1 Lepa tuitui Yesus sedda ei nia ka laggaira tai Yudea samba ka silat oinan Yordan. Sedda leu oi sia sirimanua simigi paruru ka matania; samba kele simareirei pangantomannangan sia. 2 Ia geti oi piga pa tai Parise masisibo Yesus. Nounourangan nia, "Momoi leu igalak sinanalepnia simanteunia?" 3 Aleginangan nia Yesus, "Kipa aikua ka kam si Mose?" 4 Kuarangan, "Iobaake le si Mose igalak sinanalepnia simanteunia, ke ikau surat pagalangan." 5 Kuanangan ka matada Yesus, "Kalulut kelat paatuatmui le aisuratnake surukat nene ka kam si Mose. 6 Tapoi taddanangan aibaraake sirimanua Taikamanua aibaraakean sia simanteu samba sinanalep. 7 Ia te lulunia ikakaddiuake ukkui samba inania simanteu iloplopmake tubunia ka sinanalepnia, 8 bailiunangan sia sangaakkula. Oto taan rua, sangaakkulaan le sia. 9 Siloplopmakenen Taikamanua poi ta momoi ipasaraake nia sirimanua." 10 Kele aratoili ka lalep, nounourangan nia minca sipasiuluinia pagalaiat nene. 11 Kuanangan ka matada Yesus, "Kasei masigalak sinanalepnia, lepa putalimounangan ka sinanalep bagei, sipaeelet le nia ka sinanalepnia nenda. 12 Kisedda leu et sinanalep sipasigagalak simanteunia, putalimounangan ka simanteu bagei, sipaeelet leu nia." 13 Ia geti taroakerangan tatoga ka matat Yesus bule irape sia. Tapoi aragolu le sia sipasiuluinia. 14 Itco aiitco nene Yesus, pugolunangan, kuanangan ka matada, "Obaake kam tatoga raoi kaku, ba kekera kam sia; sirimanua kele nene le poi sibakkati Purimataat Taikamanua. 15 Kukua nia ka matamui: Kasei pa ke ta kele tatoga ipasiala Purimataat Taikamanua, ta tuguguru nia ka bagania." 16 Lepa lakkaiakenangan tatoga Yesus, kaunangan kabeinia ka utera sukatnakenangan sia. 17 Kele aibela Yesus iriuriuake puenunganannia, oi sara sirimanua pabalau ka matania. Purapponangan ka matat Yesus inounou nia, "Guru simatopit, kipa kugagalai bule kuikepmake purimanuaiat sitaitatata?" 18 Kuanangan ka matania Yesus, "Nukukua kodda aku simatopit? Ta anai kasei pa simatopit, sarat Taikamanua le. 19 Surukat Taikamanua anuagaian, 'Bui nupamatei; bui nupaelet; bui nupanangkou; bui numunengake boko; bui nupajo sirimanua; suru ukkuinu samba inam!' " 20 Kuanangan simakayo, "Guru, sangamberinia nene akugalaiakean ka pusulekatku pei le." 21 Kinerenangan nia Yesus, manuntunangan bagania, kuanangan ka matania, "Ai pei sara simagulai kekeu. Kenan sakiake sangamberi sibabara ka tubum, kaunungan bulagatnia ka simageba, bara ibara pukayoatnu ka sorga; lepa oi ekeu masitut aku." 22 Kele aiarep tiboiet nene mabelenangan bagania, tui nia ka reureu baga, simakope kayo le poi nia. 23 Kinerenangan sipasiuluinia Yesus kuanangan ka matada, "Apate besi ka simakayo tuguru ka Purimataat Taikamanua." 24 Kisei le ka bagada sipasiului araarep tiboiet Yesus nene. Tapoi kuanangan minca Yesus, "Ale tatogaku, bulat mabesi tuguru ka Purimataat Taikamanua. 25 Onta pei le malabbei tubuluk ka matat susuilak ka simakayo tuguru ka Purimataat Taikamanua." 26 Makeppunangan ka bagada sipasiului kuarangan pasasambada, "Oto kaseian le masisesese puaragat?" 27 Kinerenangan sia Yesus kuanangan, "Ka sirimanua bai nia ta momoi; tapoi ta kisedda ka Taikamanua. Aipoi ka Taikamanua sangamberinia le momoi." 