MARKUS 2

1Pasat piga ngagogoi pa, oi minca Yesus ka Kapernaum. Maarepnangan ai nia ka lalep. 2Parururangan maigi sirimanua pat ta memet sia, beri ka matatbaliu ta anai kudduat. Tiboinangan leu Katuareman Simaeru ka matada. 3Ia geti oi sipasitataroake simasakit ka matat Yesus, epat sia amasibairat. 4Tapoi ta amoi araambit nia ka matat Yesus igit sirimanua. Bukarangan tobat ipot kudduat Yesus; lepa arabuka tobat, gorosotnakerangan simasakit ai nia ka peremannia. 5Kele aiitco tonem bagada Yesus, kuanangan ka matat simasakit, "Sirou, atuappeakean jom!" 6Tapoi ai leu piga pa siagaisurat mukuddu sedda; paaturangan ka bagada, 7"Apate emenia sirimanua nene masikua kele nene. Aipaloloian Taikamanua. Kasei te momoi masiappeake jo, sarat Taikamanua le?" 8Aiagaian poi paatuatda Yesus, kuanangan ka matada, "Nupaatu kodda kam kise ka bagamui? 9Kipa le malabbei tukua ka simasakit, 'Atuappeakean jom', ele 'Suruake ekeu, ala peremannu nupuenung'? 10Tapoi bule nuagai kam nia kababarat geget Togatsirimanua masiappeake jo ka polak nene." Kuanangan ka matat simasakit, 11"Kukua nia ka matam, suruake ekeu, ala peremannu nutoili!" 12Ka matadangan leu sangamberida suru nia; akkat peremannia, tuituiakenangan nia. Makiseinangan ka bagada sangamberida, umunrangan Taikamanua, pele nganganda, "Ia pei akuitco kai kele nene!" 13Pasat nene ei minca Yesus ka bebet koat Galilea. Oi raoi sirimanua simigi ratagetnake nia, pangantomannangan leu sia. 14Kele aitusabau Yesus sedda, itconangan si Lepi togat Alpeus ai nia mukukuddu ka kantor cukai. Kuanangan ka matania Yesus, "Tut aku." Tusurunangan leu si Lepi, tutnangan Yesus. 15Ka teteret aimukokom Yesus ka lalep Lepi, oi sia maigi sipuuku cukai samba sijo masipakomake Yesus sambada sipasiuluinia, aipoi maigi sia sipasitutut nia. 16Kele araitco nia siagaisurat ka rubeiat Parise pakokomakena Yesus sipuuku cukai samba sijo, kuarangan ka matat sipasiului Yesus, "Ipakokomake kodda sipuuku cukai samba sijo?" 17Arepnangan nia Yesus, kuanangan ka matada, "Simaron tubu ta anai kaura dokter, sarat simaoringen le. Ta masisogai sirimanua simaroipo akuoi, masisogai sijo le." 18Ka sangaminca sipasiului Yohannes Sipasirarau samba tai Parise amupuaso sia. Ia geti oi piga pa sia ka matat Yesus nounourangan nia, "Sipasiului Yohannes Sipasirarau samba sipasiuluira tai Parise mupuaso sia; sipasiuluinu geti ta kodda mupupuaso sia?" 19Aleginangan nia Yesus, "Mupupuaso pa alei siputatalimou, ai pei le siputatalimou ka talagada? Ujut ai pei le siputatalimou ka talagada ta mupupuaso sia. 20Tapoi babara te gogoinia ituala siputatalimou ka talagada, sedda pei te rapupuaso. 21Beri sara sitakkopmake komang sibau ka leppei siburu. Ibibiritnake le poi leppei siburu takkoman nenda, mabeunangan biritnia. 22Kisedda leu et ta anai sipasikakau anggur sibau ka suppit kulit siburu, ipupukpukngake le poi suppit siburu anggur sibau, mapilinangan anggur, makatainangan suppitnia. Ka suppit sibau le itukakau anggur sibau." 23Ai sangaminca amuenung Yesus ka talagat monen bera ka gogoi Sabbat. Ai sia mueenung akpekrangan ottit bera sipasiuluinia. 24Kuarangan tai Parise ka matat Yesus, "Itco pei! Ragagalai kodda simakeikei tugalai ka gogoi Sabbat?" 25Aleginangan nia Yesus, "Tapei anubasa kam sigalai David, sibarana gejat bagania samba aipulaje sambada saaleinia? 26Guru nia ka Uman Taikamanua ka teteret imam sabeu Abiatar, komnangan roti simakeikei, -- keraet rakom nia kasei pa, sarat tai imam le -- samba ikau pei bagei ka saaleinia." 27Kuanangan minca Yesus, "Kalulut sirimanua le aitubaraake gogoi Sabbat, ta kalulut gogoi Sabbat aitubaraake sirimanua. 28Oto Togatsirimanua Tuhan gogoi Sabbat leu te."

will be added

X\