LUKAS 2

1Ka teterenia nenda kaunangan parenta Kaisar Agustus bule itusuratnake sangamberi sirimanua ka sangalio polak. 2Pasisuranan nene ia te pasisuranan siboiki ka teteret si Kirenius mugubernur ka Siria. 3Eirangan leu sangamberi sirimanua ka laggai taikebbukatda senenda itusuratnake oninda. 4Si Yosep leu barania ka Natsaret ka Galilea, ei nia ka laggai Betlehem ka Yudea laggai David, kalulut muntogat samba punuteteu David poi nia, 5bule itusuratnake oninia samba si Maria nounogetnia sibara suruket. 6Sege sia sedda, aili aiaili laggonia si Maria. 7Tutuakenangan matat togania simanteu, togania sikebbukat, tabutnangan nia komang, bujukngakenangan nia ka pukoman tarimeu, taan poi anai kudduat ka sia ka lalep pugogoiat. 8Ai leu sedda ka mone sipasijajago tarimeu, ai sia masijajago tarimeura sinoibo. 9Sinulut rio malaikat Tuhan ka bebera, toroijinangan sia pulatsanan Tuhan, loto lepa sia. 10Kuanangan ka matada malaika, "Ba maloloto kam! Puangkakat baga sabeu le segeakenenku ka kam siaili sangamberi bangsa. 11Gogoi nene, amututuan matat Sipaarau kam, ia te Kristus, Tuhan, ka laggai David. 12Nene te patuaggaiatnia ka kam: Sesemuian sara sikolik sinabut komang, sipeperep ka pukoman tarimeu." 13Sinulut oi minca sangabagguak malaika sibara ka sorga masiumun Taikamanua kuarangan, 14"Umun ka Taikamanua ka pata, samba aban ka polak, ka sirimanua kilibet bagania." 15Kele aratuitui samalaika ratoili ka sorga, patiborangan sipasijajago tarimeu pasasambada, "Sita kam taei ka Betlehem, masiitco sibabara, sipoiliat Tuhan ka matata." 16Eirangan leu et simaola, seserangan si Maria, si Yosep samba sikolik sipeperep ka pukoman tarimeu. 17Kele araitco sikolik, nunuakerangan sangamberi siniboi malaika ka matada pagalaiat sikolik. 18Kisei le ka bagada sangamberi sipasiaarep sinunuakenenda sipasijajago tarimeu ka matada. 19Si Maria geti isiddoni le sangamberi tiboiet, ipaatu nia ka bagania bagei. 20Ia geti sia sipasijajago tarimeu, ai sia totoili, ai sia muurai masiumun Taikamanua, aipoi sangamberi siarep samba siitcora ta aijulut kele sikuat malaika ka matada. 21Kele aiaili balu ngagogoi ka teteret tusunat sikolik, kaurangan oninia Yesus, ia te oni sikuat malaika enan pei le ta isusuruketnake nia inania. 22Kele aiaili teterenia kai Yosep samba kai Maria raenungake arat pasilinara siripot Surukat Mose, ambitrangan sikolik ka Yerusalem rasegeake nia kai Tuhan. 23Aipoi ka surukat Tuhan atusurat, "Senen toga simanteu sikebbukat buita tupuneni le nia kai Tuhan." 24Samba leu masibuluake buluakenen kele siniboi ka Surukat Tuhan, ia te rua ngamuneng ngorut ele rua ngamuneng merpati simakatoga. 25Ka teteret nenda ai leu ka Yerusalem sara sirimanua sipuoni si Simeon. Simaroipo baga samba simatopit le nia, ai le ingengenaake sipusuibi tai Israel. Aisopsopman ka tubunia Ketsat Sipunenan, 26samba aipoiliatnan ka matania Ketsat Sipunenan tapei mamatei nia ke ta iitco boiki Kristus sinibalaakenen Tuhan. 27Kalulut patubbuiat Ketsat Sipunenan, oi nia ka Uman Taikamanua. Kele araambit Yesus saeppunia ka Uman Taikamanua masigalaiake ka tubunia siripot Surukat, 28alanangan nia si Simeon, beilanangan nia, umunakenangan Taikamanua pele ngangania, 29"Kineneiget Tuhan, obaakean itoili paguguletnu ka erut baga siripot siniboinu. 30Aiitcoan poi mataku Sipaarau sibara kekeu, 31sitarekngakenennu ka sangamberi bangsa, 32ia te pato sitoroiji tai bangsa, samba katuumunan bangsam Israel." 33Kisei le ka bagat ukkui samba inania masiarep tiboiet Simeon pagalaiat sikolik. 34Sukatnakenangan sia si Simeon, kuanangan ka matat Maria inania, "Toga nene aikauan nia Taikamanua sibailiu katubelekat samba katusuruatda simigi ka tai Israel. Bailiu nia patuaggaiat sibara ka Taikamanua, pajoggoloakenenda sirimanua simigi, 35sedda te imatoila bagat paatuatda. Kean le te lanjau ipunu ketsatnu reureu bagam." 36Ai leu et sara nabi sinanalep sipuoni si Hanna, togat Panuel muntogat Aser. Bulat amabajaan nia. Pitu ngarura le ujunia arapulalep simanteunia barania ka siokkonia. 37Sipululumangan le nia kineneiget, balu pulu epat ngarurangan bajania. Beri kaddiuakena Uman Taikamanua, sinago sinoibo mupuasao samba manindou masisuru Taikamanua. 38Nia leu moi ka teteret nenda; umunakenangan Taikamanua, samba itiboi pagalaiat sikolik ka matada sangamberi singenaake kabelaiat Yerusalem. 39Kele ailepa ragalaiake sangamberi siripot surukat Tuhan, toili sia ka laggaira ka Natsaret ka Galilea. 40Puuraunangan sikolik, samba maron tubunia, sun pusopppinan, samba ipaalei nia katet bagat Taikamanua. 41Senen rura mei le epput Yesus ka Yerusalem mupunen Paska. 42Kele aiaili pulu rua ngarura beunannia Yesus, ei sia ka Yerusalem kele simareirei ka punen. 43Kappulu punen, toili sia, tapoi Yesus geti amukuddu pei le nia ka Yerusalem taiaagaietda saeppunia. 44Ka bagada le te aian nia paeenung sambada saaleinia sitotoili. Gabarangan nia sanganantat gogoi ka saeppuda samba ka siagaira tubu. 45Taiseseseda nia, soksokrangan minca ka Yerusalem ragaba nia. 46Telu ngagogoi arapasigaba, seserangan nia ka Uman Taikamanua, ai nia ka talagada tai guru masiarepmake tiboietda samba masiise sia. 47Kisei lepa ka bagada sangamberi sipasiaarep againa masialegi. 48Kele araitco nia saeppunia tugegerangan. Kuanangan ka matania inania, "Sirou, angoi kise nugalai ka kai? Amakaratnan bagamai ukkuinu masigaba ekeu!" 49Kuanangan ka matada, "Nugagaba kodda kam aku? Ta pa nuagai kam mateu le kukuddu ka uman Ukkuiku?" 50Tapoi ta makolou ka bagada sikuania ka matada. 51Lepa toili nia sambada ka Natsaret, reddetnangan nganganda. Tapoi isiddoni le ka bagania inania sangamberi tiboiet nene. 52Puuraunangan Yesus, muurau tubu, muurau leu topitnia, samba manuntu bagat Taikamanua samba sirimanua ka tubunia.

will be added

X\