MARKUS 15

1Mamancep pei le purapatrangan tai imam sabeu, tai bajara tai Yahudi samba siagaisurat. Kaberangan Yesus, ambitrangan nia rasegeake nia kai Pilatus. 2Nounounangan nia si Pilatus, "Ele, rimatada tai Yahudi leu ekeu?" Aleginangan nia Yesus, "Anukuangan." 3Maigi arakau panganduat tai imam sabeu masijoake Yesus. 4Nounounangan minca Yesus si Pilatus, "Ta nuaalegi? Itco pei iginia panganduatda rajoake ekeu!" 5Tapoi taan aialegi Yesus, pat kisei ka bagania si Pilatus. 6Amatukelengan senen Punen Paska tubelaake sara siukumakenen siripot siobat bagada simigi. 7Ka teteret nenda ai sara sirimanua sipuoni si Barabbas atuukumake sambada sigalai pugaugapat, kalulut aramateiake sirimanua ka teteret pugaugapat. 8Oi sia sirimanua simigi kai Pilatus tiddourangan bule ibelaake sara siukumakenen kele simareirei. 9Nounounangan sia si Pilatus, "Noba kam kubelaake ka kam rimatada tai Yahudi nene?" 10Aiagaian poi si Pilatus, lagat bagada le tai imam sabeu aranganduake Yesus ka tubunia. 11Tubbuirangan bagada simigi tai imam sabeu bule si Barabbas le ibelaake ka sia. 12Kuanangan minca si Pilatus ka matada sirimanua simigi, "Oto kipangan le kugagalai ka tubut kuanenmui rimatada tai Yahudi?" 13Pugereirangan minca, "Siliktengaake le nia!" 14Kuanangan si Pilatus, "Aponia poi jo aigalai?" Ia pei imakope rapugerei, "Siliktengaake le nia!" 15Bule isege bagada sirimanua simigi belaakenangan si Barabbas si Pilatus. Yesus geti ikau rabobo, lepa segeakenangan nia rasiliktengaake nia. 16Lepa ambitrangan Yesus tai tentera ka pasiukuman ka kantor gubernur. Ruruakerangan sangamberi aleira tai tentera. 17Leppeiakerangan leppei simabonan ka tubut Yesus, tikairangan rui kiritnia, kaurangan nia ka utenia. 18Taddaakerangan raroroi nia kuarangan, "Salam, rimatada tai Yahudi!" 19Boborangan utenia manggea, lujirangan nia, purapporangan ka matania. 20Lepa arapaloloi nia, golokrangan leppei simabonan ka tubunia, leppeiakerangan minca leppeinia. Lepa ambitrangan nia rasiliktengaake nia. 21Ka tengan enungan ailirangan sara sirimanua sipuoni si Simon tai Kirene, ukkui Aleksander samba Rufus barania ka mone; kaurangan nia ibairat siliktengan Yesus. 22Ambitrangan Yesus ka sara kudduat sipuoni Golgota, tibonannia, "Leleu Lakkupat." 23Lepa kaurangan lonia anggur pagalu mur, tapoi ta ioba ilo nia. 24Ia geti siliktengaakerangan nia. Lepa parubeirangan bibilet tubunia sipauktukngakenen, bule raagai rubeiatda senenda. 25Bobo siba simancep arasiliktengaake nia. 26Ka pata ka siliktengan Yesus raottotnake surat masikua paluluat jojoakenenda nia, "Rimatada tai Yahudi." 27Samba rasiliktengaake leu rua sipasimamatei, sara kai kattoet, sara kai katsiunia. [ 28Kisedda te ipuaili sitususurat ka Surat Sipunenan, "Raaddeake nia kele sirimanua sijo."] 29Sangamberi situsasabau sedda masipaloloi Yesus. Pagilikrangan utera kuarangan, "Ekeu sioba masiragatnake Uman Taikamanua samba masirioake nia minca ka bagat telu ngagogoi! 30Belaake tubum, gorosotnake ekeu ka siliktenga!" 31Tai imam sabeu leu, siagaisurat samba tai bajara tai Yahudi masigegei Yesus, kuarangan pasasambada, "Sabagei airimanuaake, tubunia geti ta momoi irimanuaake! 32Kristus, Rimatada tai Israel, gorosotnake ekeu ka siliktenga, kuitco kai nia, bule imatonem bagamai." Beri sia sirua leu alei Yesus tusiliktengaake masipaloloi Yesus. 33Bobo pulu rua tugge, magepgepnangan sangalio polak teret bobo telu. 34Bobo telu pugereinangan Yesus sabeu nganga, "Eloi, Eloi, lama sabakhtani?" tibonannia, "Taikamanuangku, Taikamanuangku, nukakaddiuake kodda aku?" 35Ai piga pa sia sipuririo sedda; kele araarep nia kuarangan, "Arep kam, aisosogai si Elia!" 36Pabalaunangan sara sirimanua iei masiala romot, somakenangan nia ka anggur simalaga, lepa kokkokngakenangan nia ka buttet manggea, totoiakenangan nia ka ngungun Yesus kuanangan, "Bola, taitcoake kam nia boiki, baleu moi si Elia igorosotnake nia." 37Pugereinangan Yesus sabeu nganga, sege isegeake engania. 38Mabiritnangan komang kekere ka Uman Taikamanua baraniaka pata aili ka epe bailiu rua. 39Kele aiitco nia kapiten tentera sipuririo ipot Yesus pagalaiat katatakat Yesus, kuanangan, "Bulat Togat Taikamanua leu bai sinene!" 40Ai leu sedda tainanalep sipuririo ka simareunan, ka talagada ai si Maria Magdalena, si Maria inan Yakobus sisule samba si Yoses samba si Salome. 41Sia te nene tainanalep sipasitutut samba sipuuku Yesus ai pei le nia ka Galilea. Maigi pei le tainanalep bagei siooi ka Yerusalem masipaaleiake Yesus. 42Kele aimasoibo, gogoi nenda ia te gogoi panarengan kei bara Sabbat, 43oi si Yosep tai Arimatea, ia te sara laddou Rapat Sabeu simatopit, samba singenaake Purimataat Taikamanua; emeakenangan tubunia mei kai Pilatus masitiddou tubut Yesus. 44Makiseinangan ka bagania si Pilatus aiarep atataan Yesus. Sogainangan kapiten tentera, nounounangan nia ele bulatnia atataan Yesus. 45Kele aiarep katukolobat sibara kai kapiten tentera si Pilatus, obaakenangan iala tubut Yesus si Yosep. 46Sakinangan komang juto si Yosep, gorosotnakenangan tubut Yesus ka siliktenga, tabuninangan nia juto. Galakngakenangan nia ka bagat ratei silepa kailu ka bulak. Lepa guilunangan sara bukku sabeu matatbaliu ratei takkenia. 47Ka teteret nenda si Maria Magdalena samba si Maria inan Yoses airaiitcoake kudduat katugalangan Yesus.

will be added

X\