28 Kuanangan si Petrus, "Akukaddiuakean tebai kai sangamberinia masitut ekeu." 29 Kuanangan Yesus, "Kukua nia ka matamui: senen sikaddiuake lalepnia, ele sasarainania, ele samaniunia, ele inania, ele ukkuinia, ele tatogania, ele monenia kalulut aku samba kalulut Katuareman Simaeru, 30 ka tetere kineneiget pei le isisilo sangotu ngaminca lalep, saraina, maniu, ina, tatoga, mone, kenanen ka bagat paoreat. Samba ka gogoi sialu ikepmakenangan purimanuaiat sitaitatata. 31 Tapoi maigi sipuboboiki ibabailiu sikateitei samba sikateitei ibabailiu sipuboboiki." 32 Ai sia mueenung raei ka Yerusalem, Yesus samba sipasiuluinia, boikiakenangan tubunia Yesus ka sipasiuluinia. Makiseinangan ka bagada sipasiuluinia samba sipasitutut ka teitei leu bailiu maloto. Ia geti sogainangan minca sipasiuluinia Yesus sarada segeakenangan ka matada sipuaaili geti ka tubunia. 33 Kuanangan, "Aian tebai sita mananatara ka Yerusalem, seddangan te itusesegeake Togatsirimanua ka tai imam sabeu samba siagaisurat, raukum nia imatei samba rasegeake nia ka sipuarat sabulungan. 34 Paloloirangan nia, lujirangan nia, boborangan nia samba mateiakerangan nia. Tapoi pasat telu ngagogoi suru nia minca." 35 Lepa oi si Yakobus samba si Yohannes tatogat Sebedeus ka matat Yesus kuarangan ka matania, "Guru, ai tiddogetmai akenenenu ka kai." 36 Kuanangan ka matada, "Aponia tiddogetmui akenenku ka kam?" 37 Kuarangan ka matania, "Bule nukau kai muuddet sara kai kattoet, sara kai katsiunu ka pulatsanannu geti." 38 Kuanangan ka matada Yesus, "Ta nuagai kam tiddogetmui. Momoi pa nulo kam ka pulokat pangoringan loketku? Ele momoi pa turau kam pasiraukat rauakenen ka tubuku?" 39 Alegirangan nia, "Momoi." Kuanangan ka matada Yesus, "Nulolo tedda kam ka pulokat pangoringan loketku, samba turarau tedda kam pasiraukat rauakenen ka tubuku. 40 Tapoi muuddet kai kattoet ele kai katsiuku, ta aku tuteteu. Aipoi sipuuddet sedda sarat sia pinatarek Taikamanua le." 41 Kele araarep nia sipasiului sipulu, mangoingoinangan bagada kai Yakobus samba kai Yohannes. 42 Ia geti sogainangan sia Yesus kuanangan ka matada, "Nuagai kam, saute ka polak, masipaneinei bangsada le sia, samba sia siabeu mugege le ka tubuda. 43 Ka kam geti bui kisedda. Ke ai ka talagamui sioba muabeu, kau le ibailiu nia sipuuku kam. 44 Samba ke ai ka talagamui sioba muute, kau le ibailiu nia paguguletmui. 45 Aipoi beri Togatsirimanua ta mubeunan aioi, mupagugulet le samba masikau engania panebui simigi." 46 Ia geti sege Yesus ka Yeriko. Kele aituitui Yesus samba sipasiuluinia samba sirimanua simigi ka Yeriko, ai sara simapeset sipuoni si Bartimeus, togat Timeus, ai nia mukukuddu ka bebet enungan manindou panguruat. 47 Kele aiarep Yesus tai Natsaret le tusasabau pugereinangan, "Yesus, Togat David, kau imakate bagam kaku!" 48 Aserangan nia sirimanua simigi ipumengmeng. Tapoi ia pei iabeuake ipugerei, "Togat David, kau imakate bagam kaku!" 49 I geti tokko Yesus, kuanangan, "Sogai kam nia." Sogairangan simapeset, kuarangan ka matania, "Bui imakarat bagam, suruake ekeu, aisogaian ekeu Yesus." 50 Ribbaiakenangan sobbenia simapeset, suru nia iei ka Yesus. 51 Kuanangan ka matania Yesus, "Aponia noba kugalai ka tubum?" Aleginangan nia simapeset, "Bule imaitco mataku, Guru." 52 Kuanangan ka matania Yesus, "Kenanan, aiabauakean ekeu tonem bagam." Maitconangan leu et matania, tutnangan Yesus ka puenunganannia.
