba apa pa sibara ka pasakiat, ta rakokom ke ta rabui boiki. Maigi pei le bagei suruket sinilora ka taikebbukat, kele pasibubui sere, pulokat samba pario. 5Kalulut nene nounourangan Yesus tai Parise samba siagaisurat, "Ta kodda ratutut sipasiuluinu nganturatda taikebbukatta? Tenan le kodda sia mukom taipasibubui kabei?" 6Kuanangan ka matada Yesus, "Aisesengan bai sinibalaakenen nabi Yesaya pagalaiat tubumui, kam sipatataju! Kele sinuratnakenennia, 'Ka ngungunda le raumun aku bangsa nene, paatuatda geti areu kaku. 7Siboboi le rapaninindogi aku, surukat sirimanua le poi ranganganturuake.' 8Surukat Taikamanua nukaddiuake kam, nganturat sirimanua nutut kam." 9Kuanangan minca Yesus, "Nuagai kam masiputata Surukat Taikamanua bule nganturatmui le nugelaiake kam. 10Aikua si Mose, 'Suru ukkuinu samba inam,' samba 'Sipateleiji ukkui ele inania, buita tumateiake nia." 11Tapoi kam masikua: Kasei sipasikukua ka ukkui ele inania, 'Kei akenenku kekeu te nene, tapoi akukauan nia buluakenen ka Taikamanua,' 12oto anukerangan kam sia masirom ukkui ele inania. 13Kisedda te nuputata kam tiboiet Taikamanua kalulut nututnake kam aratmui. Maigi pei le bagei kele nene nugalai kam." 14Lepa sogainangan minca sirimanua simigi Yesus, kuanangan ka matada, "Arep kam sangamberimui, lelekngake kam! 15Ta sitububuluk ka bagat sirimanua, sibara ka uddut ilololitnake nia, sibebela ka bagat sirimanua le ilololitnake nia." [ 16Kasei sibara talinga, kau iarepmake nia!] 17Kele aikaddiuake sirimanua simigi Yesus, samba aituguru ka lalep, nounourangan nia sipasiuluinia pagalaiat katukolobat pasikat nenda. 18Kuanangan ka matada Yesus, "Kam leu et tapei makolou ka bagamui? Tapei nuagai kam, ta sitububuluk ka bagat sirimanua, sibara ka uddut ilololitnake nia, 19aipoi ta ka paatuatnia ituguguru, ka balugunia le, lepa bela minca." Ka tiboietnia nene ipakoinong Yesus sangamberi komen momoi tukom. 20Kuanangan minca Yesus, "Sibebela ka bagat sirimanua ia te ilololitnake sirimanua. 21Ka bagat sirimanua poi, ia te ka bagat paatuatnia ibabara paatuat sikatai, puuumun, pananangkou, pamamatei, 22paeelet, alau baga, pujojoo, patajuat, pubotbonan, tutu baga, paasakat, ukkat tubu samba taiagai nganturu. 23Sangamberi katai nene ia te sibara ka baga, ia te ilololitnake sirimanua." 24Lepa tui Yesus sedda ei nia ka laggaira tai Tirus. Guru nia ka sara lalep samba ta ioba raagai nia sirimanua kababarania sedda; tapoi ta amoi aipakele nia. 25Maruei le aiagai nia sara saina sibara toga sinanalep pinasaileu sanitu. Oinangan leu murappo ka matania. 26Sinanalep nene ia te tai Grika bangsa Siro-Fenisia. Tiddounangan ka Yesus bule iusiake sanitu ka tubut togania. 27Kuanangan ka matania Yesus, "Eddangannia ramaektek tatoga boiki, aipoi ta pasesese tuala katda tatoga ituribbaiake ka jojo." 28Aleginangan nia sinanalep, "Aisesengan tedda Tuhan. Tapoi ai leu ikokom jojo sikuddu ka tei meja siraganan katda tatoga." 29Kuanangan ka matania Yesus, "Kalulut tiboietnu nene, toiliakean ekeu, abelangan sanitu ka tubut togam." 30Toili nia ka lalepnia, ailinangan aimemerep togania, abelangan sanitu ka tubunia. 31Lepa kaddiuakenangan laggaira tai Tirus Yesus, sabau Sidon ei nia ka koat Galilea, ka talagat laggaira tai Dekapolis. 32Sedda taroakerangan ka matania simatakkep taiagai manibo. Tiddourangan bule irapeake kabeinia Yesus ka tubut sirimanua nenda. 33Alanangan nia Yesus isaraake nia, usuakenangan singongainia ka talingan simatakkep, pulujinangan, rapenangan lilania. 34Lepa teilanangan manua Yesus, puhuihuinangan, kuanangan ka matania, "Efata!" tibonannia, "Bukaake ekeu!" 35Tubukanangan leu piunia, golok aigolok apparat lilania, panibonangan sipulelelek. 36Ia geti paneineinangan sia Yesus sangamberida sikuddu sedda bui rapaarep nia ka kasei pa. Tapoi ia pei ikera sia Yesus, ia pei imakope rapaarep nia. 37Tenan le kisei ka bagada sirimanua, kuarangan, "Sangamberinia le aipaeru. Simatakkep ikau maarep piu, taiagai manibo ikau raagai manibo."

will be added

X\