MARKUS 16

1Kele aitukappulu gogoi Sabat, ei si Maria Magdalena, Maria inan Yakobus samba si Salome masisaki pasinginsingin bule ratulaji Yesus. 2Mamancep pei le ka gogoi siboiki menggui nenda, kele aibela sulu, ei sia ka ratei. 3Patiborangan pasasambada, "Kasei pa takakau masiguilu bukku matatbaliu ratei?" 4Kele araloggouake ratei, itcorangan atuguiluan bukku; makope beu poi bukku nenda. 5Buluk sia ka bagat ratei, itcorangan sara silainge sipuleleppei simabulau muuddet isit kai kattoet, tugegerangan. 6Kuanangan silainge, "Ba maloloto kam! Kuagai, ainugagaba kam Yesus tai Natsaret siniliktengaakenen. Taan anai nia sene, atusurungan nia! Itco kam kudduat katugalangannia. 7Tapoi kenan le kam nusegeake kam nia ka sipasiuluinia samba kai Petrus, 'Nia le muboboiki ka kam mei ka Galilea; sedda geti itcomuian nia, kele sikuania ka matamui.' " 8Bela sia ka ratei tui sia aimugegeret tubuda, tugege bagei. Beri apa pa aratiboi ka sabagei, kalulut lotora. 9Kele aitusuru Yesus simancep ka gogoi siboiki menggui nenda, patoilanangan tubunia boiki kai Maria Magdalena. Siburu aiusiake Yesus pitu sanitu ka tubunia. 10Einangan leu si Maria Magdalena masisegeake ka matada sipaaleiake Yesus siburu, sipurereureu baga samba sipusosou ka teteret nenda. 11Kele araarep puririmanuan Yesus samba iitcona nia si Maria Magdalena, ta amatonem bagada. 12Pasat nene patoilanangan tubunia Yesus ka matat rua sipasiuluinia ai sia memei ka laggai; tapoi aipabagei le tubunia. 13Toili sia rasegeake nia ka saaleira sabagei, tapoi ka sia leu et ta matonem bagada. 14Kalepakatnia, patoilanangan tubunia Yesus ka sipasiuluinia sipulusara ai sia mukokom. Golunangan sia kalulut gulai tonem bagada samba kelat paatuatda, taimatonem bagada ka sipasiitco nia lepa aitusuru ka simamatei. 15Kuanangan ka matada, "Kenan kam ka sangalio polak, ngantomanake kam Katuareman Simaeru ka sangamberi sirimanua. 16Simatonem baga samba siturarau, ia te maaarau; sitaimatonem baga geti tuuukumake le. 17Toggaiat sipaalei sia simatonem baga ia te: Rausiake sanitu ka oningku; ratiboake nganga sibau taiaagaietda. 18Ke rarape ulou ele ralo gaut pasimatei, ta ilalango sia. Rape rarapeake kabeira ka sirimanua simabesi, male ramale." 19Lepa aipanibo ka matada Tuhan Yesus, tuakkatnangan ka sorga, puuddetnangan isit kai kattoet Taikamanua. 20Eirangan leu sipasiuluinia masipaarep Katuareman Simaeru ka senen laggai. Romakenangan sia si Tuhan, ronakenangan ngantomanda kalulut kerek sipaalei sia. SITETENIA PASILEPAT SURAT MARKUS [9 Ei sia tainanalep rasegeake nia kai Petrus samba ka saaleinia sangamberi sinegeakenen ka matada, ta mananta arasegeake. 10 Pasat nenda sipasiuluinangan le punu tubut Yesus amasisegeake barania ka kabelaiat sulu teret ka kabelekat sulu katuareman sipunenan samba simatom pagalaiat puaragat sitaitatata.]

will be added

X\