LUKAS 22

1Punen Roti Sitasioman sipuoni paska amalegerengan. 2Gabarangan enungan tai imam sabeu samba siagaisurat, kipa ragagalai ramateiake Yesus, aipoi maloto sia ka sirimanua simigi. 3ia geti guru sanitu ka paatuat Yudas sipuoni leu Iskariot, sara ka talagat sipasiului sipulurua. 4Einangan leu si Yudas patibo ka tai imam sabeu samba ka sautera sipasijajago Uman Taikamanua kipa igagalai isegeake Yesus ka sia. 5Maangkanangan bagada, pakerenangan bagada masikau bulagat ka tubunia. 6Ooakenangan nia si Yudas, gabanangan leu tetere sipasesese isegeake Yesus ka tubuda, taiaagaietda sirimanua simigi. 7Ia geti ailinangan gogoi Punen roti Sitasioman, ia te gogoi panajakat biribiri Paska. 8Koiniakenangan Yesussi Petrus samba si Yohanes, kuanangan, "kenan kam nutarekngake kam komen Paska, takom nia ka sita." 9Kuarangan ka matania, "Kaipa siobanu kutatarekngake kai nia?" 10Kuanangan ka mtada Yesus, "Guru kam ka kota, ai leu nupaseseake kam sara sirimanua siambit sangalalaisu oinan. Tut kam nia ka lalep katugurukatnia, 11ia geti kuamuian ka sibakkat lalep; Ainounou si Guru, 'Kaipa le kudduatmai sipasiuluiku mukom komen Paska?' 12Paitconangan leu ka kam sara bilik ka pata, simalio, amatarekngan uddenan, sedda te nupatatarek kam sangamberinia." 13Ei sia, seserangan leu kele siniboi Yesus ka matada. tarekngakerangan leu komen Paska. 14Kele aiaili jam pukoman, puuddetnangan Yesus sambada tai apostelnia mukom. 15Kuanangan ka matada, "Bulat akubesiakean mukom Paska nene sambamui kei kuorik paoreat. 16Aipoi kukua nia ka matamui: Taan kukokom minca nene teret itugalaiake simasun ka Purimataat taikamanua." 17Lepa alanangan pulokat Yesus, kuanangan sura, kuanangan, "Ala kam nene, parubei kam ka sangamberimui. 18Aipoi kukua nia ka matamui: taan kulolo anggur nene teret ibara Purimataat Taikamanua." 19Ia geti alanangan roti, kuanangan sura, paabbonangan nia, kaunangan nia ka sia, kuanangan, "Tubuku te nene, sinegeakenen lulumui. galai kam nene pasirerepdepmui aku." 20Kisedda leu et alanangan pulokat lepat koman kuanangan, "Pulokat nene pakerekat baga sibau ka logauku te, sipiliakenen lulumui. 21Tapoi itco kam, kabei sirimanua sipajo aku, aian nia sambaku sene ka meja nene! 22Togatsirimanua geti kirenangan mamatei nia siripot siteuakenen Taikamanua, tapoi paan te ka sia sipajo nia!" 23Taddaakerangan paise pasasambada, kasei pa ka talagada sigalaiake nene. 24Ia geti bara pajoggolatda sipasiului rapaukeli kasei le ka talagada siabeu. 25Kuanangan ka matada Yesus, "Tai rimata ka polak masipaneinei rakyatda le sia, samba sia simagege raoniake 'sisakkeri tai rakyat'. 26Ka kam geti bui kisedda; bailoknia le, siabeu ka kam, kau le kele sule, sipaneinei kam, kau le kele pagugulet. 27Kasei poi siabeu: sipuuddet mukom, ele sipasitatarek? Ta pa sipuuddet mukom le? Tapoi aku kaku kele pagugulet le ka talagamui. 28Ka bagat sangamberi pugejaat bagaku mariuriu le kam sangamberimui ka bebeku. 29Ai leu kusegeake ka kam purimataat kele isegeake nia kaku Ukkuiku. 30Pukomtangan samba pulotangan sambata ka Purimataatku, ia geti puuddetmuian ka uddenan purimataat masiukum sipulurua muntogat bangsa Israel." 31"Simon, Simon, arepmake! Ai te ibebesiake Sanitu isatsat kam, kele bera. 32Tapoi akutiddouakean ekeu, bui itata tonem bagam. Samba ke aioleian bagam, kau nusopo sasarainam." 33Kuanangan si petrus, "Tuhan, matarek le aku masipaalei ekeu ka bagat penjara ele matei." 34Kuanangan ka matania yesus, "Kukua nia ka matam Petrus, tapei mutotokki gougou gogoi nene, anupakelengan aku telu ngaminca." 35Lepa kuanangan ka matada yesus, "ka teteret akukoiniake kam si ta bulagat, balut ele kasu, ai pa simagulai ka kam?" Alegirangan, "Ta anai." 36Kuanangan Yesus, "Tapoi kineneiget, kasei sibara lompe kau iambit nia; kisedda leu sibara balut, samba kasei ta anai lanjau, kau isakiake leppeinia isaki sara lanjau. 