LUKAS 4

1Kele aituitui Yesus barania ka oinan Yordan sun le ka tubunia Ketsat Sipunenan. Paambitnangan nia Ketsat Sipunenan ka simatangeu. 2Epat pulu ngagogoi aikuddu sedda samba isibo nia Sanitu. Burunia nenda beri pukokom nia, kalepakatnia malajenangan. 3Kuanangan ka matania Sanitu, "Ke Togat Taikamanua ekeu, kua le ibailiu roti bukku nene." 4Aleginangan nia Yesus, "Atusuratnakean, 'Ta sarat kan iririmanuaake sirimanua.' " 5Lepa ambitnangan Yesus Sanitu ka leleu simabuak, paitconangan ka matania sinulut sangamberi purimataat polak nene. 6Kuanangan ka matat Yesus Sanitu, "Sangamberi gege samba pulatsanan nene kuaake kekeu. Aipoi sangamberinia atusegeakean ka tubuku, teukungan le kukau nia ka kasei pa siobaku. 7Oto ke noba murappo ka mataku nupanindogi aku, bakkatinungan sangamberinia nene." 8Aleginangan nia Yesus, "Atusuratnakean, 'Tuhan Taikamanuam le panindogietnu, sarat nia le reddenennu!' " 9Lepa ambitnangan Yesus Sanitu ka Yerusalem, rioakenangan nia ka teitei Uman Taikamanua, kuanangan ka matania, "Ke Togat Taikamanua ekeu, ribbaiake tubum ka polak. 10Atusuratnakean poi, 'Ikokoiniake te malaikania Taikamanua rapasikeli ekeu 11samba ratoddai ekeu ka kabeira, bui itusoksok rerem ka bukku.' " 12Aleginangan nia Yesus, "Aikua Surat Sipunenan, 'Bui nusibo Tuhan Taikamanuam.' " 13Kele ailepaake sangamberi pasisiboatnia Sanitu, kaddiuakenangan Yesus teret iaili tetere simaeru. 14Ia geti soksoknangan Yesus ka Galilea ka geget Ketsat Sipunenan. Mararatnangan katuaremannia ka sangalio laggai nenda. 15Pungantomannangan ka uma parurukat, umunrangan nia sangamberida. 16Lepa ei Yesus ka Natsaret laggai puuragatnia. Ka gogoi Sabbat, kele simareirei ei nia ka uma parurukat, purionangan ibasa Surat Sipunenan. 17Kaurangan ka tubunia bukot nabi Yesaya. Kele aibuka buko, sesenangan ruang sipasikukua kisee, 18"Ketsat Tuhan aian ka tubuku, kalulut aitulaji aku masipaarep Katuareman Simaeru ka sia simageba. Aikoiniake aku masisegeake kabelaiat ka sia siluplupmakenen samba pasiitco ka sia simapeset; masibelaake sia pinaore 19samba masipaarep rurat pununtuat bagat Tuhan." 20Lepa aipurut buko kaunangan nia ka pagugulet, puuddetnangan. Kinererangan nia sangamberida sikuddu ka uma parurukat. 21Kuanangan ka matada Yesus, "Gogoi nene te aipuaili siniboi Surat Sipunenan nene ka teteret nuarep kam nia." 22Sangamberida masiseseake nia samba makisei ka bagada tiboiet simaeru siniboinia. Kuarangan, "Ta togat Yosep sinene?" 23Kuanangan ka matada Yesus, "Ta isosoppi nukua kam ka mataku pasikat nene, 'Oi sikerei, aleake tubum. Sangamberi siarepmai sigalainu ka Kapernaum, galai leu et sene ka bakkat laggainu.' " 24Kuanangan minca Yesus, "Kukua nia ka matamui: Beri sara nabi rapuleletsei ka bakkat laggainia. 25Sibulatnia le sikuaku nene ka matamui: Ka teteret nabi Elia, situpatpatna manua telu ngarura enem ngalaggo ujunia pat bara pulajeat sabeu ka sangalio laggai, maigi sia sinanalep silumang ka tai Israel. 26Tapoi ta aikoiniake si Elia Taikamanua ka sia, sarat ka sinanalep silumang ka Sarepta ka tobbou Sidon le. 27Kisedda leu et ka teteret nabi Elisa, maigi simabogbong ka tai Israel, tapoi beri sara ka talagada aialeake, sarat si Naaman tai Siria le." 28Kele araarep nia sangamberida sikuddu ka uma parurukat, magolunangan bagada. 29Suru sia tukkuluakerangan Yesus ibela ka laggai, ambitrangan nia ka leleu laggaira raribbaiake nia ka gilak leleu. 30Tapoi amutuitui le Yesus ka talagada, kaddiuakenangan sia. 31Lepa ei Yesus ka laggai Kapernaum ka Galilea. Pangantomannangan sia sedda ka gogoi Sabbat. 32Bulat makisei ka bagada ngantomannia, magege poi tiboietnia. 33Ka bagat uma parurukat nenda ai sara sirimanua pinasaileu sanitu. Pugereinangan, 34"Apa nuaala se, Yesus tai Natsaret? Moi ekeu masilangoake kai? Kuagai kasei ekeu: Sipunenan sibara ka Taikamanua le ekeu!" 35Asenangan nia Yesus, "Mengmengake ekeu, belaake ekeu ka tubunia!" Pangitngitnangan nia sanitu ka matada, bela nia ka tubunia, ta anai amabesi ka tubunia. 36Kisei le ka bagada sangamberi sirimanua, patiborangan pasasambada, "Apate kepput ka bagaku tiboiet nene. Ka gege samba ka kereknia iusiake sanitu, belanangan leu et." 37Mararatnangan leu katuareman Yesus ka sangalio tobbou nenda. 38Bela aibela Yesus ka uma parurukat ei nia ka lalep Simon. Tapoi talikut Simon sinanalep ai nia muroroket, bulat makope roketnia. Segeakerangan nia ka Yesus bule iromake nia. 39Ei Yesus ka bebenia usiakenangan roketnia, tata roketnia; tusurunangan masipuuku sia. 40Kele aibele sulu, oi sia sangamberi sirimanua masitaroake simabesira ka matat Yesus siorik sene ngamata besi. Rapeakenangan kabeinia Yesus ka tubuda senenda ialeake sia. 41Belarangan leu sanitu ka tubut maigi sirimanua, pugereirangan masikua, "Togat Taikamanua le ekeu!" Asenangan sia Yesus, ta aiobaake rapanibo, raagai poi Kristus le nia. 42Kele aimapato, tui Yesus ei nia ka sara kudduat ka simatangeu. Gabarangan nia sirimanua simigi. Kele arasese nia kerarangan nia bui ikaddiuake sia. 43Kuanangan ka matada Yesus, "Ka laggai bagei leu buita kupaarep Katuareman Simaeru pagalaiat Purimataat Taikamanua, ia poi lulunia aitukoiniake aku." 44Pungantomannangan Yesus ka bagat uma parurukat ka sangalio Yudea.

will be added

X\