LUKAS 18

1Ia geti tiboinangan Yesus sara pasikat ka matada masikolouake buita imariuriu rapanindou, bui raoreake nia. 2Kuanangan, "Ai ka sara laggai sara sipasiukum taimaloto ka Taikamanua samba taimaletsei ka sirimanua. 3Ka laggai nenda ai leu sara sinanalep silumang simareirei moi masitaget nia masikua, 'Sineseatnake aku ka matat pajoggoloakenenku.' 4Piga pa ujunia ta aipuletsei nia. Lepa kuanangan ka paatuatnia, 'Kenanen ta kukalotoake Taikamanua samba ta kupuletsei beri sara sirimanua, 5kusisineseatnakean le sinanalep nene, amagejangan bagaku, bui ioi buruburu geti irabak aku.' " 6Kuanangan si Tuhan, "Paatu pei kam apa sikuat sipasiukum sikatai. 7Iangan pa Taikamanua, ta pa isisineseatnake sia sipilinia, sipusosoga ka matania sinago samba sinoibo, iooreake pa iromake sia? 8Kukua nia ka matamui: Maruei le isineseatnake sia. Tapoi ke moi geti Togatsirimanua, isesese leu pa tonem baga ka polak nene?" 9Itiboi leu Yesus sara pasikat ka matada siumunake tubuna sia le simaroipo, sabagei rapaloloi. 10Kuanangan, "Ai rua sirimanua sieei manindou ka Uman Taikamanua, sara tai Parise, sara sipuuku cukai. 11Purionangan si Parisena manindou ka paatuatnia kise, 'Kukua sura ka matam Taikamanua, ta poi pakere aku ka sirimanua sabagei, sipasiraraurau, simapajoat, sipaeelet, ele kele sipuuku cukai nene. 12Rua ngaminca kupupuaso ka bagat sangamenggui, samba saparpulu ka sangamberi bibiletku kupanguruatnake.' 13Sipuuku cukai geti ai le nia muririo ka sareunan, beri masiteila manua ta maro bagania, tapoi ibobo le rurukatnia kuanangan, 'Taikamanua kau imakate bagam kaku sijo nene!' 14Kukua nia ka matamui: Sipuuku cukai le aiparoipo Taikamanua aitoili ka lalepnia, ta si Parisena. Aipoi siabeuake tubuna tupagogoiso le nia, samba sipagoiso tubuna tuaabeuake le nia." 15Ia geti oi sipasiaambit tatogada sigoiso ka matat Yesus bule irape sia. Kele araitco nia sipasiuluinia golurangan sia. 16Sogainangan sia Yesus kuanangan, "Obaake kam tatoga raoi kaku, ba kekera kam sia; sirimanua kele nene le poi sibakkati Purimataat Taikamanua. 17Kukua nia ka matamui: Kasei pa ke ta kele tatoga ipasiala Purimataat Taikamanua, ta tuguguru nia ka bagania." 18Ai sara utera tai Yahudi masinounou Yesus kuanangan, "Guru simatopit, kipa kugagalai bule kuikepmake purimanuaiat sitaitatata?" 19Kuanangan ka matania Yesus, "Nukukua kodda aku simatopit? Ta anai kasei pa simatopit, sarat Taikamanua le. 20Surukat Taikamanua anuagaian: Bui nupaelet, bui nupamatei, bui nupanangkou, bui nupaboko, suru ukkuinu samba inam." 21Kuanangan simakayo, "Sangamberinia nene akugalaiakean ka pusulekatku pei le." 22Kele aiarep nia Yesus, kuanangan ka matania, "Ai pei sara galaiakenennu: sakiake sangamberi sibabara ka tubum, parubeinungan bulagatnia ka simageba, baranangan pukayoatnu ka sorga; lepa oi ekeu masitut aku." 23Kele aiarep tiboiet nene simakayo, mareureunangan bagania, simakope kayo le poi nia. 24Kinerenangan nia Yesus kuanangan, "Bulat mabesi ka simakayo tuguru ka Purimataat Taikamanua. 25Onta pei le malabbei tubuluk ka matat susuilak ka simakayo tuguru ka Purimataat Taikamanua." 26Kuarangan sipasiaarep, "Kisedda bai nia, kaseian le masisesese puaragat?" 27Aleginangan nia Yesus, "Sitaioi ka sirimanua, momoi ka Taikamanua." 28Kuanangan si Petrus, "Sangamberinia le akukaddiuake kai, kutut kai ekeu." 29Kuanangan ka matada Yesus, "Kukua nia ka matamui, senen sikaddiuake lalepnia, sinanalepnia ele sarainania, eppunia ele tatogania kalulut Purimataat Taikamanua, 30isisilo piga ngaoleat pa silinia ka tetere kineneiget pei le samba ka gogoi sialu ikepmakerangan purimanuaiat sitaitatata." 31Ia geti sogainangan sipasiuluinia sipulurua Yesus, kuanangan ka matada, "Aian tebai sita mananatara ka Yerusalem, muaailingan te sangamberi sinuratda tai nabi pagalaiat Togatsirimanua. 32Rasegeake nia ka sipuarat sabulungan, asarangan nia, paloloirangan nia samba raluji nia, 33rabobo nia samba ramateiake nia; tapoi ka gogoi sikatelunia, suru nia minca." 34Tapoi beri goiso ta makolou ka bagada sipasiului, malipput le katukolobat tiboiet nene, ta raagai apa sikuania. 35Malelegerengan le isege Yesus ka Yeriko, ai sara simapeset mukuddu ka bebet enungan manindou panguruat. 36Kele aiarep maigi sirimanua situsasabau, nounounangan, "Aponia sibabara?" 37Kuarangan ka matania, "Aitusasabau Yesus tai Natsaret." 38Pusoganangan leu et, "Yesus, Togat David, kau imakate bagam kaku!" 39Aserangan nia sia sipueenung ka mata ipumengmeng; tapoi memei le iaabeuake ngangania musoga, "Togat David, kau imakate bagam kaku!" 40Ia geti tokko Yesus, kuanangan rataroake nia ka matania. Kele aisege, nounounangan nia Yesus, 41"Aponia noba kugalai ka tubum?" Aleginangan nia, "Bule imaitco mataku, Tuhan!" 42Kuanangan ka matania Yesus, "Kauan imaitco matam. Aialeakean ekeu tonem bagam." 43Maitconangan leu matania, aitutut Yesus, aiuumunake Taikamanua. Itco araitco nene sirimanua simigi, umunakerangan leu Taikamanua.

will be added

X\