37Aipoi kukua nia ka matamui, sitususurat, ka Surat Sipunenan kise, 'Raaddeaka le nia kele sirimanua sijo,' buita muaili ka tubuku. Sangamberi sitususurat pagalaiat tubuku poi amuailingan kineneiget." 38Kuarangan sipasiului, "Tuhan, aian se rua lanjau." "Paan leu!" ngangan Yesus. 39ia geti bela Yesus, ei nia ka leleu Tula kele simareirei, tutrangan nia sipasiuluinia. 40Sege sia sedda kuanangan ka matada, "Panindou kam, bui iorak kam pasisiboat." 41Areuakenangan tubunia goiso ka tubuda, siaili tubaijuk reugatnia, purekkuknangan manindou, 42kuanangan, "Ukkui, ke momoi bai nia, sabauake le pulokat pangoringan nene ka tubuku. Tapoi bui ka teu bagaku, ka teu bagam le." 43ia geti oi sara malaika sibara ka sorga masisopo nia. 44Aipalalabaake kamateiat Yesus, panindounangan simakope. Attinangnia kele logau ipubaibai ka polak. 45Lepa aipanindou, suru nia, ei nia ka sipasiuluinia, ailinangan sia ai sia memerep, reureu bagada. 46Kuanangan ka matada, "Memerep koi kam? Suru kam manindou, bui iorak kam pasisiboat." 47Ai pei maninibo Yesus, oi sangarurukat sirimanua, ai si Yudas, sara ka sipulurua musumbulat ka matada. Tagetnakenangan Yesus isigguk nia. 48Kuanangan ka matania Yesus, "Yudas, pasiggungan le nukau masipajo Togatsirimanua?" 49Kele araitco sibabara nene sipasiuluinia sikudu sedda, kuarangan, "Tuhan, kuteteakean le kai lanjau?" 50Oi sara ka talagada, seppirinangan talingan sikattoet pagugulet imam sabeu. 51Kuanangan Yesus, "Paan!" Rapenangan talingan pagugulet nenda, aleakenangan nia. 52Kuanangan yesus ka matada tai imam sabeu samba utera sipasijajago Uman Taikamanua samba tai bajara tai Yahudi siooi masilaba nia, "Sipananae pa aku ka bagamui nuooi kam sibara lanjau samba bobobo masilaba aku? 53Senen gogoi ai le aku ka talagamui ka Uman Taikamanua, ta anulaba kam aku. tapoi ia te teteremui samba teteret geget pugepgeman." 54Lepa labarangan Yesus, taroakerangan nia ka lalep imam sabeu; ai leu si Petrus itut nia simareunan. 55Ka gerat lalep aian ararusui api; puuddetrangan sangamberida ka bebet api. Ei leu si Petrus ka sia puuddetnangan ka talagada. 56Kele aiitco nia sara pagugulet sinanalep ai nia mukukuddu ka bebet api, kinerenangan nia, kuanangan, "Sinene leu et aleinia." 57Tapoi aipakele le si Petrus, kuanangan, "Ta, ta kuagai nia!" 58Ta amauju, ai minca sabagei masiitco nia, kuanangan, "Ekeu leu aleira leu et." Kuanangan si Petrus, "Ta aku ale!" 59Ai pa sangajam ujunia, ai sara minca sipasikukua bulat simaron, "Bulatania, sinene leu aleinia leu et, aipoi tai Galilea leu et nia!" 60Kuanangan si Petrus, "Ta kuagai sikuam ale!" Ai pei le nia maninibo, putokkinangan gougou. 61Beliuakenangan tubunia si Tuhan imattai si Petrus. Repdepnangan leu tiboiet Tuhan si petrus sikuania ka matania kise, "Tapei mutotokki gougou gogoi nene anupakelengan againu aku telu ngaminca." 62Belanangan leu ka gerat si Petrus, pusounangan sikuansikuan. 63Ia geti paguileakerangan Yesus sia sipasiuukkaake nia, pabobokirangan nia. 64Tabborangan matania, nounourangan nia, "Poiliat pei kasei sibobo ekeu?" 65Maigi pei le paloloiat rakua ka matania. 66Kele aimapato, parururangan tai bajara tai Yahudi, tai imam sabeu samba siagaisurat, taroakerangan yesus ka matat rapatda. 67Kuarangan ka matania, "Ke Kristus bai ekeu, kua le ka matamai." Kuanangan ka matada Yesus, "kenanen kukua ka matamui, ia leu et ta matotonem bagamui. 68Samba ke kunounou bai kam, ta leu et nuaalegi kam. 69barania kineneiget muuddetnan te Togatsirimanua kai kattoet Taikamanua Sipulugege." 70Kuarangan sangamberida, "Oto Togat taikamanua le ekeu?" aleginangan nia Yesus, "Kele sikuamui, ia tedda." 71Kuarangan, "Apananta pei le sipasimumuneng? Tubutangan poi amasiarep sibara ka ngangania!"

will be added

X\