MARKUS 1

1Ia te nene panandaat Katuareman Simaeru pagalaiat Yesus Kristus, Togat Taikamanua. 2Kele sinuratnakenen nabi Yesaya, " 'Koi ne pakoinietku,' ngangan Taikamanua; 'kukoiniake nia muboiki kekeu, masipapa enungannu.' " 3Ai nganga sipusosoga ka simatangeu, 'Tarekngake kam enungan Tuhan; roipoake kam pusilaiatnia.' " 4Kisedda te aioi si Yohannes Sipasirarau ka simatangeu masingantomanake pasiraukat pasibau paatuat, katuappekat jo. 5Oirangan leu sangamberi sipulaggai ka Yudea samba tai Yerusalem masitagetnake nia. Seseakerangan joda, raunangan sia si Yohannes ka oinan Yordan. 6Leppei Yohannes geti bulut onta le, akkik tengania kulit, sin samba suan mani le komennia. 7Pungantomannangan pele ngangania, "Kurukku momoi te sisaliu pei le beunanku; beri tulukkuk masirugut talit tarangainia ta mateu aku. 8Aku kaku kurau kam oinan le, ka sia geti rauakenennia ka kam Ketsat Sipunenan le." 9Ka teterenia nenda oi Yesus barania ka Natsaret ka Galilea, raunangan nia si Yohannes ka oinan Yordan. 10Sakaina le barania ka oinan, itconangan tubuka manua samba Ketsat Taikamanua kele tubut merpati mei ka tubunia. 11Maarepnangan nganga sibara ka sorga masikua, "Ekeu te Togaku, kilibet bagaku, obaket bagaku te ekeu." 12Lepana le nenda ambitnangan Yesus Ketsat ka simatangeu. 13Pukuddunangan sedda epat pulu ngagogoi, isibo nia Sanitu. Ai nia sedda ka talagat tarimeu simasakbak, tapoi ai samalaika masipuuku nia. 14Pasat arapenjaraake si Yohannes, ei Yesus ka Galilea masipaarep Katuareman Simaeru sibara ka Taikamanua, 15kuanangan, "Aiailingan teterenia, amalegerengan Purimataat Taikamanua. Bauake kam paatuatmui, samba kau imatonem bagamui ka Katuareman Simaeru!" 16Aimueenung Yesus ka bebet koat Galilea, itconangan si Simon samba sarainania si Andreas ai sia mujajarik ka koat, sipasiiba poi sia. 17Kuanangan ka matada Yesus, "Konan kam tut kam aku, kubailiuake kam sipasijajalo sirimanua." 18Kaddiuakerangan leu jarikda, tutrangan Yesus. 19Enung nia goiso, itconangan minca si Yakobus samba sarainania si Yohannes tatogat Sebedeus, ai sia ka abak, airapeperu jarikda. 20Sogainangan leu et sia Yesus. Kaddiuakerangan leu ukkuira si Sebedeus ka bagat abak samba sirimanua upaiet, tutrangan Yesus. 21Ia geti sege sia ka laggai Kapernaum. Ka gogoi Sabbat ei Yesus ka uma parurukat mungantoman. 22Makiseinangan ka bagada raarep ngantomannia, kele sirimanua sibara gege le poi ipungantoman, ta kele siagaisurat. 23Ka teterenia nenda ai sara sirimanua pinasaileu sanitu ka bagat uma parurukat pugereinangan, 24"Apa nuaala se, Yesus tai Natsaret? Moi ekeu masilangoake kai? Kuagai kasei ekeu: Sipunenan sibara ka Taikamanua le ekeu!" 25Asenangan nia Yesus, "Mengmengake ekeu, belaake ekeu ka tubunia!" 26Pangitngitnangan sirimanua nenda sanitu, pugereinangan, bela nia ka tubunia. 27Makiseinangan ka bagada sangamberi sirimanua, paiserangan leu pasasambada, "Aponia nene? Ngantoman sibau! Magege nia masiusiake ketsat sanitu, ketsat sanitu leu rareddet ngangania!" 28Mararatnangan leu katuareman Yesus ka sangalio laggai Galilea. 29Kele arabela ka uma parurukat, ei Yesus sambada si Yakobus si Yohannes ka lalep Simon samba Andreas. 30Talikut Simon sinanalep ai nia ka pereman muroroket. Segena le Yesus ka lalep, segeakerangan ka matania pagalaiat nia. 31Ei Yesus alanangan kabei talikut Simon, suruakenangan nia. Tata roketnia, puukunangan sia. 32Kasoibokat, abelean sulu, taroakerangan ka matat Yesus sangamberi simabesi samba pinasaileu sanitu. 33Sangalaggaiatda nenda ruru ka bebet matatbaliu. 34Aleakenangan maigi siorik sene ngamata besi, samba iusiake maigi sanitu. Ta aiobaake Yesus rapanibo sanitu, raagai poi nia. 35Simancep, magepgep pei le, suru Yesus bela nia ka lalep, ei nia ka kudduat simatangeu manindou. 36Kukuruakenangan nia si Simon sambada saaleinia. 37Kele arasese nia kuarangan ka matania, "Sangamberi sirimanua masigaba ekeu." 38Kuanangan ka matada Yesus, "Sita kam ka laggai bagei simalegere se, bule mungantoman leu aku sedda, ia poi lulunia akuoi." 39Gejenginangan Yesus sangalio Galilea, pungantomannangan ka uma parurukatda samba masiusiake sanitu. 40Ia geti oi sara simabogbong ka matat Yesus, purapponangan manindou, pele ngangania, "Noba bai nia, ta isosoppi nualeake aku." 41Makatenangan bagat Yesus, totoiakenangan kabeinia irape nia, kuanangan ka matania, "Kuoba, kauan numale!" 42Tata itata bogbongnia, malinanangan tubunia. 43Lepa koiniakenangan nia Yesus ituitui, paneineinangan nia simakope, 44kuanangan ka matania, "Pagaba, bui nupoiliat nia ka kasei pa. Tapoi kenan le nupaitco tubum kai imam; ia geti buluakenungan buluakenen siripot sikuat Mose, masipakoinong ka matada kamamalem." 45Tapoi ka sia geti kele aituitui paarepnangan nia kaipa kaipa. Bulat maigi aitiboi, pat taioinangan ipuenung Yesus ka laggai ka simatoila. Ka kudduat simatangeuan le aikuddu; tapoi ia leu ne oira masitagetnake nia sibara ka senen laggai.

will be added

X\